भांगरभूंय | प्रतिनिधी
भांगरभूंय । प्रतिनिधी
पणजीः भाजापी फुडारी सोनाली फोगोटाक घुंवळी वखदां दिवंन मारून उडोवपाच्या प्रकरणांत हणजूण पुलिसांनी तिचो वांगडी सुधीर पाल सांघवा आनी सुखविंदर सिंग हाचे सयत कर्लिस क्लबाचो एडवीन नुनीस, दत्तप्रसाद गांवकार, रामदास मांद्रेकार आनी गौरेष गोवेकार हांचे आड पणजेच्या उत्तर गोंय जिल्हो आनी सत्र न्यायालयांत 500 परस चड पानांचें आरोपपत्र सादर केलां. पुलिसांनी 25 जाणांक साक्षिदार म्हणून उबें करपाचें थारायलां. ह्या प्रकरणाची सुनावणी 10 एप्रिलाक दवोरल्या.
सोनाली सुधीर पाल आनी सुखविंदर सिंह हांच्या वांगडा 22 ऑगस्ट 2022 दिसा गोंयांत येवंन हणजुणच्या ग्रँड लिओनी हॉटेलांत रावल्लीं. 23 ऑगस्टाक सोनालीक मरण आयिल्लें. तिगेल्या घरच्यांनी मरणा विशीं दुबाव उक्तायल्यान हणजूण पुलिसांनी खूनाचो गुन्यांव नोंद केल्लो. उपरांत सांधवा आनी सिंग हांका अटक केल्ली. पुलिसांनी केल्ले चवकशेंत आनी वैजकी तपासणेत घुंवळी वखदां चड प्रमाणांत घेतल्ल्यान सोनालीक मरण आयिल्लें अशें स्पश्ट जाल्लें. दत्तप्रसाद गांवकारा कडल्यान घुंवळी वखदां घेतिल्ली तशेच 12 हजार रुपया मोलाचें मेथाफेटामायन घेतिल्ले. घुंवळी वखदां घेवंन रातयां कर्लिस क्लबात गेल्ले कडेन सोनालीची भलायकी इबाडली उपरांत तिका मरण आयले.
सोनाली आनी तिगेल्या वांगड्याक घुंवळी वखदांची पुरवण केल्ले खातीर दत्तप्रसाद गांवकार, रामा मांद्रेकार आनी ए़डवीन नुनीसाक घुंवळी वखदां प्रतिबंदक कायद्या खाला अटक केल्ली. सांधवा आनी सिंग सोडून हेर दुबावितांक न्यायालयान सशर्त जामीन दिल्लो. उपरांत पुलिसांनी घुंवळी वखदांची पुरवण केल्ले खातीर गौरेष गोवेकाराक अटक करचे पयलीं तो फरार जालो. सांधवा हाणे न्यायालयांत जामिना खातीर जाल्यार गौरेष गोवेकारान अटकपूर्व जामिना खातीर अर्ज केला. ताचेर 10 एप्रिलाक सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
