सौदी अरेबियांत जाल्ल्या रस्तो अपघातांत ४२ भारतीयांक मरण

भांगरभूंय | प्रतिनिधी

रियाध, खबरां संस्था: हैदराबादच्या प्रवाशांक सौदी अरेबियांतले रावपी सुवाते वेल्यान मदीनाक घेवन वचपी बसीक सोमारा सौदी अरेबियांत अपघात जालो. हातूंत ४२ जाणांक मरण आयलें. मरण आयिल्ल्यां मदीं २० बायलो आनी ११ भुरग्यांचो आसपाव आसा.
थळाव्या माध्यमां वरवीं, बस एका डिझेल टँकराक आपटली, हाका लागून बसीक उजो लागलो. मुळाव्या अहवालांत अशें म्हणलां, हे मरण आयिल्ले सगले भारतीय आशिल्ले. चडशे प्रवासी हैदराबादचे आशिल्ले आनी ते उमरा करपा खातीर वताले.

मदिना सावन सुमार १६० किलोमीटर अंतराचेर आशिल्ल्या मुहरास लागसार भारतीय वेळे प्रमाण सकाळीं १:३० वरांचेर हो अपघात जालो. अपघाता वेळार खुबशे प्रवासी न्हिदिल्ले. हाका लागून बसीन धपको दिले उपरांत उजो लागिल्ल्यान तांकां वाटावप शक्य नाशिल्लें.
तेलंगणा सरकारान हे घडणुकेचेर बेगोबेग प्रतिक्रिया दिली आनी सांगलें, ते रियाधच्या भारतीय दुतावासां कडेन संपर्कांत आसात. राज्य सरकारान जारी केल्ल्या निवेदनांत म्हणलां, मुख्यमंत्री रेवंत रेड्डी हांणी दिल्लींतल्या अधिकार्‍यांक पिडेस्तांची वळख पटोवपा खातीर आनी हेर औपचारिकताय पुराय करपा खातीर दुतावासा कडेन लागीच्यान समन्वय सादपाचे निर्देश दिल्यात.