भांगरभूंय | प्रतिनिधी
घरांचें आनी वीज वाहिन्यांचें व्हड प्रमाणांत लुकसाण
वाळपय: सोमारा रातीं सत्तरी म्हालांतल्या खूबशा वाठारांनी वादळी वारें जावन सैमीक संपत्तीचें लुकसाण जालें. घरांचेर, रस्त्यांचेर झाडां पडलीं. उजो पालोवपी दळाच्या जवानांनी दिल्ले म्हायती प्रमाण वट्ट दोन घरांचेर झाडां पडिल्ल्यान घरांचें लुकसाण जालें. जाल्यार हेर कडेन वीज वाहिन्यांचेर झाड पडिल्ल्यान वीज वाहिन्यांचें लुकसाण जालें. हाका लागून खूबशा गांवांतली वीज पुरवण खंडीत जाल्ली. रातीं उसरां मेरेन वीज पुरवण सुरळीत जाल्ल्याची म्हायती मेळ्ळ्या.
वाळपय उजो पालोवपी दळाच्या गोपां कडल्यान मेळिल्ले म्हायती प्रमाण केरी घोटेली 2 हांगा रस्त्यार रानवटी झाड पडिल्ल्यान रस्तो येरादारी खातीर बंद जालो. दळाचे जवान कृष्णा नायक हांच्या मार्गदर्शना खाला हें झाड कुशीक काडलें.
केरू आजोबा नगर मुस्लीमवाड्यार एका घराचेर आंब्याचें झाड पडिल्ल्यान घराचें लुकसाण जालें. हें लुकसाण अदमाशेक 50 हजारांचे आशिल्ल्याचें तांणी सांगलें. घराच्या पाख्याची लुकसाणी जाल्ल्याचें दळाच्या गोपांनी सांगलें.
केरी घोटेली हांगा पणसाचें झाड वीज वाहिन्यांचेर पडिल्ल्यान वीज वाहिन्यो तुटल्यो. हाचो परिणाम वीज पुरवण खंडीत जाली. ही घडणूक रातच्या आठ वरांच्या सुमाराक घडली. कृष्णा नायक हांच्या फुडारपणा खाला हें झाड कुशीक काडलें.
ठाणें ग्रामपंचायत वाठारांत नानेली हांगा रस्त्यार झाड पडिल्ल्यान येरादारी ठप्प जाली. रातीं उसरां झाड काडले उपरांत येरादारी परतून सुरू जाल्ल्याचें सांगलें.
केरी आजोबा देवळाचे कुशीक एका घराचेर आंब्याचें झाड पडिल्ल्यान सुमार एक लाख रुपयांचें लुकसाण जाल्ल्याची म्हायती दिली. ही घडणूक रातच्या आठ वरांच्या सुमाराक घडली. घराचेर पडिल्लें झाड वाळपय उजो पालोवपी दळाच्या जवानांनी कुशीक काडलें. तशेंच केरी घोटेली 2 हांगा घराचेर माड पडिल्ल्यान घराचें लुकसाण जालें.
सालेली सत्तरे आंब्याचें झाड रस्त्यार पडिल्ल्यान येरादारीक आडखळ आयली. ज्ञानेश्वर गांवस हांच्या फुडारपणा खाला हें झाड कुशीक काडलें उपरांत येरादारी सुरळीत जाली.
खूबशे कडेन निर्माण जाल्ल्यो आडखळी उजो पालोवपी दळाचे जवान कृष्णा नायक, महादेव गावडे, आनंद शेटकार, प्रदीप गांवकार, कृष्णा नायक, न्यानेश्वर गांवस हांणी म्हत्वाचें योगदान दिवन पयस केल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
