भांगरभूंय | प्रतिनिधी
पणजी : फाटल्या कांय दिसां सावन सोशल मिडियाचेर एक व्हिडिओ व्हायरल जाता. हातूंत एक मनीस खोर्लेच्या सांतेरी रवळनाथ देवळाचें कुलूप तोडून थंय सीसीटीव्ही कॅमेरे लायता अशें सांगलां. मात ते अनवळखी मनीस न्हय, ते देवळाचे विस्वासू मनीस आशिल्ल्याचें सचीव परेश धुळापकार हांणी सांगलें.
बिरेस्तारा पणजे जाल्ले पत्रकार परिशदेंत धुळपकार उलयताले. ह्या वेळार अध्यक्ष भिकू धुळापकार आनी हेर मानेस्त हाजीर आशिल्ले. परेश धुळापकार हांणी सांगलें, फाटल्या कांय वर्सां सावन देवळाचो एक पुजारी धालो, शिगमो वा वर्धापन दिसाचे कार्यावळींत आडमेळीं हाडटा. हाचे आड आमी पोरणें गोंय पुलीस स्टेशनांत, मामलेदार, उप जिल्लोधिकारी कार्यालयांत कागाळ दाखल केल्या. आमी ताका पुजारी पद सोडपाक सांगलां. अशें आसूनय तो दर फावटीं बेकायदेशीर काम करीत आसता.
कांय दिसां पयलीं आमचे अध्यक्ष भिकू धुळापकार आनी हेरांनी हांगा सीसीटीव्ही कॅमेरे बसयिल्ले. मात पुजार्यान ते काडून, लासून उडयले. आमचे कडेन हाचो पुरावो आसा. चार दिसां आदीं आमी परत कॅमेरे लावपाक गेले, तेन्ना तांणे व्हिडीओ काडून एका अनवळख्या मनशान कुलूप तोडिल्ल्याचें सांगलें. तो प्रशासनाची दिकाभूल करीत आपूण महाजन आशिल्ल्याचें सांगता. खरें म्हणल्यार ताचे कडेन कसलेच अधिकार नात, अशें परेश धुळापकार हांणी सांगलें.
भिकू धुळापकार हांणी सांगलें, व्हायरल व्हिडीयो वरवीं चुकीची म्हायती दिता. आमी कायद्यान थंयचें कुलूप काडून भितर गेल्ले. त्या पुजार्यान आमचे आड कागाळ केली. ताचे वांगड्यांनी म्हाका भेकडायिल्ल्यान हांव पुलिसां वांगडा गाडयेंत बसून गेलों. म्हाका अटक करूंक नाशिल्ली. सध्या हांगा आशिल्लो पुजारी आमकां त्रास दिता. आमी ह्यान पयलींय मामलेदारां कडेन कागाळ केल्ली. आतां आमी परत कागाळ करून ताका काडपाची मागणी करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
