भांगरभूंय | प्रतिनिधी
एके सकाळी चार वराक म्हजो मोबायल एक सारको कुकारचा लागलो. मदरात्तेर एका घरांत घुशिल्या सोरपाक धरुक हांव गेल्लेलो. घरा पावन, रात्री निजतना दोन वरां जावन गेल्लेली. उटपाकूच जाल्लेना. परतून थोडे वेळान घरची बेल एक सारकी वाजपाक लागली. आता दूसरो उपाय नाशिल्लो, उटपाकूच लागलें.
खबर कसली म्हळ्यार, ताजे शेजारचे घरकान्नीले पांगरूणांत एक सोरप रिगून निदिल्लो! आत्ता घरा दरवट्यार आयिल्याक म्हज्या आळशीपणान परतून वचपाक लागतले, म्हूण म्हाका लज दिसुन त्याची माफी मागुन, भायर पडलो. सांगाताक आयिल्याक भिंवचे कारण ना म्हण सांगलें. नागाक सोडल्यार दुसरे विषारी सोरप 90% घरा भितर अशे येनात. हो बी विषारी आसचो शक्य ना म्हणले.
पूण थंय गेल्यार म्हाका, धस जाल्लें, म्हजे पस्तीस वर्साचे अणभवांत रसेल्स वैपर वा दबोय म्हळिलो सोरप घरांत येंवचो अपरूप. तांतूय तो तीन म्हयन्या पील, पलंगार चडुन घरकान्निलें मोवु गोमटेर हुनसाण घेयत पांगरूणांत निदिलो. म्हजे सीमीत समजणीची म्हाका लज दिसली. सोरपाक अळंगद हातांत घेवन पोतयेत घातलें आनी भायर आयलो. पलंगार निजिल्ले घरकान्नी कडेन उल्लयलो. सोरपाचे स्पर्शान भीवन तिजे बि. पी. वाडवन ती हैराण जावन बशिल्ली. तोंडातल्यान उतरां भायर पडनाशिल्ली. सोरपाचो स्पर्श जाल्लीलो भाग कुसून वत्ता असलो गैरसमज वा अंध विस्वासान तिचे तकलींत घर केल्लेले. पूण हांवे, तशें कितें जांवचे ना म्हूण समजावन सांगिले उपरांत, तिचो भंय कमी जालो.
म्हज्या विशिष्ट छंदा कारणान , सुमार 16 हजार घरांक हांवे भेट दिली आसूक जायस असो म्हजो अंदाज आसा. सोरप असलें पोटसऱ्याले विशीं सगळ्या लोकांक वयर सांगि्ल्ले बायलेलें अभिप्रायावरी अंध विस्वास आसप. हें पळोवन म्हाका खूप बेजार दिसलो. पयले कितल्यो तरी लोकांले प्रश्न, भंय, मूढविस्वास ह्याचान हांव, गोंदळून वचपी आनी मनाक पीडा जावपी. तरी त्या विशी जास्त विचार आनी लक्ष घाल्लेकीर ताजी जाप, परिहार आपोआप सुचुकलागले. सोरपा भोवंती इतल्यो अंध विस्वास आनी मूढ विचार भरल्यात, हाचें कारण ताजे विशीं लोकांत आशिल्लो जीवाभंय आनी सोरोपा संबंदी आशि्ल्ले अज्ञान. पूण एक फावटी भंय आनी अंधविश्वास बाजुक दवरून पोटसऱ्यालें हालचाल, आवडीन, सोंसणीकायेन निरीक्षण केल्यार पुरो. सोरपा सांगाता सगळें सैम आमका उगतें जाता! तें खीणाक तांचेर मोग आनी गौरव भाव येता. असलो एक अपूर्व अणभव म्हाका जाला.
म्हजे दिश्टीन सोरोप अत्यंत सुंदर, मुग्ध, निरुपद्रवी जीव. तो कारण नास्तना खंयच्याय जीवाक दुखोवंचो, त्रास दिंवचो वा रागान, द्वेषान चाविल्लो पुरावो जगांत खंय मेळना. सोरपांलें, विख हें एक रसायन, तान्नी खांवचे आहारांतल्यान तयार जात आसता. फेणाच्या रूपांत आसचे हें विख भलायके भरीत, बळ वाडंवचे पौष्टिक आशिल्ले एक द्रावण. ह्या रसायनाचो मुखेल उपेग शिकार करपाक, आहार गिळपाक, जिरोवपाक, आनी आत्म संरक्षणाक जाता. मारुक आयिल्ली, त्रास दित्तल्या शत्र् पसुन पळून वचपाक बी ताजो उपेग तो करता. पूण, तो दुसऱ्याची विनाश करपाची वृत्ती आशिल्लो प्राणी मात बिलकुल न्हंय. मनीस सोडल्यार दुसऱ्या खंयच्याय जनावर वा सुकणीं सवंण्यांक असली विकृती आसचे शक्य ना.
मनशाक आदी पसुन व्हडले प्रमाणार पोटसऱ्यांची आनी अन्य जीवांची गरज आसा. हें कोणय विसरूक नज. मनशान भोंवंडे जीवित सोडन थीर कृशीचें जिण्याची सुरवात केली, तेन्ना देकून तो सोरपांचेर निबून आस्सा. आमचे पूर्वजांक हुंदरां आनी दुसऱ्या जीवां पासून शेती आनी भाटांची राखण करपाक सोरपाची गरज पडता हें जाणून आशिल्ले. पूण आयज आमी नकळत तांचो फायदो निरंतर घेयत आसतात. सोरपांले विशाचें शुद्धीकरण करुन तातूंतल्यान तयार केल्लेले प्रतिविश म्हळिले औषधाचो मनशाकूच न्हय, तर सोरप चाविल्या खंयच्याय जीवांक वांचोपाक उपेग जाता.
अलोपथी, होमियोपथी, आयुर्वेद आनी युनानि चिकित्सा पद्धतिंत बी सोरपाचे विख, कॅन्सर, दांता कॅन्सर, स्तन कॅन्सर्, शिरांचे सूजेक, कोठो, कोष्ठ, काळजाचे रोग, रक्तस्राव थांबोवपाक, अल्ज़ैमर्स् (Alzheimer’s), अर्धांगवायु, (Paralysis) पार्किन्सन (Parkinson) रोगाक, संधीवाताची ( Joint Pain), दूकणे थांबवच्याक वोकदांत सोरपा विखाचो उपेग करतात. नागाचे पातळ खोवल्यां सावन तयार केल्या वखदान वांजपण, लैंगिक समस्या निवारण जातात. हात-पाय, गांट्यां दुख, संधिवात अशें मनशांले खूप रोग वा पीडाक हेराले (Russells viper) मेणान तयार केल्ले्ले तेलांन गुण मेळटा हें लक्षांत घेतल्यार सोरप मनशालो कितलो उपेगि आसा हाजी जाणीव जाता.
शेत कामत्यांच्या राखणेंत सोरपांलें सहकार्य लक्षांत घेतल्यार तांका शत शत नमन कोरूंक जाय म्हण दिसप. शेतकारांन शेत कामाची सुरुवात करतकच सोरप थंय येतात. शेताक उदक दिंवचे पसुन, जोत घालून गाद्दे कोसचे, बीयां वोंयचे, पीक येंवचे, फसल काडुन घरां व्हरु वरेक वेगवेगळे सोरप शेतकऱ्यांले सांगातान आसपी. पीक खांवपाक आयिल्ले, हुंदीर, कोळिंदूर, क्रिमि -कीट, सुकणी-पक्षी ,रानांतले वन्य प्राणी, कोणाकूय सोडनास्तना तांकां खावन, सोरप शेताची राखण करतात. ह्याच खातीर आमचे पूर्वज पयली पासून सोरपांची पूजा श्रद्धेन करत आयल्यांत.
(गजाली पोटसऱ्यांच्यो ह्या कृतींतलें उतारे. भाशा शैली मंगळुरी)
सुषमा आरूर
9740399995
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
