भांगरभूंय | प्रतिनिधी
मोपा विमानतळ पिडेस्त शेतकार संघटणेची पुलीस कागाळ
पेडणें: पेडणेंच्या मनोहर आंतरराष्ट्रीय मोपा विमानतळार कार्यरत आशिल्ल्या एका बिगर गोंयकारान गोंयचे जनतेच्यो भावना दुखोवपी संदेश सोशल मिडिया वरवीं व्हायरल केल्ले खातीर मोपा विमानतळ पिडेस्त शेतकार संघटणे वतीन मोपा पुलीस स्टेशनांत लेखी कागाळ दाखल केल्या.
मोपा विमानतळार एका आस्थापनांत कार्यरत आशिल्ल्या प्रतिकदास नांवाच्या एका तरणाट्यान बार्देसांतल्या साळगांवच्या चौगम रस्त्यार दोन पर्यटकांनी टॅक्सी चालकांक मारपेट जाल्ले खातीर गोंयकारांच्यो भावना दुखोवपी संदेश सोशल मिडियाचेर व्हायरल केलो. हाचे उपरांत तिडकीच्यो प्रतिक्रिया आयल्यो. हाची दखल घेवन पेडणेंच्या शेतकरी संघटणेन कागाळ दाखल केली.
ह्या लेखी निवेदनाचेर संघटणे वतीन जागृत नागरीक आशिल्ले संघटणेचे पदाधिकारी उदय महाले, भास्कर नारुलकार, गजानन गडेकार आनी संजय आरोसकार हांच्या सयो आसात. गोंयचे जनतेच्यो भावना दुखोवपी संदेश व्हायरल करून प्रतिकदास हांणी गोंयकारांच्यो भावना दुखयल्यात. प्रतिकदास हांणी हें बरें काम करूंक ना. गोंयच्या तिडकल्ल्या लोकांनी कायदो हातांत घेवचे पयलींच प्रतिकदासाचेर कारवाय करची, अशी मागणी केल्या.
मजगतीं, प्रतिकदास मोपा विमानतळावेल्या ज्या आस्थापनांत काम करता त्या आस्थापनांतल्या संबंदीत अधिकार्यांची भेट घेवन ताका कामा वेल्यान काडून उडोवपाचीय मागणी करतले. अशें करिना जाल्यार गोंयांत तिडकीचें ल्हार उसळपाची शक्यताय कागाळदार उक्तायतात. हे विशीं पुलीस उपअधीक्षक आशिष शिरोडकार आनी मोपा पुलीस स्टेशनांतले निरीक्षक नारायण चिमुलकार हांचे कडेन फोना वेल्यान संपर्क करून कारवायेची मागणी केल्या. पुलीस अधिकार्यांनी कारवाय करपाचें आस्वासन दिलां, अशी म्हायती कागाळदार भास्कर नारुलकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
