भांगरभूंय | प्रतिनिधी
‘‘गोवा के लोग सुबह ब्रेकफास्ट मे चाय नही पिते है दारू पिते…. गोवा के लोग दिन रात फेनी पिते है…’’ गोंया विशीं चुकीची म्हायती दिवपी एक चित्रफीत नेमकी गोंय विधानसभेचें पावसाळी अधिवेशन चालू आसतनाच समाज माध्यमाचेर व्हायरल जाली. विरोधी पक्षाच्या आमदारांनी व्हायरल जाल्ल्या व्हिडिओ संबंदी देशी भोंवडेकार गोंयांत येवन गोंयचें नांव कशे पेड्डेर करतात हें मुख्यमंत्री आनी पर्यटन मंत्री हांचे नदरे खाला घातलें. पर्यटन मंत्र्यान सायबर सेलाच्या आदारान गोंय राज्याची बदनामी करपी व्हिडिओ काडिल्लो ताचेर योग्य ती कारवाय केले उपरांत ताणें माफी मागली… हें पयलेंच खेपे घडलां अशें न्हय. हाचे पयलीं लेगीत असल्यो घडणुको घडल्यात. फरक फक्त इतलोच आदल्या तेंपार आयचे भशेन आधुनीक एका सेकंदांत बऱ्यो – वायट, फट – खऱ्यो गजाली चित्रफिती, फोट्या सयत संवसारभर इंटरनॅटाच्या माध्यमांतल्यान पातळपाची साधनां नाशिल्लीं. छापील प्रसार माध्यमां, दिसाळीं आनी पळोवपा आयकुपाची टीव्ही, रेडिओ,
सिनेमा लोकां मेरेन बरो संदेश पावयताले, पूण सिनेमांतलें चित्रिकरण जर गोंयचेर आधारिल्लें आसल्यार तातूंतल्या पात्रांचीं नांवां मायकल, पेद्रु, टोनी, पिंटो, मेरी, मारी, जाक्लीन आसतालीं, आनी कथानकांत तांचो वेवसाय बेकरीचो वा सोऱ्या बार, तावेरनाचों, हात भट्टेन सोरो काडपाचो, नुस्तें पागोवपाचो. टी शर्ट, कालसांव, चड्डी, स्कर्ट, विस्तीद आनी माथ्यार चॅपें हो भेस. चडशा गोंयांत चित्रिकरण केल्ल्या सिनेमांनी संवादूय तेच ते थारावीक आसताले. सकाळीं सकाळीं मारिया मायकलाक उलो मारता ‘‘आरे ओ मायकल आज बेकरी मे नही जाने का क्या रे तेरेकू… साला रात दिन तुम लोग फेनी पियेंगा और हमारे धंदे का वाट लगायेंगा!’’ जालें!! असल्या संवादा वेल्यान त्या विशिश्ट सिने दिग्दर्शकाचो हेत गोंयचे लोक बेकरेचो, सोऱ्याचो वेवसाय करतात, आनी रात दीस फेणी पियेतता अशें दाखोवप आसतालो. असल्या सिनेमांनी आमच्या सुंदर गोंयचे रूप आनी हांगाची लोकजीण, सस्कृतायेचें एक वेगळेंच रूप संवसारा मुखार हाडलें.
देशभरांतले सगलेच भोंवडेकार गोंयांत येतात अशेंय ना, पूण एक खेप मनशांच्या मनांत प्रतिबिंबीत जाल्ली गजाल वचपाक कुस्तार. सिनेमांनी, पुस्तकांनी जें कितें दाखयलां वा उतरांनी चित्रण केलां तें तशेंच उरता. आमचें सुपुल्लें गोंय पर्यटनाचें, हवामानाचें नदरेन संवसारभर फामाद. दर वर्सा विदेशी चार्टर भोंवडेकार फ्लायटान तशेंच देशी भोंवडेकारांची भिरीं गोंयांत येतात. गोंय राज्याक संवसारीक उंचेल्या पांवड्यार व्हरपा खातीर गोंय सरकार गोंयांत तरेकवार कार्यावळी आयोजीत करून भोंवडेकारांचेर मोनेळ घालपाचो यत्न करता, ही तोखणाय करपा सारकी गजाल आसली, तरी गोंय म्हळ्यार पुराय व्यक्तीस्वातंत्र्य आशिल्ले वरवीं पर्यटकांक दिसता. गोंयांत पावतकूच तांकां हांगाचें कायदे म्हळ्यार तांकां कस्पटा समान. हाचें मुखेल कारण जे लोक सोशल मिडियाचेर गोंया विशीं वायट प्रचार करतात ताचोच हो परिणाम आसुये अशें म्हाका दिसता.
आदल्या तेपार भोंवडेकार गोंयांत येताले. तातूंत ‘हिप्पी’ नांवाची एक जमात गोंयांत येताली. ते लोक चड करून दर्यादेगेर नुस्तेकारांल्या खोंपींनी रावताले. त्या तेपार आनी आतां घुंवळे वखदां घेवपाचो प्रकार कितल्या प्रमाणांत वाडला हो एक वेगळो संशोधनाचो विशय. जेन्ना भयंकर गारे (झेल ) पडपाच्या मोसमाक सुरवात जाता तेन्ना युरोप खंडांतले लोक हवामान बदलपा खातीर उश्णताय आशिल्ल्या देशांनी भोंवडेर वतात. ज्या देशांतल्या राज्यांनी ते भोंवपाक येतले त्या राज्यांक तांकां लागपी मुळाव्यो सगल्या साधन सुविधेचें बरे पैकी वेवस्थापन आसप चड गरजेचें. कारण चड करून कांय आडवाद सोडल्यार युरोपियन म्हासंघातल्यान येवपी भोंवडेकार तांच्या देशांत खरपणान सरकारी नेमाक पाळो दिवपी नागरीक. आमचे गोंय आनी तांच्या कायद्या मदीं खूबशें साम्य आसा. फरक आसा तो तांचे धर्मीक संस्कृतायेचो आनी हवामानाचो. गोंय म्हळ्यार भारत देशांतलें एक नितळ, सुशिक्षीत लोकवस्ती आशिल्लें राज्य अशें तांणी आयकल्लें आसता. पूण हांगा पावतकूच हांगाची येरादारी वेवस्था, कोयराच्यो राशी, घाणयारो वास, उक्तीं गटारां, भिकारी हें पळोवन ते उबगतात. हॉलिडे प्लॅनाची येवजण केल्ल्या हॉटेलांनी रावप आनी तांणी थारायिल्ल्या गोंयच्या पळोवपा सारक्या सुवातांनी भोंवडेर वचप इतलें पुरतेंच मर्यादीत. खरेपणी सांगचें म्हळ्यार, ते गोंयांत येतात ती मनशांती मेळोवपाक. थोड्या दिसां खातीर जावंदी पूण सैमा कडेन एकरूप जावपाक आमच्या देशांतले योग शास्त्रांचेर तांचो खूब भावार्थ. तांचें सगळेच जिवीत ह्या इंटरनॅटाच्या युगांत सामके किचकट जाल्ल्यान गोंय, केरळ हीं राज्यां तांकां पसंद. हांगा येवन युनानी, आयुर्वेदीक मसाज घेतात, मेडिटेशन वर्गाक वतात.
हॉटेल ही मुळांत भारतीय संस्कृती न्हय. ब्रिटिशांनी तांचे राजवटकीच्या काळांत ती भारतांत हाडली. ताचे उपरांत देशभर भोंवडेकार येवंक लागले. आमचें गोंय पुर्तुगेझा पसून मुक्त जालें त्या वेळार केंद्रशासीत गोंयांत हाताच्या बोटार मेजपां इतलीं हॉटेलां आशिल्लीं. त्या मानान दर्यावेळेर पियेवपाची, खावपाची पुरवण करपी शॅक्सां चड आसलीं. काळ बदलत गेलो तसो हॉटेलांचो आंकडो वाडलो. तशी पर्यटन आनी पर्यटकांची संख्याय वाडली. आदीं, आमचे देशी भोंवडेकाराचें गोंयांत येवपाचें प्रमाण कमी. पूण जशे आधुनीकरण जायत गेलें, येरादारीच्यो सुविधा वाडल्यो तशें देशी भोंवडेकार गोंयांत येवपाक लागले. खरें सांगचें म्हळ्यार विदेशी भोंवडेकार आमच्या राज्याच्या महसुलांत चड भर घालतात अशें म्हाका दिसता. आमचे गोंयचेर साडेचारशें वर्सां पुर्तुगेझांची राजवट आसली हो इतिहास. बाटाबाटीच्या कांळात काय मूळ हिंदुचें धर्मांतरण केल्लें ही खरी गजाल. तरी पूण आयज गोंय म्हळ्यार पुर्तुगेझांचे वंशज अशे एक वेगळेंच चित्र सोशियल मिडियाच्या माध्यमांतल्यान कांय लोकांनी तयार केलां. एकंदरीत आदीं सिनेमांनी आनी आतां सोशल मिडियाचेर गोंया विशीं चुकीची म्हायती दितात हाचेर सरकारान खर कारवाय करूंक जाय अशें म्हजें मत.
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
