सोनसड्यार मिश्र कोयराचेर माती उडोवपाचें काम सुरूच

भांगरभूंय | प्रतिनिधी

मडगांव: सोनसड्यार कोयर यार्डांत कांय दिसां पयलीं पळोवणी करून गोंय प्रदुशण नियंत्रण मंडळान पालिकेक नोटीस धाडिल्ली. उपरांत मार्केटांतल्या ओल्या कोयरा सयत मिश्र कोयर सोनसड्यार उडोवन ताचेर माती घालपाचें काम सुरू आसा. हे विशीं प्रदुशण नियंत्रण मंडळ आनी सरकारान खर भुमिका घेवची अशी मागणी शॅडो कावन्सिलाचे संयोजक सावियो कुतिन्हो हांणी केल्या.

मडगांव पालिकेन सोनसड्यार कोयर यार्डांत सुमार 20 टन वर्गीकरण करूंक नाशिल्लो आनी सॅनिटरी पॅड आनी हेर मिश्र घनकोयर उडयला आनी उपरांत ह्या कोयराचेर मातयेचो भराव घालताले. हे विशीं गोंय राज्य प्रदुशण नियंत्रण मंडळान हालींच केल्ले तपासणी उपरांत कारणां दाखय नोटीस धाडिल्ली.

सोनसड्यार कोयर यार्डांत मिश्र कोयर उडोवन ताचेर मातयेचो भाराव घालपाचो प्रकार उक्तडार आयला. उपरांत गोंय राज्य प्रदुशण नियंत्रण मंडळान पळोवणी केल्ली. आतां पर्यावरण संरक्षण कायद्या खाला कारवाय कित्याक करची न्हय हे विशीं स्पश्टीकरण दिवचें अशी नोटीस मंडळान मडगांव पालिका मुख्याधिकाऱ्याक धाडल्या. पालिके कडल्यान जर समाधानकारक जाप मेळ्ळी ना जाल्यार मंडळ फुडली कसलीच सुचोवणी दिनासतना, पर्यावरण (संरक्षण) कायदो, 1986 खाला कायदेशीर कारवाय करतलें अशें प्रदुशण नियंत्रण मंडळाचे अध्यक्ष लेविन्सन मार्टिन्स हांणी नोटिशेंत नमूद केल्लें. तशेंच सोनसडो कोयर यार्डांत उडयिल्लो कोयर तत्काळ वेगळो करून उडोवप आनी ताची वैज्ञानीक पद्दतीन विलो लावपाचे निदेश दिल्ले.

पूण ताचे उपरांतूय मडगांव पालिका प्रशासनाकडल्यान कोयर उडोवन ताचेर माती घालपाचें प्रकार सुरूच दवरिल्ले. शॅडो कॉवन्सिलाचे संयोजक सावियो कुतिन्हो हांणी सांगलें की, मडगांव पालिका सोनसड्या वेलें काम गुपीत दवरता. सोनसडो यार्डाचेर गेट उबारून कोणाकूच भितर प्रवेश दिवचो न्हय अशी सुचोवणी सुरक्षा रक्षकांक दिल्या. गोंय प्रदुशण नियंत्रण मंडळान नोटीस दिले उपरांतूय पालिके कडल्यान कार्यपद्दतींत बदल करिनासतना ओलो कोयर आनी मिश्र कोयर उडोवन ताचेर मातयेचो भराव घालपाचो प्रकार सुरूच आसा.

प्रदुशण नियंत्रण मंडळान हाचे पयलीं मडगांव पालिकेक 1.02 कोटींचो दंड दिल्लो. पूण उपरांत कांयच जावंक नाशिल्लें. ताका लागून प्रदुशण नियंत्रण मंडळाचे नोटिशेक पालिका आडनदर करीत आशिल्ल्याचें दाखोवन दिवन मिश्र कोयराचेर माती घालून विलो लावपाचे प्रकार सुरू आसा. ताका लागून गोंय प्रदुशण नियंत्रण मंडळा सयत गोंय सरकारान पर्यावरणाचें लुकसाण आनी लोकांच्या भलायके विशीं जायत आशिल्ल्या ह्या चुकीच्या गजालींची गंभीरतायेन दखल घेवची अशी मागणी सावियो कुतिन्हो हांणी केल्या.

मजगतीं, पालिका मुख्याधिकारी मधू नार्वेंकार हांकां पालिकेक दिल्ले नोटिशे विशीं विचारलें तेन्ना, गोंय प्रदुशण नियंत्रण मंडळा कडल्यान सोनसड्या वेलो मिश्र कोयरा विशीं कारणां दाखय नोटीस आयल्या. ताका सोमारा मेरेन योग्य ती जाप दितले अशें तांणी स्पश्ट केलें.