भांगरभूंय | प्रतिनिधी
वाराणासी, खबरां संस्था ः उत्तर प्रदेशांतल्या वाराणसी शारांत एक विचित्र घडणूक घडली. बापायन सोरो पियेवप बंद करचें म्हणून एका भुरग्यान केंस कापपाक न्हयकार दिलो. बापूय सोरो पियेवप बंद करना तो मेरेन केंस कापचो ना असो हट्ट त्या भुरग्यान केलो. उपरांत बापायन बंदुकेंतल्यान स्वताचेर फारपेट केलो. उल्लेख केल्ल्या मनशाचें नांव शिव प्रकाश सिंग (45) अशें आसा.
वाराणसीचे सहाय्यक पुलीस आयुक्त अजय कुमार श्रीवास्तव हांणी दिल्ले म्हायती प्रमाण, ही घडणूक घडली तेन्ना शिव प्रकाश सोऱ्याच्या प्रभावा खाला नाशिल्लो अशी म्हायती कुटुंबान दिल्या. शिवप्रकाशाचो ट्रान्सपोर्टेशनचो वेवसाय आसा. तांचे कडेन 2004 वर्सा सावन शस्त्रांचो परवानो आसा. शिवप्रकाशाक शिवम (15) आनी सुंदरम (12) अशें दोन पूत आसात. पुता कडेन वाद जाले उपरांत शिव प्रकाशान स्वताचेर फारपेट केलो.
पुलिसांच्या म्हणण्या प्रमाण रंगपंचमीच्या दिसा शिवप्रकाशान आपल्या भुरग्यांक केंस कापपाक सांगिल्लें. मजगतीं त्या भुरग्यान आपल्या इश्टां वांगडा होळी मनयली. तो भुरगो घरा परतलो तेन्ना ताणें केंस कापले नात हें बापायक दिसलें. बापायन पुताक हे विशीं विचारल्ले तेन्ना तांचे मदीं वाद जालो. पूतान म्हणलें तूं सोरो पियेवपाचे बंद करना तो मेरेन हांव केंस कापचो ना. हांचे वयल्यान वाद वाडतच गेलो. वाद वाडले उपरांत शिव प्रकाशान स्वताचेर फारपेट केलो. हाचे उपरांत कुटुंबान रोखडोच ताका हॉस्पिटलांत दाखल केलो. सध्या तांचेर हॉस्पिटलांत उपचार सुरू आसात आनी ताची स्थिती गंभीर आसा अशें दोतोरान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
