भांगरभूंय | प्रतिनिधी
पणजी: पोरणें गोंया कदंब बायपासार सोमारा रातीं उसरां इको व्हॅन आनी हिरो शायन दुचाकी मदीं भिरांकूळ अपघात जाल्लो. ह्या अपघातांत दुचाकी फाटल्यान बशिल्ली मालतीदेवी चौहान (51, खांडोळें, मूळ उत्तर प्रदेश) हिका बांबोळे गोंय वैजकी म्हाविद्यालय हॉस्पिटलांत उपचार घेतना मरण आयलें. ह्या प्रकरणांत पोरणें गोंय पुलिसांनी इको व्हॅन चालक पंकज इक्का (डोंगरी, मूळ छत्तीसगड) हाचे आड गुन्यांव दाखल करून कारवाय केल्या.
पोरणें गोंय पुलिसांनी दिल्ले म्हायती प्रमाण पोरणें गोंया कदंब बायपासार सोमारा रातीं उसरां इको व्हॅन आनी हिरो शायन दुचाकी पणजे सावन पोरणें गोंयचे दिकेन वताली. ह्याच वेळार चालकाचो इको व्हॅनी वेलो ताबो सुटलो आनी ताणें मुखा वेल्यान वचपी दुचाकीक नेटाचो धपको दिलो. उपरांत व्हॅनीन तीन फावटी लागमाडी मारली.
मजगतीं, दुचाकीचे फाटल्यान बशिल्ली मालतीदेवी चौहान ही बायल गंभीर जखमी जाली जाल्यार दुचाकी चलोवपी तिचो पूत जखमी जालो. ह्या अपघातांत व्हॅन चालकूय जखमी जालो. अपघाता उपरांत बायलेक बांबोळे दाखल केली. पूण थंय उपचार सुरू आसतनाच तिका मरण आयलें.
अपघाताची म्हायती मेळटकच पोरणें गोंय पुलीस निरिक्षक गौरेश मळीक हांच्या मार्गदर्शना खाला हवालदार दिनेश मुळगांवकार हांणी अपघाताचो पंचनामो केलो. जाल्यार उपनिरिक्षक दत्तराज गावडे हांणी इको व्हॅनीचो चालक पंकज इक्का हाचे आड गुन्यांव दाखल करून कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
