भांगरभूंय | प्रतिनिधी
पणजी : दिगंबर कामत आनी रमेश तवडकार हांच्या सोपूत विधी सुवाळ्याक मायकल लोबो, डिलायला लोबो आनी गोविंद गावडे हे तीन आमदार गैरहाजीर आशिल्ले. हेर मंत्री, आमदार, पक्षाचे पदाधिकारी, सरकारी अधिकारी आनी कार्यकर्ते हांकां लागून दरबार हॉलांत गर्दी जाल्ली. ह्या तीन आमदारांचें मात दर्शन जालें ना.
हांव एके कार्यावळीक लागून महाराष्ट्रांत गेल्लो. दनपरां गोंयांत पावलां. दिगंबर कामत आनी रमेश तवडकार हांकां परबीं दिवपी संदेश हांवें धाडला. दोगांकूय हांव परबीं दितां, अशें आमदार मायकल लोबो हांणी सांगलें. शिवोले मतदारसंघांत एके कार्यावळीक लागून आमदार डिलायला लोबो सोपूत विधी हाजीर रावंक शकली ना, अशी म्हायतीय तांणी दिली.
सोपूत विधी सुवाळ्याचे सगले मंत्री, आमदार, वरीश्ठ सरकारी अधिकारी हांकां निमंत्रण आशिल्लें. मुरगांवचे आमदार संकल्प आमोणकार हांचें उसरां दरबार हॉलांत दर्शन जालें. कार्यकर्त्यांनी बरीच गर्दी केल्ली.
फाटलो खूब तेंप मंत्रीमंडळ फेरबदलाची चर्चा चलताली. मायकल लोबो, डिलायला लोबो तशेंच संकल्प आमोणकार हांकां मंत्रीपद मेळटलें, अशी चर्चा आशिल्ली. अधिवेशना पयलीं मायकल लोबो हांणी दिल्ली वचून केंद्रीय गृहमंत्री अमीत शहा हांची लेगीत भेट घेतिल्ली. गैरहाजेरी फाटल्यान नाराजी आशिल्ल्याची चर्चा आसा. गोविंद गावडे हांचें मंत्रीपद गेल्ल्यान रमेश तवडकार हांकां मंत्रीपदाची संद मेळ्ळी. मंत्रीपद गेल्या उपरांत कार्यकर्त्यांची सभा घेवन गावडे हांणी आपली नाराजी जाहीरपणान उक्तायल्ली. पणजी भाजपा मंडळाची महालक्ष्मी मंदिरांत सत्यनारायण पुजा आशिल्ल्यान मंत्री बाबूश मोन्सेरात सोपूत विधी सुवाळ्याक पावूंक नात. आमदार जेनिफर मोन्सेरात आनी महापौर रोहीत मोन्सेरात हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
