भांगरभूंय | प्रतिनिधी
विज्ञान, तंत्रज्ञानाच्या, मनीस चंद्रार धाडपाचे वाटेर आमचो देस आसतना आदल्यो परंपरा फाटीं पडटात, बदलतात. बदल आपणायतनाय सादूर रावया
दोन दिसां आदीं सांजवेळा पासयेक गेल्लें तेन्ना गणपतीच्या देवळे मुखार एक गाडी थांबिल्ली दिसली. गाडयेंत बसूनच एकलो पयशे घे आनी प्रसाद दी अशें देवळेंतल्या भटमामाक सांगतालो. गाडयेंत बशिल्ल्या दोगांच्या हातांत ग्लास आशिल्ले, उतरांय सारकीं नाशिल्लीं. सकयल देवन देवाक नमस्कार करात, प्रसाद घेयात, अशें भटमाम तांकां सांगतालो. गाडयेत बशिल्ले आयकूंक तयार नाशिल्ले, ते सोरो पियेल्यात हें तांच्या अवतारा वेल्यान कळटालें. तुमी सोरो पिल्यात हें भटमाम तांकां सांगतालो. गाडी देवळे मुखार आडवी आशिल्ल्यान यो- वच करतल्यांक त्रास जाताले. देवळेच्या फाटले वाटेन येरादारी पुलीस आशिल्ल्यान तांचे मजतीन गाडयेंत बशिल्ल्यांक गाडी काडपाक लायली. प्रसाद दिवन, पन्नास रुपयांची दक्षिणा आयले उपरांतच.
गोंय म्हळ्ळ्यार सोरो, मस्ती, कसिनो, केन्नाय कितेंय केल्यार जाता, जाय तशें भोंवपाक येता ही संवसारभर जाल्ली प्रतिमा निवळावपाक सरकाराक अजूनय जैत मेळूंक ना. सोरोच न्हय तंबाकू, ड्रग्ज ह्या वेसनां खाला गोंय चिड्डता, तातूंत पंचवीस टक्के मूळ गोंयकार आसतलेच, ना अशें न्हय.
गोंयांतले साबार नागरीक सोरो पिनात, ड्रग्ज घेनात हें सांगपाक जायरातींतलें गोंय बदलपाक जाय. हालीं भौशीक सुवातींत बियरी, सोरो पिवप वाडटा, कारवाय जाता पूण ती सदांच जायना. एखाद्या दिसा निमतान ते दिसा, सप्तकभर सोरो, ड्रग्ज ( घुंवळें वखदां) आड अभियान जाता, त्या अभियानाक चळवळीचें रुप दिवपा खातीर, आशिल्ले कायदे समेस्तांक सांगपा खातीर येवजण जाय. दिसपट्टे ल्हानशे जायरातींतल्यान भलायकी खातें हो वावर करुंक शकता.
सोरो, तंबाकू, ड्रग्ज भलायकेक वायट हे ल्हानपणा सावन शिकोवपाक जाय, घर आनी शाळेंतल्यान ते विशीं म्हायती भुरग्यांक मेळची. बालनाट्यां, पथनाट्यांतल्यान त्या वावरांत समाजीक संस्थांनी सरकाराक तेंको दिवंक येता.
आयज संवसार बोटार पावला, खंयचोय सिनेमा, नाटकां एका क्लिकार पळोवंक मेळटात. सिनेमा, टी व्ही सिरियलांतल्यान समाजीक संदेश दितात, पूण ते कृतीत हाडपाक जाय.
विज्ञान, तंत्रज्ञानाच्या, मनीस चंद्रार धाडपाचे वाटेर आमचो देस आसतना आदल्यो परंपरा फाटीं पडटात, बदलतात. बदल आपणायतनाय सादूर रावया, सोरो, कसिनो, तंबाकू, घुंवळे वखदांचे भलायकेचेर वायट परिणाम जातात, ते वाटेन वचूं नाकात हें सांगप गरजेचें. चित्रांतल्यान, अक्षरांतल्यान तें सांगपाक येता. हिंसा, सोरो, हेर वेसनां सिनेमा, टी व्ही माळेंतल्यान दाखयतना तें वायट हें मोठ्या अक्षरांनी, अभियानातल्यान सांगपाक जाय.
– सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
