भांगरभूंय | प्रतिनिधी
-पर्यटना विशीं चुकीची म्हायती पातळावपी सोशल मिडिया इन्फ्लूएंजरांक करतले उक्तेंपणजी : सोशल मिडिया इन्फ्लूएंजरां कडल्यान यू ट्यूब तशेंच हेर माध्यमां वरवीं पर्यटना विशीं चुकीची म्हायती पातळायवप, कांय सोशल मिडिया इन्फ्लूएंजर पयशें घेवन बदनामी वा चुकीची म्हायती पातळायतात. चुकीची म्हायती पातळावपी वा बदनामी करपी सोशल इन्फ्लूएंजरांचेर एक्पोज करपा खातीर आराखडो तयार जातलो. जनसंंपर्क फांट्या सयत (पीआर) मुख्यमंत्री डॉ. प्रमोद सावंत हांचे लागीं हांवेंन चर्चा केल्या, अशें पर्यटन मंत्री रोहन खंवटे हांणी सांगलें.
पर्यटन मंत्री रोहन खंवटे हांणी मंत्रालयात वॉटर स्पोर्टस, क्रुज बोटी धनयां कडेन बसका घेतली. दर्यादेगांचेर भोंवपी हेडगी गोरवां आनी रस्ताद सुण्यांच्या उपद्रवा विशीं ताणी पुलीस तशेंच गोरवां सांबाळ खात्याच्या अधिकाऱ्यां कडेन बसका घेतली. हाचे उपरांत पत्रकार परिशदेंत उलयतना तांणी ही म्हायती दिली.
नव्या वर्साक गोंयचे तुळेंत हेर थळांक चड पसंदी आसा. गोंयांत पर्यटकांनी फाट फिरयल्या. अशा आशयाच्यो बातम्यो आनी पोस्ट सोशल मिडियाचेर पातळ्यो. मेकळे रस्ते आशिल्ले कांय फोटे व्हायरल जालें. ह्या सगळ्या घडणुकांचेर सरकाराची नदर आशिल्ली. हाचो कसलोच परिणाम पर्यटनाचेर जावंक ना. पोरूं परस अंदू नव्या वर्साक चड पर्यटक आयलें. फायव्ह स्टार सयत सगळी हॉटेलां फुल्ल आशिल्ली. दर्यादेगो पर्यटकांनी फुलून गेल्यो. हाका लागून हॉटेलां सयत हेर वेवसायिकांक बरो वेवसाय जालो. राज्यांतले पर्यटक वाडत आसात. पर्यटना विशीं चुकीची म्हायती वा बदनामी करपी सोशल इन्फ्लूएंजरांंक उक्तें करतले. जनसंपर्क फांटो (पीआर) कृती आराखडो तयार जातलो. सोशल मिडिया वरवीं जावपी बदनामी सरकार सोसचें ना, अशें मंत्री रोहन खंवटे हांणी स्पश्ट केले.
…………………………..
दर्यादेगांवेली हेडगीं गोरवां, रस्ताद सुणी
पयस करपा खातीर खासा मोहीम
दर्यादेगांचेर हेडगीं गोरवां तशेंच रस्ताद सुण्यांचो उपद्रव वाडत आसा. हाचो पर्यटकां सयत हेर लोकांक लेगीत त्रास जाता. रस्ताद सुणी कांय वेळार पर्यटकांक घांस मारतात. दर्यादेगांवेली हेडगीं गोरवां आनी रस्ताद सुणी पयस करपी मोहीम 10 जानेवारी सावन सुरू जातली. फेब्रुवारींत हे मोहिमेचो पर्यटन खातें नियाळ घेतले. पुलीस आनी गोरवां सांबाळ खात्याच्या जोड पालवान मोहिमेची कार्यवाय जातली. पर्यटन मंत्री रोहन खंवटे हांणी हे विशीं बसका घेतली. बसकेक पर्यटन खात्या सयत गोरवां सांबाळपी खातें आनी पुलीस खात्याचे अधिकारी हाजीर आशिल्ले.
…………………………….
पर्यटन खात्याच्या एनओसी बगर वॉटर स्पोर्टस बोटींक परवाने ना
वॉटर स्पोर्टस बोटींक परवानो दिवपा पयलीं बंदर कप्तानाक (कॅप्टन ऑफ पोर्टस) पर्यटन खात्या कडल्यान एनओसी घेवची पडटली. ही एनओसी घेतले बगर वॉटर स्पोर्टस बोटींक परवानो दिवपाक बंदर कप्तानाक मेळचें ना. तशेच वॉटर स्पोर्टसाचेर नियंत्रण दवरपा खातीर एसओपी तयार जातली. वॉटर स्पोर्टस वाल्यांक क्यू पद्दतीची कार्यवाय करप बंधनकारक आसा. क्यू पद्दतीचाे अवलंब केलो ना, जाल्यार कारवाय जातली, अशें पर्यटन मंत्री रोहन खंवटे हांणी सांगलें.
क्रुज बोटींचेर गोंयचे संगीत आनी पदार्थ
सांता मोनिका सयत सगळ्या क्रुज बोटींचेर जलसफरी वेळार गोंयचे संगीत लावचे पडटले. तशेंच जेवणांत गोंयच्या खाद्यपदार्थांचो आस्पाव करचो पडटलो. खाजगी पार्ट्यांक ही अट लागू जावची ना. मात सांजे एका वराच्या जलसफरी वेळार गोंयचे संगीत वाजोवचेच पडटले. हे विशीं क्रुज बोट धनयां कडेन बसका घेवन हो निर्णय जालो, अशें मंत्री रोहन खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
