सोमारच्यान रो- रो फेरी सुरु

भांगरभूंय | प्रतिनिधी

मंत्री सुभाष फळदेसाय हांणी दिली म्हायती

भांगरभूंय । प्रतिनिधी
पणजीः रायबंदर-चोडण मार्गार रो- रो फेरी सुरु करपा खातीर निमाणो उक्तावणाचो म्हुर्त मेळ्ळो. सोमारा, 14 तारखेर उक्तावण जावन ती प्रवाशां खातीर उक्ती जातली. एके फेरीबोटींत 15 मोटारी, 40 स्कुटरी आनी 100 प्रवाशी वांगडा घेवन वचपाची तांक आसा. प्रवाश्यांक 12 मिण्टां परस चड वेळ वाट पळोवची पडची ना अशें न्हंय येरादारी मंत्री सुभाष फळदेसाय हांणी सांगलें.
ह्या मार्गार दोन रो- रो फेरी चलतल्यो. कितलेशेंच दीस जाले हाच्यो चाचण्यो सुरू आशिल्यो. शेनवारा हे फेरीची निमाणी चांचणी जाली. ह्या वेळार मंत्री फळदेसाय, न्हंय येरादारी संचालक विक्रमसिंह राजे भोसले आनी ही फेरी बोट बांदपी विजय मरीन सर्विसाचे अधिकारी हाजीर आशिल्ले.
रायबंदर- चोडण मार्गार द्वारका आनी गंगोत्री ह्यो दोन रो- रो फेरी धांवतल्यो. प्रत्येकाची क्षमता चार फेरीबोटीं इतली आसा. ही फेरी रायबंदर ते चोडण हें अंतर सात ते आठ मिण्टा भितर पुराय करतले. देखून फेरी बोटीची वाट पळोवपाचो आनी तातूंत प्रवास करपाचो वेळ 12 मिण्टां परस चड आसचो ना, अशें फळदेसाय हांणी सांगलें.
मोटारी आनी स्कुटरींच्या सुवाती खातीर मार्किंग करुन दवरलां. फेरीबोटीच्या दोनूय वटेन मोटारी उबे करतले जाल्यार मदीं स्कुटरीं उब्यो करतले. ह्यो सगळ्यो गाडयो एकवटेन भितर सरून दुसरे वटेन एकाच वांगडा भायर सरतल्यो अशें फळदेसाय हांणी म्हणले.
जेन्ना आमी अत्याधुनिक फेरी घालपाक वता तेन्ना न्हंय येरादारी खात्याचो महसूल चड नाशिल्ले कारणान अर्थीक खात्या कडल्यान आडखळी तयार जातात. देखून सुरवेक आमी प्रवाशांक आनी उपरांत स्कुटरींक शुल्क लावपाचो विचार केल्लो. पूण आमी प्रवाशांक आनी स्कुटरींक फुकट प्रवास दवरून मोटारीं खातीर रु. 600 म्हयन्याचो पास दिवपाचो थारयलो. पास ना जाल्यार मोटारींक दर दिसा रु. 30 भरचे पडटले. ह्या दराचेर एका म्हयन्या उपरांत नियाळ घेतले, अशी म्हायती फळदेसाय हांणी दिली.
स्कुटर घेवन प्रवास करपी लोकांनी पांच रुपया शुल्क दिवपाचेर विचार करचो, जाका लागून येणावळ मेळटली आनी आमी बरी सेवा दिवपाचेर भर दितले. जर दर स्कुटरी फाटल्यान आमी पांच रुपया लायलें जाल्यार वर्सांक आमकां चार फेरी घेवप शक्य जातलें. सगळ्या रुटातल्यांन खात्याक 60 लाख इतली वर्सुकी येणावळ येता आनी आमचो खर्च 70 कोटी इतलो आसा. अर्थीक नदरेन हो आंकडो कसोच जुळना, अशी खंत फळदेसाय हांणी उक्तायली.

हेर मार्गार येतलो रो – रो
रो – रो फेरीची मागणी करपी पत्र दिवाडी आनी बेती पंचायतीन न्हंय येरादारी खात्याक बरयलां. प्रवाशांक तिकेट लावपाक आमकां कसलीच हरकत ना, पूण सुरक्षा आनी सुविधा आशिल्ली आमकां रो रो फेरी जाय, अशें पंचायतीन सांगलां. जर ही फेरी येसस्वी जाली जाल्यार म्हयन्या भितर आमी हाचो नियाळ घेवन दुसऱ्या मार्गार ती घालपाचो विचार करतलें, अशें मंत्री फळेदसाय हांणी सांगलें.

फेरी बिल्ट अॅण्ड ऑपरेट तत्वाचेर
ही फेरी बांदपा खातीर सरकारान एक रुपया पसून खर्च करूंक ना. ही फेरी बिल्ट अॅण्ड ऑपरेट तत्वाचेर कार्यरत जातली. विजय मरीन सर्विसेस हांणी ती बांदल्या आनी तेच ह्यो फेरी चलयतले. ह्या मार्गार स फेरी चलोवपाक खर्च येतालो तितलोच आमी विजय मरीनांक दितले. फेरीचें वेवस्थापन आनी देखरेख विजय मरीन करतलें. ही पुराय गोंयची कंपनी जावन आसा आनी ह्यो फेरी ‘मेड इन गोवा’ आसा, अशें फळदेसाय हांणी सांगलें.

स्कुल बसी- व्हॅनींक सुट दिवपाचेर विचार
शाळेच्या भुरग्यांक व्हरपी बसी वा व्हॅन आसतल्यो तांचे खातीर शुल्कात सुट दिवपाचो विचार आमी करतले. आमी सरकारा वांगडा बसून हे विशींचो नियाळ घेतले. संबंदीत शाळा वा महाविद्यालयांनी तांकां प्रमाणपत्र दिलां ताचेर सुट दिवन विद्यार्थ्यां खातीर फेरीचे दर कमी करतले, अशी म्हायतीय तांणी दिली.