सोशल मिडियाचो गैरवापर केल्यार ‘सत्यानाश’

भांगरभूंय | प्रतिनिधी

सोशल मिडिया वरवीं समाजीक असमानतायेची पिळगी निर्माण जाल्या. आयज मोबायलाचो वापर व्हड प्रमाणांत वाडला. मोबायल तयार करपी मनशाक लेगीत तो ज्या कामाक वापरतात ताचो पश्चाताप जातलो, अशें म्हणल्यार अतिताय जावची ना.

आयज संवसारांत म्हायती मेळोवपा खातीर जायतीं साधनां उपलब्ध आसात. मोबायला वरवीं उपलब्ध आशिल्ले जायते अॅप खूबशी म्हायती दिवपाक लागल्यात. पूण, जायत्या वर्सां आदीं टीव्ही हें एकूच म्हायतीचें माध्यम आशिल्लें. आयज परिस्थिती पुरायपणान बदलल्या. ह्या परिस्थिती प्रमाण मोबायलाचो वापरूय व्हड प्रमाणांत वाडला. हातूंत सोशल मिडियान जोडल्यार संवसारांतल्या खंयच्याय कोनशांत घडपी खंयचीय गजाल एका सेकंदा भितर आमचे कडेन पावूंक शकता. अशें एक अद्भुत गॅझेट आमचे मुखार तयार जालां. जागृताय निर्माण करप वा जागृताय करप अशा जायत्या वाठारांनी म्हायती सेकंदां भितर मेळटा. बऱ्याच सुवातेर घडपी जायत्या तरांच्या घडणुकां विशीं आमचें मत उक्तावप, जगांतल्या बदलपी घडणुकां विशीं तरणाट्यांक तात्काळ म्हायती दिवप, हाका लागून सोशल मिडियाचो बरोच फायदो जावपाक लागला. पूण फायद्या परस लुकसाणाचें जाळें ल्हवू ल्हवू वाडत आसा. समाज संस्था घटमूट करचे बदला आयज ती दुबळी जावंक लागल्या. 

आयज व्हॉट्सअॅप, फेसबूक, इंस्टाग्रामाचेर दिसाक कांय वरां रावचे बदला आमी सुमार 6 वरां तरी थंय आसतात. मनरिजवणेचो आस्वाद घेतात. पूण सोशल मिडियाचो वापर मर्यादीत ना. ताचेर दिसान दीस बदलत वचपी घडणुको पळोवंक मेळटात. बरोबर आमकां ताचो अणभव मेळटा. जो मेरेन तो बऱ्या खातीर वापरताले तो मेरेन तो बरो आशिल्लो. पूण आयज ल्हवू ल्हवू परिस्थिती बदलत आसा. सोशल मिडियाचेर धर्मीक पांवड्यार मतभेद निर्माण जावपाक लागल्यात. गोंयांत फाटल्या एका म्हयन्या सावन सोशल मिडियाचे जायते वापरपी धर्मीक थळांचेर मतभेद निर्माण करपाचो यत्न करपाक लागल्यात. हाका लागून बरो समाज तयार करचे बदला तयार जाल्लो समाज मोडून पडिल्लो आमकां दिसपाक लागला. समाजाक खूब लुकसाण जावपाक लागलां अशें दिसता.

हिंदू आनी मुसलमान हांचे मदले सौहार्दपूर्ण संबंद गोंयांत खूब वर्सां सावन चलत आयल्यात. चवथीक गणपती बाप्पाची पुजा करतात. हातूंत हिंदू भावां वांगडा मुसलमान भावूय गणेशाची पुजा करतात. तेच प्रमाण मुहंमद पैगंबर वा अल्लाचेर विस्वास दवरपी हिंदू भावूय गोंयांतल्या जायत्या सुवातींनी सांपडटात. गोंयच्या जायत्या सुवातींनी उरूस सारको मुसलमान भावांचो धर्मीक उत्सव हिंदू भावांच्या सहकार्या बगर मनयनात. ही आमची गोंयची परंपरा. पूण आयज गोंयांत सोशल मिडिया वरवीं धर्मीक भेदभाव निर्माण करपाचे यत्न सुरू आसात, देखून सोशल मिडियाचो वापर फायद्या परस चड हानी जावपाक लागल्या हें खऱ्यांनीच दुर्दैवी. हालींच सोशल मिडियाचेर पैगंबर, मुसलमान धर्मा विशीं एक पोस्ट आयिल्ली. ते उपरांत मुसलमान भावांनी गोंयच्या पुलीस स्टेशनांनी निशेध करून कागाळी केल्यो. ल्हान गजालीं वयल्यान धर्मांत फूट निर्माण करून ताचो आसुरी आनंद घेवपाचो हो प्रकार फुडल्या काळा खातीर शिटकावणी दिवपी घांट जावंक शकता. मुसलमान धर्मा विशीं केल्ल्या आक्षेपार्ह विधानाक लागून अशांततायेचें वातावरण निर्माण जालें. कांय म्हयन्यां आदीं कांय नास्तिकांनी करासवाड्यार छत्रपती शिवाजी महाराजांच्या पुतळ्याची विटंबणा करून अडचणी निर्माण करपाचो यत्न केल्लो. मुसलमान धर्मा विशीं अशींच विधानां करून धर्मां मदीं फूट घालपाचो यत्न जालो.

भगवान राम हो हिंदूंचो देव. ताची पुजा करपी लाखांनी भक्त आयज लेगीत देशांत आनी परदेशांत रावतात. एका मुसलमान भावान ताचे आड आक्षेपार्ह विधान केल्ल्यान मुसलमान धर्मा संबंदी हिंदू धर्मांत बोवाळ निर्माण जाला. हिंदू भावांनी जायत्या पुलीस स्टेशनांनी वचून संबंदीत लोकां आड कारवाय करची अशी खर मागणी केल्या. हे संबंदी पुलीस गंभीरतायेन चवकशी करतात. एकल्याक अटकूय केल्या.

आयज सगळ्यांची मानसिकताय बदलत आसा. देशांत आनी परदेशांत धर्मीक पांवड्यार जी फूट निर्माण जावपाक लागल्या, ताका लागून आमचो धर्म पवित्र काय तुमचो धर्म पवित्र हाचेर वाद निर्माण जावंक लागल्यात. हाका लागून सामान्य नागरिकांची भावना दुखता. आपलो धर्म पवित्र मानपी लोक बेजारतात. हाका लागून समाजाक खूब लुकसाण जावपाक लागलां. व्हॉट्सअॅप, फेसबूक, इंस्टाग्रामाचेर खेळपी लाखांनी मोबायल वापरपी अशा ल्हान- ल्हान गजालीं कडेन खाशेलें लक्ष दिवन समाजाच्या लुकसाणाच्या प्रवाहांत सामील जावपाक लागल्यात, अशें दिसता.

ह्या सोशल मिडियाचो उपेग मजत करपा खातीरुच करचो, फूट घालपाक न्हय!

सोशल मिडिया आमी बऱ्या कामा खातीर वापरूं येता. आमच्या मुखार अशीं हजारांनी उदाहरणां आसात. पूण ह्या बऱ्या उदाहरणा मुखार जर आमी आमच्याच बऱ्या खातीर आनी समाजीक संरक्षणा खातीर गरजेचें तें करपाचेर भर दिल्यार आमचेंच कल्याण जातलें. दरेक धर्म सगळ्यां खातीर पवित्र. हेर धर्मांच्या आख्यायिका आनी परंपरेचेर आपलें मत उक्तावप, तें कितलें फट आसा, अंधश्रध्देचेर आदारिल्ले आसा, ताचेर आपलें मत उक्तायनासतना आपलो धर्म कितलो पवित्र आसा हाचेर भाशण दिवप योग्य थारतलें. पूण दुसऱ्याच्या धर्मा विशीं अनादर करपी विधानां करून धर्मीक पांवड्यार संकश्ट निर्माण करपाची परिस्थिती सगळ्यां खातीर धोक्याची आसा.

सोशल मिडिया वरवीं समाजीक असमानतायेची पिळगी निर्माण जाल्या. आयज मोबायलाचो वापर व्हड प्रमाणांत वाडला. मोबायल तयार करपी मनशाक लेगीत तो ज्या कामाक वापरतात ताचो पश्चाताप जातलो, अशें म्हणल्यार अतिताय जावची ना. आयज मोबायल वापरप्यांचो आंकडो भुरग्यां सावन जाण्ट्या लोकां मेरेन वाडत आसा. एका अभ्यासा प्रमाण, दिसान दीस स्क्रीनिंगाचो वेळ वाडिल्ल्यान दोळ्यांची समस्या वाडत आसा. जायत्या जाणांक दोळ्यांचे दुयेंस जावंक लागलां. दर खेपे मोबायलाची याद जाता तेन्ना आमी आमचो वेळ फुकट वगडायतात, अशें दिसता. आमी बऱ्या कामाक वापरूंक शकतात तो वेळ मोबायल फोनाचेर फुकट घालोवपाक लागल्यात. हाका लागून तरणाट्या पिळगेची विचार करपाची तांक दुबळी जाल्या.

ल्हान भुरगीं व्हड प्रमाणांत मैदानाचेर खेळटाना दिसतालीं. मैदानाचेर दीसपट्टो खेळप हो ताचे खातीर एक पर्याय आशिल्लो. आवय-बापूय जबरदस्तीन तांकां घरा आपयताले. आयज परिस्थिती पुरायपणान बदलल्या. हातांत मोबायल घेवन कुडींत वरांचीं वरां रावतना गरजे भायर नाका जाल्ले गजालीं कडेन आकर्शीत जावन बौद्दीक विचारांची बुन्याद दुबळी करपाची प्रक्रिया आमची तरणाटी पिळगी करपाक लागल्या. हाचे कडेन दुर्लक्ष करप धोक्याचें थारतलें. आयज पालकांचे पाळी आयल्या भुरग्यांक शेतांत वचपाक विनवणी करपाची. भुरगीं आवय-बापायच्या सल्ल्यान मैदानाचेर वतात, पूण थंय खेळचे बदला मोबायलाचेरुच खेळटात. हाचो परिणाम भुरग्यांचे भलायकेचेरूय जावपाक लागला.

मोबायलाक लागून आमी बऱ्यो गजाली करपाक शकतात, पूण आमी फायद्या परस चड नुकसान करुन घेतात. शारांनी, रस्त्यांनी मोबायल फोनांतल्यान निर्माण जाल्ले क्रांतींतल्यान आमी बऱ्यो गजाली करपाक शकतात हें निश्चीत. नाका आशिल्ल्या गजालीं कडेन खास लक्ष दिनासतना आमी बऱ्या गजालीं वयल्यान समाज निर्मितीचो नवो अध्याय बरोवंक शकतात. आयज गंभीरतायेन विचार करपाचो वेळ. धर्म, जातीवाद आनी पंथांत असमानताय पेरनासतना आमी सोशल मिडियाचेर नवी प्रक्रिया करूं येता. हाका लागून समाजीक उदरगती खातीर नवी उर्जा निर्माण जावंक शकता.

उदय सावंत 

7972079443