भांगरभूंय | प्रतिनिधी
सोमारा करतले गुन्यांव दाखल
पणजी: कुडचडें लैंगीक अत्याचार प्रकरणांत एके बायलेन कागाळ दाखल केल्या. हे संबंदी सोमारा रितसर गुन्यांव दाखल करतले. आतां मेरेन दुबावीत सोहम नायक हाचे आड चार गुन्यांव दाखल जाल्यात. मजगतीं, ताचे कडल्यान जप्त केल्लो मोबायल वेर्णेच्या न्यायवैजक प्रयोगशाळेंत धाडून दिला.
कुडचडें लैंगीक अत्याचार प्रकरण 22 मार्च दिसा मुखार आयिल्लें. उपरांत कुडचडें पुलिसांनी दुबावीत सोहम नायक हाचे आड पयली गुन्यांव दाखल करून अटक केल्ली. त्याच वेळार पुलिसांनी ताचे कडल्यान मोबायल जप्त केलो.
मजगतीं, दुबावीत सोहम नायकान मोबायलाचेर आशिल्ले सगले व्हिडियो डिलीट करून पुलिसां कडेन दिल्लो. ताका लागून ताच्या मोबायलांत आक्षेपार्ह अशें कांयच सापडूंक नाशिल्लें. ह्याच वेळार दुबाविता आड दोगां चलयांनी कागाळ दाखल केले उपरांत ताचे आड आनीक दोन गुन्यांव दाखल केले.
उपरांत प्रकरणाची दखल घेवन प्रकरण गुन्यांव फांट्या कडेन वर्ग केलें. उपरांत एका नेण्टे पिरायेचे चलयेच्या कागाळी वेल्यान ताचे आड आनीक एक गुन्यांव दाखल केलो. उपरांत गुन्यांव फांट्यान ताच्या घराची झडटी घेतली तातूंत कांयच सांपडले ना.
मजगतीं, पुलिसांनी जप्त केल्लो मोबायल तपासणी खातीर वेर्ण्यां न्यायवैजक प्रयोगशाळेंत धाडून दिला. मजगतीं दुबावीत सोहम नायक हाका शुक्रारा बाल न्यायालयांत हजर केल्लो. त्या वेळार न्यायालयान ताका चार दिसांची पुलीस कोठी दिली.
मजगतीं, दुबावीत सोहम नायका आड एके बायलेन कागाळ दाखल केल्या. तातूंत दुबावितान तिचे कडेन इश्टागत करून तिचेर लैंगीक अत्याचार केल्ल्याचें म्हणलां.
मजगतीं, गुन्यांव फांट्यान कागाळीची दखल घैवन सोमारा हे संबंदी गुन्यांव दाखल करपाचे आसात अशी म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
