भांगरभूंय | प्रतिनिधी
‘आरव फार्मा’ कंपनी आड गुन्यांव नोंद
पणजी : सोरपाच्या विखावेल्या बनावट वखदाची पुरवण करून भलायकी खात्याक फटयिल्ल्या प्रकरणांत पणजी पुलिसांनी सांताक्रूझच्या ‘आरव फार्मा’ हे वखदां कंपनी आड गुन्यांव नोंद केला.
हे विशीं भलायकी खात्याच्या वैजकी विभागाचे उपसंचालक डॉ. सहीन सईद हांणी खात्या वतीन पणजी पुलीस स्टेशनांत दिल्ले कागाळींत फार्मा कंपनीन सोरपाच्या विखावेल्या बनावट वखदाची पुरवण करून फटयिल्ल्याचें म्हणलां. सुमार ४.९ लाख रुपयांच्या ह्या वेव्हारांत भलायकी खात्याक फटयिल्ल्याचें तातूंत नमूद केलां.
एके वेगळेच कंपनीचो लेबल्स वापरून सोरपाच्या विखावेल्या बनावट वखदाची पुरवण केल्ल्याचें तपासांत मुखार आयिल्ल्याचें पुलिसांनी सांगलें. ह्या प्रकरणांत पुलिसांनी फटींगपणां आनी कॉपी रायट कायद्या खाला गुन्यांव नोंद केला. केंद्रीय आनी राज्य अन्न आनी वखदां प्रशासनान हालींच सोरपाच्या विखावेल्या वखदाचो सांठो जप्त करून नुमने तपासणे खातीर धाडिल्लो.
तेलंगणांतले मूळ कंपनीन केल्ली कागाळ
हें वखद आरव कंपनीन भलायकी खात्याक पुरवण केल्ली. मात, तेलंगणाचे मूळ कंपनीन केंद्रीय अन्न आनी वखदां प्रशासना कडेन (एफडीए) सोरपाच्या विखावेल्या बनावट वखदां आपले कंपनीची लेबल्स दसोवन भलायकी खात्याक पुरवण करता अशी कागाळ केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
