भांगरभूंय | प्रतिनिधी
भांगरभूंय । पत्रक
पणजीः आठव्य राष्ट्रीय हातमाग दिसा देवाचीतड- नादोडा हांगचे हातमाग तंत्रीक सहाय्यक सोमा महादेव गंवस हांका आदिलीला फावंडेशना वतीन राष्ट्रीय संत कबीर राष्ट्रीय रतन पुरस्कारान भोवमानीत केलें. राष्ट्रीय पांवड्यार समाजसेवेचें काम करपी आदिलीला फावंडेशनान दिल्लीच्या महाराष्ट्र सदनांत फाटल्या आयतारा ही पुरस्कार भेटवण कार्यावळ जाली. हो पुरस्कार फावो जाल्ले गंवस हे पयले गोंयकार आसात.
भारत सरकाराच्या वस्त्रोद्देग मंत्रालयाच्या लोकर आनी लोकरी कपडे निर्गत उर्बां मंडळाचो अध्यक्ष रोमेश खजुरिया हांणी सर्वोच्च् न्यायालयाचो वकील कृष्ण मूर्ती, रफीक शहा तशेंच आदिलीला फावंडेशनाचो संस्थापक वांगडी डॉ आदिनारायण हाचे हाजेरींत हो पुरस्कार गंवस हांका दिलो.राजेंद्र (सोलापूर- महाराष्ट्र), ओंका नाथन (उत्तरांचल), विनोद (उत्तर प्रदेश), जावेद अख्तर (दिल्ली) हांकाय हो पुरस्कार फावो जाला.
सोमा गंवस हे तामिळनाडूंतल्या भारतीय हातमाग तंत्रज्ञान संस्थेची हातमाग तंत्रज्ञान पदवी मेळोवपी पयले गोंयकार आसात. तांणी 1983 तें 2016 मेरेन हातमाग तंत्रीक सहाय्यक म्हणून काम केलें. ते उपरांत 2019 मेरेन ते गोंयच्या हस्तकला आनी काथ्या खात्यांक काम करताले. गोंयची फामाद कुणबी साडी विणून तयार केल्ली. गोंयचो फामाद फॅशन डिझायनर ख्रि. वेंडल रॉड्रिग्ज हांणी तांच्या मार्गदर्शना खाला कुणबी साडीचेर संशोधन केल्लें. गोंयच्या गृहविज्ञान म्हाविद्यालयांत वस्त्रोद्देग विभागांत निमंत्रीत वक्ते म्हणून तांणी काम केल्लें. हातमाग कार्यशाळा सुरू करपाक ताचें मोलाचें योगदान आशिल्लें.
गंवस हांणी फुडाकार घेवन तामिळनाडू, केरळ आनी कर्नाटकांतल्या हातमाग तंत्रगिन्यान संस्थांनी गोंयच्या विद्यार्थ्यांक पुरस्कृत करून उपरांत तांका बरी नोकरी मेळोवन दिल्ली. कोणे कारागिरां खातीर कोणे फोडणी आनी बेत काडणी यंत्र तयार करून तांणी तें हस्तकला वस्त्रोद्देग खात्याक दिल्लें. सद्या ते कुणबी साडी विणपा खातीर एक खासा हातमाग आनी पायपुसणी विणकारी खातीर सुटसुटीत उपकरण करपाचें संशोधन करतात. ते एक किर्तनकार लेगीत आसात आनी गोंयच्या हरिभर्त परिशदेचे ते संचीव म्हणून सध्या काम पळयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
