भांगरभूंय | प्रतिनिधी
गोंय आनी सोरो हांचें जल्मजल्माचें नातें. हजारांनी घराबे सोऱ्याक लागून काबार जाल्यात. तरीय दरवर्सा नवे ‘खेळगडे’ ह्या मळाचेर येत आसात. पूण आतां हें प्रमाण उणें जाता खंय. म्हणल्यार सोरो पियेवप्यांचो आंकडो देंवता. देंवपाकूच जाय. वयलेचाराक ही खोशयेची गजाल कशी दिसता, मात तिच्या पोटांत चड भिरांकूळ गुपीत लिपलां. तें म्हणल्यार पुलिसांच्या मतान, गोंयांत घुंवळे वखदां वेव्हार वाडला. तातूंत गोंयकार तरणाटेय आसात. ड्रग्स हो कुटुंबा खातिरूच न्हय, तर गांव, राज्य आनी पर्यायान देशा खातीर हुस्क्याची गजाल. महासत्ता जावपाचे वाटेर आशिल्ल्या आमच्या भारताक पोखरून पोकळ करपाची तांक ह्या ड्रग्सांत आसा, हें सगल्यांनीच मतींत दवरल्यार बरें.
अंदूंच्या पयल्या चार म्हयन्यांत गोंय पुलिसांनी फाटल्या चार वर्सांत धरूंक ना, इतलें ड्रग्स जप्त केलां. 68 कोटी. अंदूं 60 जाणांक धरल्यात, तातूंत 18 गोंयकार आसात. फाटल्या चार वर्सांत 691 लोकांक धरल्यात. भितर 195 गोंयकार. चिकोळण्यां तर अंदूं 43 कोटींचें कोकेन धरिल्लें. ह्या प्रकरणांत तिगांक अटक जाल्ली. आतां तांकां ख्यास्त केन्ना जाता पळोवपाची! गोंयांत फक्त ड्रग्स विकपाकूच लोक येनात. तर थोडे हांगा गांजाचें उत्पादन घेतात. एकलो भायलो विद्यार्थी तर तीन कुडीचें गेस्ट हावस चलोवन, गिरायकांक ड्रग्सांची पुरवण करतालो. ह्या गैरवेव्हारांत फक्त आनी फक्त देशी, विदेशी आसात, असो समज कोणें करून घेतला जाल्यार तो दृश्टीहिनांच्या जगांत रावता, अशें म्हणचें पडटलें. गोंयचे कितले पाब्लो इस्कोबार ह्या धंद्यांत आसात, ताचो सोद नेटान घेवपाची गरज आसा. निदान फुडल्या 22 वर्सां भितर तो सांपडचो.
गोंय हें पर्यटन राज्य. म्हणटकच ड्रग्स चाखपाक थोडे पर्यटक खास हांगा येतात, हें लिपिल्लें ना. भायले, भितरले कांय बेरोजगार तरणाटे ह्या ड्रग्स विक्रेच्या धंद्यांत आसात. पयलीं दर्यावेळां वयल्या पार्ट्यांनी सोरो व्हांवतालो, आतां ताचो जागो ड्रग्सांनी घेतला. सोशल मिडियाचेर लक्ष दवरपाचो वेळ आयला. कारण बरेच वेव्हार आॅनलायन जातात आसतले. ड्रग्स विकपी कोण तें विशीं थळाव्यांक दुबाव आसता. तांणी ही म्हायती पुलिसांक कळोवंक जाय. दर्यादेगांचे कोण कितें करता हाची 99 टक्के खबर पुलिसांक आसता खंय. जर हें खरें, जाल्यार ताचेर कारवाय करपाक ते मुखार कित्याक सरनात? दर्यादेगांचेर गस्त वाडोवप, शाळा, काॅलेजांनी जागृताय, ड्रग्साचे वायट परिणाम हाची म्हायती विद्यार्थ्यांक दिवची. वेसन लागिल्ले व्यक्तीक गुन्यांवकार समजूंक जायना. दुयेंती समजून तिचेर उपचार जावंक जाय. पंचायती, देवळां, चर्ची, मशिदी, महिला मंडळां, खेळां क्लब हांकां वांगडा घेवन ड्रग्सा आड मोहीम सुरू करीत जाल्यार लोकांचेर परिणाम जातलो. धर्मगुरू हे बाबतींत लाख मोलाचें काम करपाक शकतात.
ड्रग्स मुक्त दर्यावेळ चळवळ सुरू करपाचो वेळ आयला. मेळटा त्या कारणा खातीर ओली पार्टी करप आतां पुरो. कुटुंबीक, पर्यावरण वा संस्कृतीक पर्यटनाक चड चालना दिवची. दर्यादेगेर वा गांवांनी कोण दुबाव घेवपा सारको मनीस भोंवता जाल्यार थळाव्या पंचांक, पुलिसांक रोखडीच खबर दिवपाक जाय. हाॅटेलांनी कोण कसो वागता, ताचेरूय नदर जाय. कारण कितेंय जाल्यार मागीर हाॅटेलाचें नांव गरज नासतना बदनाम जाता. कोणे रातच्या वेळार दर्यादेगांचेर पार्टी, संगीत पार्टी आयोजीत केली काय थंय अचकीत वचून नेमकें कितें चल्लां तें कोण पळयतात? हिमाचल प्रदेशांत ड्रग्स उडटालें. मात शाळांनी जनजागृताय, धर्मीक फुडाऱ्यांचें मार्गदर्शन, गांजाची शेतां, पोरसां ड्रोनाच्या साह्यान तपासप, नश्ट करप, ड्रग्स मुक्त गांव अशी इनाम येवजण जाहीर करून तांणी घुंवळे वखदांचेर पूर्ण नियंत्रण मेळयलां. गोंयान हें उपाय कित्याक करचे न्हय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
