भांगरभूंय | प्रतिनिधी
मडगांव : सोनारवाडो- सांतीमळार बिराडाक रावपी खगेश्वर साबर (४०, रा. ओडिशा) ह्या कामगाराचो खून जाल्ल्याची भिरांकूळ घडणूक घडली. मायणा कुडटरी पुलीस घडणुके सुवातेर दाखल जावन चवकशी सुरू केल्या. कुडींत रावपी एका वांगड्याक ताब्यांत घेतलां. हेर दोग फरारी जाल्ल्यान तांचो सोद घेवप चालू आसा.
हातांत आयिल्ले म्हायती प्रमाण, गोल्डन हावजाचे चाळींत एकेच कुडींत चार कामगार रावताले. हांतल्या खगेश्वर साबर हाचे तकलेर दांडो वा घट्ट वस्तून प्रहार करून खून केलो. रक्त व्हावून ताका मरण आयिल्ल्याची म्हायती पुलिसांनी दिली.
श्वान पंगड घडणुके सुवातेर
पुलिसांनी फॉरेन्सीक तज्ञ आनी श्वान पंगडाक घडणुके सुवातेर व्हरून पुरावे एकठांय केल्यात. पुलीस घडणुके सुवातेर हाताचे ठशे आनी हेर पुरावे तपासतात. ह्या खुनाच्या प्रकरणाचो तपास मायणा कुडतरी पुलीस निरीक्षक अरुण गांवस देसाय हांच्या मार्गदर्शना खाला सुरु आसा. फरारी जाल्ल्या दोगांचो सोद घेवपा खातीर विशेश पंगड तयार केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
