भांगरभूंय | प्रतिनिधी
नवी दिल्ली, खबरां संस्था ः सोशल मिडिया वापरपाची पिराय सरकारान थारावची अशें कर्नाटक उच्च न्यायालयान 19 सप्टेंबराक सांगिल्लें. सोशल मिडिया वापरप ही बरी गजाल, पूण सध्या शाळेंत वचपी भुरग्यांक ताचें व्यसन जालां अशें न्यायालयान सांगलें. अशे परिस्थितींत सोशल मिडिया वापरपाची पिराय थारावप हो वरदान थारतलो.
17 वा 18 वर्सां पिरायेचे भुरगे सोशल मिडियाचो खूब वापर करतात, पूण देशाच्या बऱ्या खातीर कितें योग्य आसा आनी कितें ना हें थारावपाची परिपक्वताय तांकां आसा काय? अशें न्यायालयान विचारलें. मन भ्रश्ट करपी गजाली फकत सोशल मिडियाचेर न्हय तर इंटरनॅटावयल्यानय काडून उडोवंक जाय. हाचेर सरकारान विचार करचो. न्या. जी नरेंद्र आनी न्या. विजय कुमार ए पाटील हांच्या खंडपिठान एक्स (ट्विटर) याचिकेचेर सुनावणी करतना अशें सांगलें. सोशल मिडिया वापरपाची पिराय मर्यादा थारावपाचो विचार सरकारान करचो अशें न्या. जी नरेंद्र टोंडी हांणी सांगलें. वापरपी नोंदणी करता तेन्ना ताका गरजेची म्हायती दिवची पडटा, जशी ऑनलायन खेळां खातीर नोंदणी करप गरजेचें, अशेंय तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
