भांगरभूंय | प्रतिनिधी
स्कायमेट हे खाजगी संघटणे उपरांत आतां भारतीय हवामान खात्यानय अंदूं सरासरी परस उणो पावस पडटलो असो अदमास काडला. देशांत सरासरी पावस 87 सेंमी पडटा. सरासरीच्या 96 ते 104 टक्के पावस सामान्य मानतात. जून ते सप्टेंबर म्हयन्यांत सरासरी 93 टक्के पावस पडटलो, असो अदमास दोनूय संघटनांनी उक्तायला. अल निनोच्या प्रभावाक लागून अंदूं पावस उणो पडपाचो अदमास आसा. भारतांतच न्हय तर संवसारांतल्या जायत्या देशांनी कमी पावस पडटलो, असोय अदमास स्कायमेटान काडला.
पॅसिफीक म्हासागरांत सक्रीय आशिल्ल्या ‘अल निनो’क लागून ऑस्ट्रेलिया, दक्षिण आशिया आनी भारतांतल्या कांय वाठारांनीय दुकळ पडपाची भिरांत आसा. अंदूं सरासरी परस उणो पावस पडटलो म्हणल्यार 87 सेंमी. परस उणो पावस पडटलो. शेतकी प्रधान अर्थवेवस्था आशिल्ल्यान आमच्या देशांत हवामान अदमासाक खूब म्हत्व आसता. भारतांतली शेती पावसाचेर आदारून आशिल्ल्यान शेतकारांची नदर मळबाचेर थिरावता. देशाचे अर्थवेवस्थेंत शेतवडीचो 14 टक्के वांटो आसलो तरी देशांतलो 70 टक्के रोजगार अजून शेतवडीचेर आदारून आसा. जून ते सप्टेंबर ह्या काळांत पावस उणो पडटलो तरी पावस वेळार पावप तितलेंच म्हत्वाचें. तो येवपाक कळाव जाल्यार शेताची पेरणी फुकट वता. तशें जाल्यार परत पेरणी करपाची समस्या निर्माण जाता. ते भायर परतीचो पावसूय म्हत्वाचो. फाटलीं कांय वर्सां पावस परतून आयिल्ल्यान कापणेक आयिल्लें पीक फुकट वता. अशेंच चित्र आमकां फाटलीं कांय वर्सां दिसलां. सरासरी परस सकयल पावस आनी पावस येवपाक कळाव जालो वा परत वचपी पावसान धुमशेणां घालीं जाल्यार हें वर्स शेतकाऱ्यां खातीर कठीण थारपाक शकता.
आदींच बिगर मौसमी पावसाक लागून भेंड मोडिल्ल्या शेतकारांक स्कायमेट आनी हवामान खात्यान दिल्ल्या ह्या अदमासाक लागून निरशेणी येतली. अंदूं फावो तो पावस पडलो ना जाल्यार रिणाच्या वज्यान चेंपिल्ल्या शेतकामत्यांक हो व्हडलो धपको थारतलो. स्कायमेट आनी भारतीय हवामान खात्याचे अदमास खरे थारले जाल्यार देशाची अर्थवेवस्था कोसळटली. पावस उणो जालो जाल्यार म्हारगाय वाडटली. इतलेंच न्हय तर पिवपाच्या उदकाचो व्हडलो प्रस्न उप्रासतलो. अंदूं पावस उणो जावपाची शक्यताय आशिल्ल्यान उदकाचो वापर उणोच करचो पडटलो. प्रशासनान त्या उदकाचें योग्य नियोजन करचें पडटलें. अंदूं देशांत उश्णतायेचें ल्हार येतलें, असो हवामान खात्याचो अदमास केला, तो खरो थारपाक लागला, अशें दिसता.
उश्णतायेच्या ल्हारांचो परिणाम उदका संपत्तीचेर जातलो. उश्णताये प्रमाण उणो पावस पडपाचो अदमास खरो थारलो जाल्यार देशांत परतून दुकळा सारकी परिस्थिती निर्माण जावंक शकता. चार- पांच वर्सां आदीं दुकळ पडिल्लो. पिवपाच्या उदका खातीर नागरिकांक धांय दिका वच्चें पडिल्लें. कळसोभर उदक मेळोवपा खातीर नागरिकांक कितलेशेच किलोमीटर चलून वच्चें पडिल्लें. अशी परिस्थिती परतून जावपाक दिवपाची ना जाल्यार प्रशासनान आतां सावन उदकाचें वांटप योग्य रितीन करचें. लोकांनीय ताका तेंको दिवचो. उदक फुकट घालयनासतना तें वांचयल्यार उदकाचो संभाव्य उणाव सोंसूं येता. स्कायमेट आनी भारतीय हवामान खात्यान एकंदरीत उणो पावस पडपाचो अदमास उक्तायला, ती भारता खातीर धोक्याची शिटकावणी म्हणची पडटली.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
