भांगरभूंय | प्रतिनिधी
-जायते जाण बाशींग बांदून तयार, फरक पडना : श्रीपाद नायक
पक्ष म्हणटा, संसदीय मंडळ घेतले निर्णय
पणजी : लोकसभा वेंचणुकेची सेमीफायनल आशिल्ल्या विधानसभा वेंचणुकांचो निकाल जाहीर जाल्ल्यान आतां लोकसभेच्या उमेदवारीचेर चर्चा सुरू जाल्या. श्रीपाद भाऊ आतां जाण्टो जाला. ताणें विसव घेवचो आनी नव्या कार्यकर्त्यांक उमेदवारीची संद दिवची. हांव लोकसभा वेंचणूक लडोवपाक तयार आसा, अशें सांगून दयानंद सोपटे हांणी उमेदवारीचेर दावो केल्ल्यान भाऊंच्या उमेदवारीक एक प्रकारचें आव्हान तयार जालां. सेगीत पाच खेपे वेंचून आयिल्ल्या श्रीपाद नायक हांका परतून उमेदवारी दिवची काय दुसऱ्याक संद दिवची, असो पेच पक्षा मुखार निर्माण जाला.
कोणे उमेदवारीचेर दावो केलो, तरी आपणाक फरक पडना. उमेदवारीचो निर्णय पक्ष घेतलो, अशें केंद्रीय मंत्री श्रीपाद नायक हांणी स्पश्ट केलां. भारतीय जनता पक्षात उमेदवारीचो निर्णय संसदीय मंडळ घेता. उमेदवारीचेर अजून निर्णय जावंक ना, अशें प्रदेश भाजप अध्यक्ष सदानंद शेट तानावडे हांणी स्पश्ट केलां.
मध्य प्रदेश, राजस्थान, छत्तीसगड, तेलंगण आनी मिझोराम ह्या पाच राज्यांतल्या विधानसभा वेंचणुकांचे निकाल जाहीर जाल्यात. विधानसभा वेंचणुकेंत भाजपाक व्हड येस मेळिल्ल्यान पक्षाचो आत्मविस्वास वाडला. सोमारा सावन संसदेचें अधिवेशन सुरू जाल्ल्यान केंद्रीय मंत्री श्रीपाद नायक, राज्यसभा खासदार सदानंद शेट तानावडे हे सध्या दिल्लींत आसात. लोकसभा वेंचणुकेंत पक्षाक 400 परस चड सुवातो मेळटल्यो. गोंयच्यो दोनूय सुवातो भाजप जिखतलो, असो विस्वास मुख्यमंत्री डॉ. प्रमोद सावंत हांणी उक्तायला.
सत्ताधारी भारतीय जनता पक्षान लेगीत उमेदवारांची चांचपणी सुरू केल्या. हे फाटभुंयेर आदले आमदार दयानंद सोपटे हांणी उत्तर गोंयातल्या उमेदवारीचेर दावो केला. श्रीपादभाऊ हे आतां जाण्टे जाल्यात, तांणी विसव घेवचो आनी नव्या कार्यकर्त्यांक संद दिवची, अशें आवाहन तांणी केला. लोकसभा वेंचणूक लडोवपाची तयारी तांणी उक्तायल्या. आदले मंत्री दिलीप परूळेकार हे लेगीत लोकसभा वेंचणूक लडोवपाक इत्सूक आसात. हाका लागून दिसान दीस उत्तर गोंयांतल्या इत्सूक उमेदवारांचो आंकडो वाडत आसा.
केंद्रीय मंत्री श्रीपाद नायक हे 1999 सावन सेगीत लोकसभा वेंचणूक जिखत आयल्यात. 1999, 2004, 2009, 2014, 2019 अशें पांच खेपे ते जैतिवंत जाल्यात. उत्तर गोंयांत आतां बदल जाय, अशी चर्चा पक्षांत तशेंच लोकां मदीं सुरू आसा. कांय आमदार तशेंच मंत्री लेगीत उमेदवार बदलपाच्या मताक अनुकूल आसात. हाका लागून पक्षांत नवो पेंच निर्माण जाला. पयलीं लोकसभा वेंचणूक लडोवपाक प्रदेश अध्यक्ष सदानंद शेट तानावडे इत्सूक आशिल्ले. ते राज्यसभेर गेल्ल्यान तांच्या नांवाचो विचार जाव शकना. तरी लेगीत दयानंद सोपटे, दिलीप परूळेकार हे आदले आमदार इत्सूक आशिल्ल्याचे कळटा.
2009 आनी 2019 वर्सा श्रीपाद नायक हांचे मताधिक्य उणें आशिल्ले. हेर लोकसभा वेंचणुकेंत ते व्हड मताधिक्यान जैतिवंत जाल्यात.
श्रीपादभाऊन आतां विसव घेवचो : दयानंद सोपटे
श्रीपादभऊ बरीच वर्सां राजकारणांत आसात. फाटलीं वीस वर्सां तो खासदार आसात. भाऊ आतां जाण्टो जाला. ताणें विसव घेवचो आनी तरणाट्याक संद दिवची, अशें दयानंद सोपटे हांणी म्हणलां. पक्षान उमेदवारी दिल्यार लोकसभा वेंचणूक लडोवपाची आपली तयारी आसा, अशेंय तांणी सांगलें.
पक्षान जी जापसालदारी दिल्या, ती आयज मेरेन हांवे पार पाडल्या. हाचे फुडें लेगीत पक्ष दिता ती जापसालदारकी हांव सांबाळटलो, अशें तांणी सांगलें.
उमेदवारीचेर दावो करपाचो कोणाकूय अधिकारः श्रीपाद
तुळशीचें लग्न जालां. हाका लागून आतां जायते जाण गुडघ्याक बाशींग बांदून तयार रावल्यात. पूण अापणाक फरक पडना. उमेदवारी कोणाक दिवची, हाचो निर्णय पक्ष घेतलो. उमेदवारीचेर दावो करपाचो कोणाकूय अधिकार आसा, अशें केंद्रीय मंत्री श्रीपाद नायक हांणी म्हणलें. हांव जाण्टो जाला कांय ना, हे लोकांक खबर आसा. लोकांनी म्हजो वावर पळयला, अशें तांणी सांगलें.
उमेदवार संसदीय मंडळ थारायता: तानावडे
कोणेय उमेदवारीचेर दावो केलो, तरी ताका कांयच अर्थ नासता. भारतीय जनता पक्षात संसदीय मंडळ उमेदवार थारायता. उमेदवार थारावपाची प्रक्रिया आसता. हे प्रक्रिये प्रमाण उमेदवार थारतले, अशें प्रदेश भाजप अध्यक्ष सदानंद शेट तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
