भांगरभूंय | प्रतिनिधी
मडगांवः सोनसडो कोयर यार्डाचे शेडींत आयतारा मध्यानरातीं अडेजांक सुमार उजो लागलो. उजो पालोवपी दळान तो नियंत्रणांत हाडलो. हातूं बेलींग मशीन आनी वीज यंत्रणां हुलपलीं. मजगतीं, हो उजो लायिल्ल्याची शक्यताय नगरसेवक कामिल बार्रेटो हांणी उक्तायल्या. आतां न्यायालयाने सोनसडोवेले परिस्थितीची दखल घेवची, अशी मागणी शॅडो कौन्सिलान केल्या.
सोनसडो कोयर प्रकल्पांतल्या ओल्या कोयराचेर प्रक्रिया जायना, फकत सुको कोयर बेलींग करतात. ह्या कोयराक आयतारा उजो लागलो. कोयरा वांगडाच बेलींग मशीन, विजेचीं यंत्रणां आनी शेडीचेंय उज्याक लागून लुकसाण जालें. हातूंत पालिकेचें लाखांनी लुकसाण जालें.
ओल्या कोयरांत गॅस तयार जावन उजो लागपाची शक्यताय आसता. मात सुक्या कोयरांत अशी शक्यताय नासता. कोयराची रास उणी जावची म्हणून कुशीक केल्ल्या कोयराक कोणें तरी मुद्दम उजो लायिल्ल्याचें दिसता. हाची खोलायेन चवकशी जावची अशी मागणी नगरसेवक कामिल बार्रेटो हांणी केली.
अग्निशामक दलाचे अधिकारी गिल सुझा हांणी, सोनसडोवेल्या कोयर सांठयल्ले नवे शेडींत उजो लागलो. सांठयल्ल्या कोयरांत मिथेन वायू तयार जावन भितरल्यान उजो लागता. मात कुशीक केल्ल्या कोयराक उजो लागप, आनी तोय एकेच वटेन हें समजपा भायलें आसा. वेर्णें आनी मडगांवां अश्या दोन उजो पालोवपी दळाच्या गाडयांनी ४८ हजार लिटरां परस चड उदकाचो फवारो केलो. कोयर काडून भितरूय उदक मारपाची गरज तांणी उक्तायली.
सोनसडोवेल्या कोयराक उजो लागपाची घडणूक ही मडगांव पालिकेच्या नियोजन नाशिल्ल्या कामाचें उदाहरण. कोट्यांनी रुपया खर्च करुन हो प्रस्न सुटना. प्रभागांतूय जायते सुवातेर सुको कोयर जळयतासोनसड्यार प्रक्रिया जायना. तो काकोडा प्रकल्पांत धाडटात. सुक्या कोयरांतलो अर्दो कोयर सोनसडोत बेलिंगा खातीर दवरतात. चुकीचे म्हायतीच्या आदाराचेर न्यायालयाचीय दिकाभूल करतात. हाची दखल आतां न्यायालयान घेवपाची गरज आसा, अशी मागणी शॅडो कौन्सिल फॉर मडगांवचे संयोजक साविओ कुतिन्हो हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
