भांगरभूंय | प्रतिनिधी
पिनेवालों को पिने का बहाना चाहीए…. म्हणटात ते भशेन सोरो पियेवपाक निमित्त लागना. दुख्ख जाल्यार कुट्ट आनी सुखाच्या, खोशेच्या खिणाकूय गुट्ट. कांय जाण सदांच तो ताळ्यांत रकयतात, तर थोडे दर शेनवार, आयतार सोऱ्याची पार्टी करतात. कांय वर्सां फाटीं एका दोतोरान जेवचे पयलीं दोन पेग मारल्यार जिवाक बरे अशें व्हिडियोंत सांगिल्लें. पूण तशें केल्यार वेसन लागूं येता, ताचें कितें? पिकनीक, ट्रिट, नरकासूर- नव्या वर्साचे आदले रातीं, शिमग्याच्या दिसांनी जायते तरणाटे पयले फावट सोमरस चाखतात. मागीर तातूंतले उणेच 10 टक्के तरी बेबदे जातात, असो जाणकारांचो अदमास. चडूच आसतले. थोड्यांक कितेंय चलता. नशा आयली काय जाली. मागीर तो सोरो विखारी आसलो जाल्यार हे सोऱ्याचे शौकीन कुटुंबाक त्रासांत घालतात. खंयच्या ना खंयच्या राज्यांत हें दरवर्सा पळोवपाक मेळटा. आतां बिहारांत असलीच घडणूक घडल्या.
बिहारांतल्या सारण, सिवान ह्या दोन जिल्ह्यांनी मंगळारा विखारी सोरो पियेवप्यांची भलायकी इबाडपाक लागली. ओंकारी आनी हड्ड्यांत दुखपाक लागलें. कांय लोकांची नदरुय गेली. फाटल्या तीन दिसांनी 25 परस चड लोकांक मरण आयलां. मरप्यांचो आंकडो अजून वाडत आसा. आतां गोपालगंज जिल्ह्यांतूय सोरो पियेवन एकलो मेल्ल्याची खबर आयल्या. खेरवां गांवांतल्या मुसहरी टोला वाड्यार तर दरेका घरांतलो एकलो मेला. तातूंत बायलोय आसात. सोरो पियेले उपरांत हें जालें, अशें घरच्यांनी पुलिसांक सांगलां. 12 लोकांक अटक जाल्या. हें घडणुकेचें राजकारण जावंकना, तरुच अजाप. सत्ताधारी नितीशकुमार आनी विरोधकां मदीं सध्या आरोपांचें झूज चलता. बिहारांत कथित सोरोबंदी आसा. पूण सत्ताधारी फुडारी, पुलीस आनी माफिया हांचे युतीक लागून दरेका चौकांत सोरो मेळटा, अशें आदले उपमुख्यमंत्री तेजस्वी यादव हांणी म्हणलां. सरकारान आतां सोरो विकप्यांचेर आनीक टॅक्स लावपाचें जाहीर केलां. सोरो पियेवन मरण आयलां हें सिद्ध जालें जाल्यार दरेका कुटुंबाक 4 लाख रुपयांची लुकसाण भरपाय दिवपाची घोशणा जाल्या. हे घडणुके उपरांत पुलिसांनी दोन दिसां भितर अडीचशें वयर धाडी घालून 1650 लीटर अवैध सोरो जप्त केला. ही तात्पुरती मलमपट्टी. उसरां सुचिल्लें शाणपण.
बिहारांत सोरो बंदीची सरकारान पयलींच घोशणा केल्या. तरीय थंय सोरो मेळटा. सरकारी यंत्रणा धरीत म्हूण मागीर तो गुपचूप विकप जाता. विकप्यांक दुसऱ्यांचे भलायकेचें पडिल्लें नासता. आपलीं बोल्सां भरलीं काय जालें. हो थळाव्या उत्पादकांनी तयार केल्लो सोरो. तातूंत कितें तरी मिस्तुराद केलां, तें पिवप्यांक माल पडलें. तांचो जीव गेलो. हुक, अरक (हुर्राक) अशा नांवांनी वळखतात तो हो सोरो. अंदूं जुनांत तामिळनाडूत 58 जाणांक विखारी सोरो पियेवन मरण आयिल्लें. 2022 त बिहारांत 30, गुजरातांत 42 जाणांक मरण आयिल्लें. 2020 त पंजाबांत 120 जाण सोंपिल्लें. 2002 त गुजरातांत 28 मेल्ले, तर 60 दुयेंत पडिल्ले. आनीकूय बऱ्योच घडणुको आसतल्यो. रोखडीच नशा येवपाक जाय म्हूण ह्या सोऱ्यांत मॅथानोल मिस्तुराद करतात. हें रसायन इंधनांत, पेंट थिनरांत वापरतात. तें पोटांत वचत जाल्यार कुड्डेंपण येता, लिव्हर इबाडता आनी वेळारुच उपचार जावंक ना जाल्यार मरणूय येता…. आनी हेंच सध्या बिहारांत घडपाक लागलां.
आमच्या गोंयांत अजून असल्यो दुर्घटनां घडूंक नात. पूण, सोरो पिवप्यांची भलायकी इबाडल्या. सोऱ्याच्या विखारी विळख्यान जायतीं कुटुंबां सोंपल्यांत. पिरायेची चाळिशी हुपचे पयलीं तरणाट्यांक मरण आयलां. तांच्या बायलांक त्रास, मनस्ताप जाला. तरीय पर्यटन राज्य, भरपूर येणावळ मेळटा म्हूण आमी बार्रांक अजून परवाने दित आसात. देवळां आनी शाळां कुशीक पसून हांगां बार्रा, तावेर्नां आसात. नवे -नवे तरणाटे थंय फांतोड जायसर रात रंगयतात. आतां तर डान्स बार्रुय नेटान चलतात. ते खातीर खास येवपी पर्यटक आसात. हें कितले मेरेन आमी चलोवंक दितले, ताचो विचार करचो पडटलो. कारण सोरो मर्यादे भितर पिवपी खूब उणें. निमतां सोदून वा फुकट मेळटा म्हूण पेगार पेग पोटांत धुकलपीच चड. तातूंत दुसऱ्याक वेसन लावपाची आनी ताका फोंडांत घालपाची विकृती जायत्या जाणांक आसता. पियेवपी अपुरबुद्द आसल्यार मागीर तांचे भकीक पडटा आनी सोऱ्यान व्हांवन वता. सरकारी यंत्रणेच्या मता प्रमाण, आमच्या देशांत दरवर्सा जावपी अपघातां मदले 40 टक्के फक्त सोरो पियेल्ल्यान जातात, खंय. हाचे वयल्यान सोरो जिवाक बरो काय तो काळजाक तोंपपी सुरो तें दरेकल्यान
थारावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
