भांगरभूंय | प्रतिनिधी
गोंयांत येवपी पर्यटकांचो एक व्हडलो वांटो दर्यावेळो, मौजमजा, नुस्त्याच्या जेवणा खातीर येता. आनीक एके गजालीचो तातूंत आसपाव आसा. सोऱ्याचो!! कोणाचीय भावना दुखूं, पूण ही सत्य गजाल. आतां ड्रग्स आनी नाच पार्टे खातीर विशिश्ट पर्यटक येवपाक लागल्यात. गोंयांत मुक्तपणान, सवाय भितर तरातरांचो सोरो पिवपाक, विकत घेवपाक मेळटा. उक्त्यार बसून सोरो पियेल्यार पसून कोण विचारीना. कायद्यान ताचेर बंदी आसली तरी पर्यटक हो नेम पाळिनात. दर्यावेळांचेर खारें वारें खावपाक वचप्यांक हें आमी सांगपाची गरज ना. गोंय म्हणल्यार वर्सयभर ‘खाओ, पिओ, मजा करो’. आतां ह्या सोऱ्याच्या वेवसायाक धपको दिवपाचें काम कांय परप्रांतीय वेवसायीक करपाक लागल्यात, हाचे पुरावे सांपडल्यात. ते विकतात तो सोरोय गोंयचो न्हय. गोंयचे परस तो सोरो सवाय. अर्थांत पर्यटक ताचेरुच उडक्यो मारतले. घिट्टी घालून तो विकत घेतले, हातूंत नवलाय कांय ना.
गोंय सोरो विक्रेते संघटनेन पयर अबकारी आयुक्तांची भेट घेवन हे गैरप्रकार बंद करचे, अशें निवेदन सादर केलें. संघटनेक जाय तशें जातलेंच अशें ना. पूण तांणी सांगलां, तें वेवसायाच्या मळाचेर चलपी अतिभयंकर प्रकारांचे उजवाड घालता. हरयाणा, चंडिगढांतल्यान उंची पूण उण्या मोलाचो सोरो गोंयांत येता खंय. तो अस्सल काय डुप्लिकेट तें सोद घेतल्यार कळटलें. फाटलीं पांच वर्सां सावन ही बेकायदेशीर विक्री चालू आसा, ते विशीं निवेदन दिवनूय अबकारी खातें तें उषापोंदां घेवन न्हिदलां.
हालींच अबकारी खात्यान पत्रादेवी ट्रक धरलो. तेन्ना तातूंत उंची सोरो सांपडलो. तो खंय कस्टमान मागयिल्लो, अशें ड्रायव्हरान सांगलें. उपरांत तो फट उलयता तें कळ्ळें. सोरो हाडपी कंपनीच्या पिळर्णाच्या गुंदांवाचेर धाड घाली तेन्ना थंयूय सोरो सांपडलो. पत्रादेवी बरेच खेपे सोरो धरतात. एके थारावीक कंपनीचो सोरो विकपाचो अधिकार गोंयांत फक्त एकाच मनशाक आसा. ताणें हो सोरो आपूण हाडूंक ना, अशें संघटनेक सांगलां. पूण तो त्याच मनशाच्या नांवार हाडिल्लो. इतलो की ताका हो सोरो विकत घेवप शक्यच ना, अशेंय संघटनेचें मत. म्हणटकच कस्टमाच्या नांवान, गोंयच्या ह्या वा हेर वितरकांच्या नांवाचेर कोणतरी सोरो हाडटा आनी विकता, असो अर्थ जालो. अबकारी खातें हाचेर सक्त कारवाय कित्याक करीना? फक्त धाड घालून सोरो धरप इतल्यारुच हें उरपाक जायना. केन्नाय हे ट्रक सांपडटात, हेर दिसांचें कितें?
गोंय सोरो विक्रेते संघटना म्हायती दितना हाचे फुडलो बाॅम्ब फोडटा. भायरसून सोरो हाडपी हे चडशे लोक हरयाणांतले वा ते वटेनचे. तांणी गोंयकारां कडल्यान खंय भाड्यान दुकानां चलोवपाक घेतल्यांत. राज्यांतल्या सगल्या दर्यावेळांचेर, मुखेल शारांनी, पर्यटना खातीर प्रसिद्ध आशिल्ल्या थळांनी हांचीच सोऱ्याचीं दुकानां आसात. ह्या सवाय सोऱ्याक लागून गोंयांतलो सोरो खपपाचें प्रमाण देंवलां. पत्रादेवी हालींच धरला त्या सोऱ्याच्या बाटल्यांचेर लेबलां नाशिल्लीं खंय. म्हणटकच तो बोगस आसतलो. भायल्यान येता तो उंची सोरो गोंया परस अर्द्यान सवाय आसता. आतां गोंयांत तो म्हारग कित्याक आनी हरयाणा, दिल्लींत सवाय कित्याक हे सोरो विकप्यांक खबर आसतलें. हो अस्सल म्हाल काय बोगस? गोंयचो काजू म्हूण आफ्रिकन काजू विकतात तसो?
ह्या बेकायदेशीर वेवसायांत सादारण चारशें वेपारी घुस्पल्यात. हाका भायल्यांचें रॅकेट म्हणूं येता. भायले भायले भायर भायलो सोरो हाडून भायल्यांक विकतात. हो सोरो परवानो आशिल्ल्या दुकानां वरवीं विकतात काय बार, पब, शॅक्स, कॅसिनो, हाॅटेलांक विकतात ताचो तपास करपाची जापसालदारकी अबकारी खात्याची, गुन्यांव फांट्याची. सोरो विक्रेते संघटना खंय आतां रितसर कागाळ करतली. ती हाचे पयलीं कित्याक केली ना? तांणी चारशे जाणांचीं नांवां दिल्लीं जाल्यार सरकारी यंत्रणांनी तपास, कारवाय कित्याक केली ना?
हालींच अमृतसरांतल्या मजिठा वाठारांत विखारी सोरो पियेवन 14 जाणांक मरण आयलां. फुडाराक गोंयांत कितेंय खपता म्हूण कळत जाल्यार तसलो सोरोय हांगा येवंक आसा. गोंयांत दुर्घटनाय जावं येता. पर्यटक तो घरा घेवन गेल्यार थंयूय कितें जावंक शकता. बदनाम जातलें गोंय आनी गोंयकार. पत्रादेवी नाक्याचेर फक्त रस्तो मार्गान सोरो हाडपीच सांपडटले, रेल्वे आनी विमान सेवांचेरुय लक्ष दवरूंक जाय. भायलो सोरो हाडून विकपी हे भायले विक्रेते सरकाराक टॅक्स तरी दितात काय? गोंय हें पर्यटन केंद्र म्हणटकच सोऱ्याची चड आयात जावंक जाय ही गजाल खरी, पूण ती कायदेशीर मार्गान. बेकायदेशीर पद्दतीन, हाचीं ताचीं नांवां सांगून सोरो हाडप हें गुन्यांवकारी कृत्य. तातूंत ह्या सोऱ्याचें प्रमाण वाडल्यार गोंयचे सोरो उत्पादक, विक्रेते सुक्यार पडटले. सरकारी येणावळ बुडटली. हाचोय विचार करपाक नाका?? गोंयांतल्या भोवतेक उद्देग, वेवसायांनी भायले घुसल्यात, आतां इन मीन साडेतीन वेवसाय उरल्यात, तेय भायल्यांच्या हातांत गेले काय मागीर ‘सुशेगाद’, ‘पोब्र फिदाल्ग’ अश्यो पाटयो गळ्यांत घालून हेडपाक आनी दनपरां भूस मारून आड पडपाक आमी मेकळे!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
