भांगरभूंय | प्रतिनिधी
सोरो सेवन हें एक वेसन, पूण खूब जणांक ती मौज. सुरवातेक घडये तें तशें आसत, मात संवयेचेर पडलें म्हणटकच तें वेसन हें कोणाच्यान लिपोवंक जायना, ना म्हण न्हयकारूंक जायना. सोरो दादले तशेंच बायलो पियेतात आनी तीं वेसनाधीन जातात. आदीं बायल सोरो पियेता म्हणल्यार अजाप दिसतालें, आयज ती वस्तुस्थिती आसा. हेर वेसनां बराबर सोऱ्याच्या वेसनाक सांपडिल्ल्या व्यक्तींक वेसनांतल्यान भायर काडूंक बरेंच मुश्कील जाता. सोरो पियेवन मेल्ल्यांचो आंकडो नमूद करूंक अवघड.
आमच्या गोंयातूच बार्रांचो आनी होलसेल सोऱ्या दुकानांचो शिंवर पळेवंक मेळटा. सोरो पियेल्ल्या मनशांक आमी बेबदे म्हणटात. आतां सगळ्या सोरो पियेवप्यांक बेबदे म्हणचे? हो एक प्रस्न आसा. सोरो जिवाक बरो म्हण पियेवपी जायते लोक असात. ताचो संदर्भ सगळ्या धर्माच्या ग्रंथांनी मेळटा. ताचें सेवन कितलें करचें हें मात खंयच सांपडना. हे खातीर सोऱ्या पासून पयस रावूंक जायते जण उपदेश करतात, सल्लो दितात आनी मार्गदर्शनूय करतात. अशेंच एक पुस्तक जें संवसारभर फामाद आसा आनी जायते लोक आपल्या वेसनीक जिवीतांत बदल हाडूंक मार्गदर्शक साहित्य म्हण वापरतात तें ‘आल्कॉहॉलिक्स ऍनॉनिमस’ पुस्तक. हें पुस्तक संवसारभरच्या पन्नास वयर भासांनीं आनी कितल्याच भारतीय भासांनीय उपलब्ध आसा. हालींच तें मडगांवच्या ‘आल्कॉहॉलिक्स ऍनॉनिमस’ जम्यान रोमी कोंकणींत अणकारून जनरल सर्वीस कमीशन ऑफ आल्कॉहॉलिक्स ऍनॉनिमस हांचे मान्यतायेन ‘आल्कॉहॉलिक्स ऍनॉनिमस (ए.ए.) वर्ल्ड सर्वीसीसा मार्फत जी.एस. ओ. इंडिया हाणीं उजवाडा हाडलां. एक बरें पुस्तक उजवाडायल्ले खातीर तांकां शाबासकी फावो जाल्या. ह्या पुस्तकाक सोरो पियेवपी लोक ‘बीग बुक’ म्हण वळखतात. ताचें खाशेलेपण जावन आसा, पुस्तकाचे हक्कदार खंयच्याच बरोवप्याक श्रेय दिना, पुस्तकाचो गाभो आसा तसो वापरचो होच हेतू बाळगितात.
पुस्तकाचो गाभो
‘आल्कॉहॉलिक्स ऍनॉनिमस’ ह्या पुस्तकाक इकरा अध्याय आसात आनी तीन वेगळे भाग असात जातूंत म्हत्वाच्यो काणयो आसात. देखीक ‘आल्कॉहॉलिक्स ऍनॉनिमस’ हे संस्थेचो एक सांगाती मुखेल घडणार डॉ बॉबाचें वायट सपन, ‘आल्कॉहॉलिक्स ऍनॉनिमस’-चो पयलो जमो घडपी आक्रोन, ए. ए.-च्या एक मुखेल वांगड्याचो पूत आनी दक्षीणेंतलो शेतकामती, डॅट्रोइट शारांत ए. ए. सुरवात करपी, घरकान्न जी घरांतूच पियेताली तिची गवायकी, ए. ए.-न सोरो पियेनासतना रावूंक शिकयल्ल्याच्यो गवायकी, ए. ए.-च्यो चाली, भक्तीपणाचो अणभव, ए. ए. विशीं वैजुकी दिसणें, धार्मीक विचार हांच्या अस्पावा बराबर ए. ए. कडेन कसो संपर्क करचो आनी ए. ए.-च्या बारा संकल्पनांचो आस्पाव आसा.
पयल्या इकरा अध्यायांत ‘आल्कॉहॉलिक्स ऍनॉनिमस’ संस्थेचो घडणार बील डब्ल्यू हाची विस्तारान काणी वाचूंक मेळटा. तो कित्या खातीर सोरो पियेतालो आनी ताणें कितें भोगलें, ताचें खासगी जिवीत आनी सोऱ्याचे भकीक पडिल्ल्यान ताणें सोंशिल्ले आटाविटे ह्या अध्यायांत बरे तरेन मांडल्यात. सोऱ्याच्या वेसनांत सांपडटकच मनशाक दिसता अपलें आयुश्य काबार पुण हें पुस्तक अशा मनशांक धीर आनी आलाशिरो दिता तें दुसऱ्या अध्यायांत दाखोवन दिलां. मनशान आस्त सोडून दिवंक जायना, यत्न करीत रावल्यार फळ मेळटा हें सागलां. तिसऱ्या अध्यायांत बेबदिकाये विशीं अदीक म्हायती दिल्ली आसा. सोरो पियेपाचीं जायतीं कारणां आसतात तांचे विशीं भासाभास केल्ली आसा. दादल्या बराबर बायलांचोय आंकडो बेबद्यांचे वळेरेंत येता हें अजापवंत सत ह्या पुस्तकांत उग्तें केल्लें आसा.
हें पुस्तक संवसारीक पांवड्याचेर उपयोगांत येवपी अशिल्ल्यान 1939 उपरांत ए. ए.-च्या संपर्कांत आयिल्ल्या बेबद्यांचो हांतूंत उल्लेख आसा. मनशाचें देवा कडें कसलें-कसलें नातें आसा आनी सोरो पियेवप्यांक देव कोण हें विशीं ‘हांव नास्तीक’ ह्या अध्यायांत खोलायेन बरयलां. सोरो मनशाच्या जिवितांत कसो भितर सरता, ताचें सेवन कशें वाडत वता, कुटुबीक नात्यांत सोऱ्या विरुद्ध वावुरपी मनशां कडल्यान बेबद्यांक कसो आधार मेळटा वा ताची विटंबना जाता, हेरांचो सांगात तांकां फुडें व्हरता वा सोरो सोडूंक आधार करता जाल्यार बरी भसाभास मुखावेल्या अध्यायांनी वाचूंक मेळटा. बेबदो हो बेकार मनीसूच तर तो बरी नोकरी करपी लेगीत आसूंक शकता आनी तो नोकरेच्या जाग्यार कसो वागता आनी ताका वागयतात हाचें दर्शन ह्या पुस्तकांत घडटा. निमाण्या इकराव्या अध्यायांत बेबद्या खातीर दिश्टीकोण दिल्लो आसा. बेबोद्यांचें निवारण जावंचे खातीर बारा चाली (मोटवे रितीन आनी विस्तारान) दिल्ल्यो आसात त्यो खुबूच म्हत्वाच्यो. ‘हांव एक बेबदो’ हें मानून घेवन ह्या पुस्तकाचो वापर करपी लोखांनी बेबदे आयज बऱ्या मार्गार पाविल्ले आसात आनी तांचे खातीर दोतोर, नर्सी आनी खूब बरे मागपी कार्यरत आसात.
ए. ए.-चो संदेश
पयले फावट 1939 वर्सा हें पुस्तक उजवाडा अयिल्लें तेन्ना ‘आल्कॉहॉलिक्स ऍनॉनिमस’-चे 100 वांगडी अशिल्ले. वाचपी सवका सवका वाडूंक लागले आनी 1955 वर्सा जेन्ना दुसरी आवृत्ती आयली तेन्ना वांगड्यांचो आंकडो 1,50,000 इतल्याचेर पावलो आनी ‘बीग बूक’ मुळाव्या मजकुराच्या पुस्तकाची वांटणी 3 लाख परस चड जाल्ली. 1939 वर्सा थावन मुखा वेल्या वर्सांनी बेबद्यांच्या सगळ्या वटांनी पिराय आनी जिवीताचे वेग-वेगळे अणभव प्रतिबिंबीत करचे खातीर खासगी काणयांचो विभाग दुसरे आनी तिसरे अवृत्तींत अद्यावत (अपडेट) केल्लो, जेन्ना बील
डब्ल्यू डॉ बॉबाक मेळिल्लो आनी ए. ए.-चो संदेश जल्माक अयिल्लो. हो संदेश आयज लाखांनी लोका मेरेन पावला कित्याक तांचे फांटे गांवां-गांवांनी पसरल्यात आनी बेबदेच हे फांटे वेवस्थापीत करतात.
बील डब्ल्यूचें मत
बिल डब्ल्यू हाणें 1953 वर्सा बरयिल्लें: “बीग बुकाचो काणयांचो विभाग आमी चिंततात ताचे परस चड म्हत्वाचो आसा. ए. ए.-च्या भायल्या वाचप्यां कडेन वळख जावंची हें आमचें मुखेल माध्यम आसा. हें बरयिल्लें आसा तें ए. ए.-च्या. बसकांक उलोवप्यांच्या आयकपा इतलें आसा; हें आमचें निकाल दाखोवपी जनेल जावन आसा.”
सोंपयतना…
‘आल्कॉहॉलिक्स ऍनॉनिमस’ जम्याचो एक उद्देश आसा, कसल्याय कामाचो कोणाकूच श्रेय दिवप ना. हांव बेबदो, तूं बेबदो हें मानून घेवन सगळ्यांनी सगळ्यां पासत वावुरचें आनी बेबदीकायेंतल्यान भायर सरचें हो उद्देश. बीग बुक म्हणल्यार ‘आल्कॉहॉलिक्स ऍनॉनिमस’ हाचे चवथे आवृत्तीचो मजकूर कोंकणींतल्यान आयिल्ल्यान खुब जणांक संतोश भोगला. हें पुस्तक कोंकणींत येवंचें म्हण थोकोस घेतिल्ल्या मडगांवच्या ‘आल्कॉहॉलिक्स ऍनॉनिमस’ जम्याची तुस्त- तोखणाय जाल्या. खरें म्हणल्यार असलें चड साहित्य उजवाडा येवंक जाय आनी वेसनाधीन मनशां मेरेन पावूंक जाय. तें पावोवपाचो यत्न जाला आसतलो अशी आस्त बाळगितां.
विन्सी क्वाद्रुश
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
