भांगरभूंय | प्रतिनिधी
क्रांती दिसाचे कार्यावळी सावन सोमूक गांवांत एक नवी वळख मेळटा. त्या दिसा डॉ. राम मनोहर लोहिया जावन, तो बरें भाशण करता. डॉ. राम मनोहर लोहिया घालताले तसलेच कपडे कुसूमबाईन आपल्याक हाडलेल्यान आनी भाशण बरोवन दिल्ल्यान तो खोशी जाता. क्रांती दिसाच्या कांय दिसां आदीं सावन तो तें भाशण पाठ करीत आसता आनी ते खातीर तो तें बरे तरेन लोकां मुखार सादर करपाक शकता.
शाळे कडेन जाल्ले कार्यावळींत तो सगळ्यांचीं मनां जिखता. माचयेर वयर सरून सकयल देंवता मेरेन सोमू सामको लोहियांचेच भुमिकेंत आसता. शाळेचीं सगळीं भुरगीं ताळयो मारून ताची उर्बा वाडयतात. गांवांतलो खबरांकार ताचो फोटो काडून खबरांपत्राचेर छापपाक धाडटा. हे खातीर तो खुबूच खोशी आसता.
ते उपरांत शाळे कडल्यान पुर्तुगेजांच्या मोडोन पडलेल्या पोस्ता (पुलीस स्टेशना) मेरेन मिरवणूक काडटात. थंयूय तो सगळ्यां मुखार उबो रावून घोशणा दिता ‘‘वीर तो लोहिया, वीर ते जवान, मुक्तीचो पावयलो संदेश गोंयच्या गांवागांवांत’’.
तांच्या बरोबर चलपी शिक्षक आनी पालकूय मोठ्यामोठ्यान त्योच घोशणा दितात. आपल्यो घोशणा लोक म्हुणटात म्हूण तेका बरें दिसता.
पुर्तुगेजांनी गोंय सोडून वयतना जो पूल मोडलेलो, त्या बोरयेच्या पुला कडेन वचोन सगळीं घोशणा दितात. कुसूमबाई सगळो इतिहास लोकां मुखार आनी भुरग्यां मुखार दवरता. थंय जमलेले कांय जाण्टे पिरायेचे लोक तेणीं पुर्तुगेजां कडल्यान जे त्रास सोंसलेले ते विशीं सांगतात आनी तेंच्या दोळ्यांतल्यान दुकां व्हांवतात. हें सगळें चित्र पळयतच सोमू मोठ्यामोठ्यान परत घोशणा दिता आनी तेंची मिरवणूक शाळे वटेन पावलां मारपाक लागता.
खबरांपत्राचेर आपलो फोटो छापून येतलो हे खोशयेन सोमू अख्खो दीस काडटा. तो दीसभर त्याच उमेदीन आसता. दुसऱ्या दिसा सक्काळीं उठून तो आपल्याक बाबाक खबरांपत्र हाडपाक धाडटा आनी आपलो माचयेर रावून भाशण दिता आसतना फोटो खबरांपत्राचेर छापून येयला तें पळोवन नाचूंक लागता.
‘‘बाय हांव आयज शाळेक बेगीन वयतलों हां… म्हाका बाईक म्हाजो फोटो दाखोवंक जाय,’’ सोमू सुमनाक सांगता.
‘‘हांवूंय येतां रे तुज्या बरोबर. मात्सो राव…’’ सुमन तेका सांगता.
आपल्या भुरग्याचो फोटो खबरांपत्राचेर छापून येयलो म्हूण सोमूचे आई आनी बाबा लेगीत खूब खोशी जातात. त्या दिसा शाळेंत वचचे पयलीं ताची आई ताका ओवाळटा आनी ताच्या बऱ्या फुडारा खातीर देवा कडेन प्रार्थना करता. सोमूय हात जोडून देवा कडेन प्रार्थना करता आनी आपले भंयणी बरोबर शाळेंत वचपाक भायर सरता.
उजव्या हातांत पुस्तकां जाल्यार दाव्या हातांत खबरांपत्र धरून तो तुरुतुरू करून चलता. त्या दिसा तो व्हाळाचेर खेळपाक रावना. पाणसोरपाक पळोवपाक रावना आनी बांयचे कांसवूय पळोवंक रावना. तेका केन्नाकाय शाळेंत पावून तें खबरांपत्र कुसूमबाईक दाखयन काय जाता.
‘‘सोमू आयज तूं पाणसोरपाक बी पळोवंक रावलो ना… कांसवूय पळयले ना आनी म्हाकाय भिवयलें ना,’’ सुमन सोमूक चाळयता.
‘‘बाय हांव आतां मस्तीपणां करचो ना. पळोवंक ना तुवें म्हाजो फोटो खबरांपत्राचेर छापून येयला तो.,’’ सोमू खबरांपत्र तेका दाखयत उलयता.
शाळेक वयतना वांटेर तेंकां जाण्टे पिरायेचे कांय लोक मेळटात. ते सोमूक म्हुणटात ‘‘सोमू शाण्यां काल तुवें लोहियांची बरी भुमिका रंगयली हां. असोच व्हडलो जा आनी आमच्या गांवचें नांव वयर काड,’’
लोक आपली तोखणाय करतात तें पळोवन ताच्या पावलांक आनीकय गती मेळपाक लागता. आपल्या भावाक लोक बरे करतात तें पळोवन सुमनाकय खूब खोस जाता.
शाळेंत पावना फुडें, सोमू कुसूमबाईच्या हातांत खबरांपत्र दिता. सोमूचो फोटो पळोवन कुसूमबाई खुबूच खोशी जाता. कुसूमबाई शाळेंतल्या सगळ्या भुरग्यांक तेचो फोटो दाखयता आनी तेणीय सोमू भशेन मुखार सरूंक जाय अशें तेंकां सांगता.
आपल्या विद्यार्थ्याचो फोटो खबरांपत्राचेर येयला तें पळोवन खोशी जाल्ली कुसूमबाई सोमूक आपले वतीन इनाम दिता. ताचे जिणेंतलें हें पयलेंच इनाम. तितूंत काणयांचीं पुस्तकां, रंगपेठी आनी चित्रां काडपाचो कोऱ्या पानांचो कादेन आसता. सोमू हें इनाम पळोवन नाचपाक लागता आनी कुसूमबाईच्या पांयां पडटा.
‘‘खूब हुशार जा’’ असो ती तेका आशिर्वाद दिता. तेन्ना सोमू तिका आपूण खूब शिकतलों अशें उतर दिता.
घरा वचून तो तें इनाम आपले आवयक, भंयणीक, व्हडल्या भावाक आनी बाबाक दाखयता. तीं सगळीं तेका तोखेतात. तेन्ना तो आपलीं इनामां घट्ट वेंगेंत धरता. इतल्यान ताची भंयण सुमन येता आनी चित्रकलेचो कादेन तेच्या हातांतल्यान काडून घेता आनी म्हुणटा ‘‘तूं आजून खूब ल्हान आसा, म्हाका ह्या वर्सा चित्रकलेचो वर्ग आसा. हो हांव वापरतां हां,’’ सोमू मुकाट्यान तो कादेन आपले भंयणीक दिता. तेका मात्शें मनाक दुखता, पूण तो तेका ना म्हुणना.
‘‘हांव तुका हो चित्रकलेचो
कादेन दितां, पूण तुवें तेचेर बरें गणपतीचें चित्र काडचें पडटलें,’’ सोमू सुमनाक सांगता.
देड म्हयन्यान चवथ आसता. ते खातीर सुमन तेका बरें म्हूण सांगून तो कादेन आपल्याक दवरता आनी कांय दिसांनी तें एक सुंदर चित्र ताचेर काडटा. सोमू आनी ताचो बाबा गणपती घेवन घरा येतात अशें सुमन चित्र रंगयता.
फुडले कांय दीस सोमू त्या चित्राकूच पळोवन गणपतीच्या येवपाची वाट पळयता. तें चित्र जेन्ना जेन्ना तो पळयता तेन्ना तेन्ना तो म्हुणटा ‘‘गणपती बाप्पा मोरया’’
संजय बोरकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
