भांगरभूंय | प्रतिनिधी
पणजी: हडफडेंच्या बर्च बाय रोमियो क्लबाचे धनी सौरभ आनी गौरव लुथरा हे आयज सोमारा दिल्ली पावतले. ह्या दोगांकूय थायलंड पुलिसांनी फुकेत हांगा 11 डिसेंबराक ताब्यांत घेतल्यात. तांकां भारतांत हाडपाची प्रक्रिया सीबीआय कडल्यान सुरू आसा.
दिल्लींत पावले उपरांत गोंय पुलीस तांका ताब्यांत घेतले. पुलिसांनी आतां मेरेन क्लबाचे धनी अजय गुप्ता, भरत करण सिंंह कोहली आनी क्लबाच्या 4 वेवस्थापकांक अटक केल्या. क्लबाचे धनी सौरभ आनी गौरव लुथरा हे पुलिसांच्या ताब्यांत आयले उपरांत तपासाक नेट येतलो. सौरभ आनी गौरव लुथरा हांकां भारतांत हाडपाचे सीबीआयचे येत्न सुरू आसात. दिल्लींत पावतकच गोंय पुलीस तांकां ताब्यांत घेतले, अशी म्हायती गोंय पुलिसां कडल्यान मेळ्ळी. ते दिल्ली पावपा विशीं कसलीच खबर गोंय पुलिसांनी दिवंक ना.
हॉटेलांत जेवपाक गेल्ले कडेन थायलंड पुलिसांनी लुथरा भावांक ताब्यांत घेतले. थायलंडांत आशिल्ल्या लुथरा भावांचो भारतीय पुलीस सोद घेतात ही खबर कळटकच थायलंड पुलिसांनी दोगांकूय ताब्यांत घेतले. आतां बँकोक सावन दिल्लींत पावले उपरांत गोंय पुलीस तांकां ताब्यात घेतले.
लुथरा भावां आड दिल्लींत लेगीत कागाळ नोंद आसा. हाका लागून दिल्ली पुलीस लेगीत कागाळीची चवकशी करतले.
रोशन रेडकार, प्रदीप घाडी आमोणकार
आनी सुनील दिवकराची चवकशी
बर्च बाय रोमियो लेन दुर्घटना प्रकरणांत अधिकारी तशेंच हेर संबंदितांची चवकशी सुरू आशिल्ल्यान चवकशी अहवाल सादर जावपाक कळाव जातलो. दुर्घटनेची चवकशी करपा खातीर दंडाधिकाऱ्यांचे समितीक सरकारान एका सप्तकाचो वेळ दिल्लो. इतले मजगतीं, दंडाधिकाऱ्यांच्या समितीन हडफडेंचे सरपंच रोशन रेडकार तशेंच जमनीचे मूळ धनी प्रदीप घाडी आमोणकार तशेंच सुनील दिवकार हांची चवकशी केल्या.
कागदपत्रां तशेंच परवान्यांची पडटाळणी आनी संबंदितांची चवकशी सुरू आसा. संबंदितांचे चवकशेक लागून अहवालाक थोडो कळाव जातलो, अशी म्हायती दंडाधिकारी अंकीत यादव हांणी दिली. निलंबीत जाल्ल्यो प्रदुशण नियंत्रण मंडळाच्यो तेन्नाच्यो वांगडी सचीव शमिला मोंतेरो हांची लेगीत चवकशी जाल्या.
परवाने दिवपी अधिकाऱ्यांचे म्हणणें आयकून घेवपा सयत तांचे कडल्यान हेर म्हायती घेवप सुरू आसा. ही प्रक्रिया पुराय जाले उपरांत अहवाल सादर करप शक्य जातलें अशें दंडाधिकारी अंकीत यादव हांणी सांगलें.
हडफडें हांगाच्या बर्च बाय रोमियो लेनीक फाटल्या शेनवारा रातीं उजो लागून 25 जाणांक मरण आयिल्लें. हे घडणुकेक 8 दीस पुराय जाल्यात. घडणुकेचे दुसरेच दिसा मुख्यमंत्री डॉ. प्रमोद सावंत हांणी दंडाधिकाऱ्या वतीन चवकशीचे आदेश दिल्ले. तशेंच तेन्नाच्यो पंचायत संचालक सिद्धी हळर्णकार, तेन्नाच्यो प्रदुशण नियंत्रण मंडळाच्यो वांगडी सचीव शमिलो मोंतेरो आनी पंचायतीचे तेन्नाचे सचीव तुळशीदास बागकार हांकां निलंबीत करपाची कारवाय केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
