सोरो घोटाळो हें भाजपाचें षडयंत्र

भांगरभूंय | प्रतिनिधी

अरविंद केजरीवाल: सोऱ्याचो घोटाळो केल्ल्याची पातळायली वावडी

पणजी: दिल्ली विधानसभेंत कशेंच येस मेळचें ना हें लक्षांत आयले उपरांत भाजपान आम आदमी पक्षान सोऱ्याचो घोटाळो केल्ल्याची वावडी पातळायली. उपरांत आपाच्या मुखेल पांच फुडाऱ्यांक अटक लेगीत जाली. पूण न्यायालयान हो खटलो पुरायपणान चुकीचो आशिल्ल्याचें सांगून तो दाखल करून घेवपाक लेगीत न्हयकार दिलो. हाचे वेल्यान कथीत सोरो घोटाळो हें भाजपाचें षडयंत्र आशिल्ल्याचें सिद्ध जाता अशी टिका आपाचे राष्ट्रीय संयोजक अरविंद केजरीवाल हांणी केली.

मंगळारा पणजेंत जाल्ले एके कार्यावळींत ते उलयताले. ह्या वेळार आमदार व्हेंझी व्हिएगश, आमदार क्रुझ सिल्वा आनी हेर पदाधिकारी हाजीर आशिल्ले.

केजरीवाल हांणी म्हणलें, आपान दिल्लींत खूबशीं लोकांक उपेगा पडपी कामां केल्यांत. शिक्षण, भलायकी मळार क्रांती हाडली. पूण भाजपाक हें उस्तुऱ्यां गेलें. देशाची राजधानी तांच्या ताब्यांत ना हें तांकां पळोवंक जालें ना. हाका लागूनच तांणी फटीचो सोरो घोटाळो तयार केलो. ते प्रमाण म्हजे सयत घडये पयलेच फावटी एका मुख्यमंत्र्याक अटक जाल्ली आसुये अशें तांणी म्हणलें.

केंद्रीय यंत्रणांचो चुकीचो वापर करून आमचे कचेरेचेर धाडी घाल्यो. पूण हातूंत तांकां कांयच चुकीचें सांपडलें ना. न्यायालयान लेगीत आतां हेंच म्हणलां अशें केजरीवाल हांणी म्हणलें.

तांणी मुखार उलयतना म्हणलें, कथीत सोरो घोटाळ्यांतल्या पयश्यांचो वापर गोंय विधानसभा वेंचणुकेंत केल्ल्याचो आरोप लेगीत आमचेर जाल्लो. पूण न्यायालयांत हो मुद्दो लेगीत खोडून काडलो. आपान गोंय वेंचणुकेंत केल्लो खर्च पुरायपणान योग्य आशिल्ल्याचें न्यायालयान म्हणलां. आमचेर फटीचे खटले घालून भाजप लोकां मदीं एक तरेची भिरांत घालता. राजकारणांत येवं नाकात नाजाल्यार तुमची अवस्था अशीच जातली अशें भाजपा सांगूंक पळयता. पूण ह्या देशांतले लोक, तरणाटे आमचे बराबर आसात. सत्ये खातीर कसलीय अग्नी परिक्षा दिवपा खातीर आमी सदांच तयार आसात अशें केजरीवाल हांणी म्हणलें.

सान्नीन नितळ करुया

भाजप दहशत पातळावपाचो यत्न करता आसत जाल्यार लोकांनी भियेवचे न्हय. आमी सगल्यांनी आम आदमी पक्षाचे सान्नीन देशांतलो तशेंच गोंयचो कोयर नितळ करुया अशें अरविंद केजरीवाल हांणी सांगलें.