भांगरभूंय | प्रतिनिधी
पणजी, प्रतिनिधी : गोंयांत आमी सोरोप चाबल्यार ती गजाल गंभीरपणान घेनात. हाचे फाटले कारण म्हणल्यार आमकां ताची म्हायती नासता. हें म्हायती खातीर डेटा आसप गरजेचो. तशेंच गोंयात दोतोरांक तज्ञ उपचारा खातीर वळखतात. जर सोरोप चाबपाचे मळार दोतोरांनी बरें काम केलें जाल्यार गोंय आनी गोंया भायले लोक खंयच्याय कोनश्यांतल्यान तांकां सोदत येतले, अशें दिवचलचे आमदार डॉ. चंद्रकात शेट्ये हांणी सांगलें.
गोंय होमयोपॅथी मंडळान भलायकी संचालनालयच्या एकत्रित दुयेंस पाळत उपक्रम (आडीएसपी) हांचे जोडपालवान मिरामार हांगा सोरपाचो दंश आनी ताचें निवारण ह्या विशयाचेर चालू वैजकी शिक्षण (सीएमई) कार्यशाळा दवरिल्ली. हे कार्यावळीचें उक्तावणा उपरांत डॉ. शेट्ये दोतोरांक मार्गदर्शन करतालें.
सोरोपाचो चाबो कोणूच गंभीर घेनात आनी तो चाबचो न्ही म्हूण कितें जतनाय घेवची वा चाबल्यार कितें उपाय करचे हाचेर कोणूच उजवाड घालनात, अशी खंत डॉ. शेट्ये हांणी उक्तायली. ह्या सारकिल्ल्या विशयांनी आमी जो मेरेन लक्ष दिनांत ते मेरेन आमका हांचे महत्व कळचें ना. हे खातीर डेटा महत्वाचो जावन आसा. हे खातीर फाटल्या वर्सांत वा फाटल्या 10 वर्सांत कितल्या जाणांक सोरोप चाबला हाचे आंकडे महत्वाचे. फाटल्या वर्सभरांत सोरपान 500 जाणांक दंश केला आनी हो आंकडो खूब व्हड जावन आसा, अशें मत डॉ. शेट्ये हांणी मांडलें.
गोंय 15 लाख जनसंख्या आशिल्ले ल्हान राज्य हांगासर सगळे एकामेकांक वळखता देखून कोर्पोरेट होस्पिटलांचे तुळेंत गोंयात सरकारी आनी नर्सिंग हॉस्पिटला बरी कामगिरी करता. फक्त मणीपाल सोडून हे हॉस्पिटला बंद पडल्यात. जर हांव फुड्यान उबो रावलो जाल्यार म्हांका स्वतःची म्हायती दिवपाची गरज ना लोक म्हाका वळखतात, अशें शेट्ये हांणी म्हणलें.
गोंयात नांव, तज्ञ आनी गिन्यांन पळोवन लोक दोतोरा मुखार येतात. दोतोरा खातीर मार्केटींग करपाची गरज ना. सुरवेक गरज पडटा. पूण तुमी सोरपाचो चाबो बरो करपी दोतोर थारले जाल्यार पेडणेंचे पोत ते कारवार मेरनचे लोक तुमकां भेट दिवपाक येतले. तुमी झाडां पोंदा लेगीत उपचार केल्यार पसून गोंयच्या खाची- कोनशांतल्यान लोक तुमकां सोदत येतले. अशेंच होमयोपॅथी आनी आयुर्वेद दोतोरांचे आसा. एका कोनश्यांत आसात पूण लोक तांका सोदीत येतात. देखून तुमचे गिन्यान वाडयात आनी लोकांक दया दाखयात, असो उलो डॉ. शेट्ये हांणी मारला.
आयडीएसपीचे डॉ. उत्कर्ष बेतोडकार हांणी सांगले सोरोप चाबल्यार उपचार कसो करप हाचे विशीं आमका खूब दुबाव आसात. जर सोरोप चाबिल्लो दुयेंती मुळावे भलायकी केंद्रात आयलो जाल्यार ताका थंय उपचार दिवप वा गोंय वैजकी महाविद्यालयात धाडप हाचे विशीं कोफुसांव तयार जाता. देखून हे कार्यावळीचे तीन हेत आसात. दोतोर, नर्सी आनी हेर कर्मचाऱ्यांक प्रशिक्षण दिवप, दर दुयेंती मेरेन सोरपाचे विखाचे निवारण करपी वखद पावोवप आनी तिसरें लोकां मदीं जागृताय करप. जर ह्यो तिनूय गजाली एक वांगडा करतले आसत जाल्यार आमका स्वतः सोरोप चाबल्याचेर कितें करप हे विशींची जागृताय आसपाक जाय. आमचे भितर कसलेच दुबाव आसपाक जायना, अशें बेतोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
