भांगरभूंय | प्रतिनिधी
म्हापशेंः काल सोमार अपघातांचो घातवार थारलो. एकाच दिसा अपघातांत तिगांक मरण येवपाची घटडणूक घडली. बस्तोड्यां स्वयंअपघातांत 21 वर्सा पिरायेच्या तरणाट्याक मरण येवपाची घडणूक घडली. जाल्यार कासावले रस्त्या कुशीच्यान चलून वतना दुचाकीन फाटल्यान धपको दिल्ल्यान जखमी जाल्ले बायलेक उपचारा मजगतीं मरण आयलें. हातूंत आनीक तिग जाण जखमी जाल्यात. आनीक एका अपघातांत वाघुरे-पिसुर्ल्यां शिंगणें हांगां दोन मोटारसायकलींच्या धपक्यांत शांतीनगर पिसुर्लेंच्या 70 वर्सां पिरायेच्या महादेव दत्ता गावडे ह्या (पायलट) जाण्टेल्याक मरण आयलें.
मजगतीं, सांताक्रूज बस्तोड्यां स्वयं अपघातांत जखमी जाल्लो साईराज नंदकिशोर मोरसकार (21, म्हापशें, करासवाडो) ह्या दुचाकी चालकाक उपचारा मजगतीं मरण आयलें.
हो अपघात सोमारा 19 तारखेक दनपरां 1.20 वराच्या सुमाराक सांताक्रूज बस्तोड्यां कपेला लागसार घडिल्लो. उसकयच्यान नेटान येवपी मोटारसायकली वयलें चालकाचें नियंत्रण सुटिल्ल्यान दुचाकीन रस्त्याच्या कुशीक गटारा वयल्या काँक्रीट लादयेक नेटाचो धपको दिलो.
ताका लागून दुचाकी सयत चालक उसळून रस्त्याचेर पडलो आनी तो 10 ते 15 मिटर घस्टत गेलो. ह्या अपघातांत ताचे तकलेक गंभीर मार बसलो.
ताका बेगोबेग अॅम्बुलन्सींतल्यान म्हापशें जिल्हो हॉस्पिटलांत उपचारा खातीर दाखल केलो. थंय मुळावे उपचार केले उपरांत फुडल्या उपचारा खातीर ताका बांबोळे गोमॅकाँत दाखल केलो. थंय उपचार चालू आसतना ताका मरण आयलें.
अपघाताची म्हायती मेळटकूच म्हापशें पुलीस उपनिरिक्षक अजय गांवकार आनी हवालदार शिवाजी शेटकार हांणी घडणूक सुवातेर धांव घेवन पंचनामो केलो. फुडलो तपास पुलीस करतात.
मजगतीं, सांग्यार मोटार आनी दुचाकी अपघात घडलो. सांग्यार सध्या पुरुमेताचे फेस्त चालू आसा. थंय फेस्ताची गर्दी आशिल्ल्यान मोटार चालकाचें मोटारी वयलें नियंत्रण सुटिल्ल्यान तिणें दुचाकीक धपको दिलो. हातूंत कोणाकूच दुखापत जावंक ना. पूण दुचाकीचें लुकसाण जालां.
मजगती, आनीक एका अपघातांत पिसुर्ले पंचायत वाठारांतल्या वाघुरे-पिसुर्ल्यां शिंगणें हांगा रस्त्यार एकामुखार जाल्ल्या दुचाकी अपघातांत शांतीनगर पिसुर्लेंच्या 70 वर्सां पिरायेच्या महादेव दत्ता गावडे ह्या जाण्टेल्याक मरण आयलें. जाल्यार 20 वर्सां पिरायेचो तरणाटो कृष्णा संजय वायंगणकार (अडवय- पेडाणी) गंभीर जखमी जाला. तांकां उपचारा खातीर सांखळे सरकारी सामाजीक हॉस्पिटलांत दाखल केला. सांजवेळा 5 वरांच्या सुमाराक हो अपघात जालो.
मेळिल्ले म्हायती प्रमाण, शांतीनगर पिसुर्ल्यां महादेव दत्ता गावडे फाटल्या कांय वर्सां सावन खाजगी मोटारसायकली भाडें मारतालो. सांजवेळा 4 वरांच्या सुमाराक तो एका मनशाक शिंगणें सत्तरींत व्हरपाक गेल्लो. ताका सोडून पिसुर्ले परततना शिंगणें हांगा उरफाटे दिकेन येवपी जीए 04 आर 8631 मोटारसायकलीक मुखार धपको दिलो. ह्या वेळार दोनूय वाहन चालक गाडये वयले नियंत्रण सुटून रस्त्यार पडले. महादेव गावडेचे हाचे तकलेक गंभीर जखम जाल्ल्यान तांकां 108 सेवे वरवीं उपचारा खातीर सांखळे समाजीक हॉस्पिटलांत दाखल केलो. थंय उपचारा आदींच ताका मरण अायलें अशें दोतोरानी सांगलें.
वाळपय पुलिसांनी हे घडणुकेची चवकशी करून कूड पोस्टमार्टमा खातीर गोंय वैजकी म्हाविद्यालयांत धाडल्या. कृष्णा संजय वायंगणकार हाका उपचारा खातीर सांखळे सरकारी समाजीक हॉस्पिटलांत दाखल केला. नागरिका कडल्यान मेळिल्ले म्हायती प्रमाण ताच्या पांयाक जखम जाल्या.
ह्या प्रकरणाची फुडली चवकशी वाळपय पुलीस स्टेशनाचे पुलीस उपनिरिक्षक प्रथमेश गांवस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
