भांगरभूंय | प्रतिनिधी
मडगांव : सोनसडो यार्डांतल्या कोयराक उजो लागपाची घडणूक परत बिरेस्तारा घडली. हे विशीं मडगांव उजो पालोवपी दळाक म्हायती मेळटांच तांणी उज्याचेर उदक मारपाक सुरवात केली. हो उजो नेमको कसो लागलो हाचें नेमकें कारण आजून समजूंक शकलें ना. मात, तो कोयराचे वयले राशींत लागिल्ल्यान तो कोणें तरी लायिल्ल्याची शक्यताय चड आसा.
मडगांव उजो पालोवपी दळा कडल्यान मेळिल्ले म्हायती प्रमाण, सोनसडो यार्डांतले प्रकल्पाचे शेडी लागसारचीं तोडिल्ली झाडां, घरांतलें आदलें सामान आनी कोयराची आनीक रास आसा. हे राशीक उजो लागिल्ल्याची घडणूक घडली. हे विशींचे म्हायती उजो पालोवपी दळाक सुमार सकाळीं सुमार सव्वाचार वरांचेर मेळ्ळी. रोखडेच उजो पालोपी दळाचे जवान घडणुके सुवातेर पावले आनी उज्याचेर उदक मारून उजो पालोवपाचो यत्न केलो. मात उजो कोयराचे राशी पोंदाक मेरेन गेल्ल्यान ती पालोवपाक आडखळी आयल्यो.
उजो पालोवपी दळाचे अधिकारी हर्क्युलन गिल डिसुझा हांणी सांगलें, उजो लागिल्ल्याची म्हायती मेळटांच घडणुके सुवातेर येवन तो पालोवपाचें काम सुरू केलें. मात, उजो कोयराचे राशी पोंदाक मेरेन पाविल्ल्यान वारो लागताचो उजो परत पेट्टा. हाका लागून आतां पालिका प्रशासनाक सांगून जेसीबी वरवीं कोयर कुशीक करून उदक मारपाचें काम सुरू आसा. कुशीक मनोविकास शाळेच वणट आशिल्ल्यान ते सुवातेर वचपाक मेळना. तशेंच ३३ केव्ही उच्च दाबाच्यो लायटीच्यो सरयोय आशिल्ल्यान लायटीचो प्रवाह बंद केलो काय ना हें अधिकार्यांचें वेळार तपासप जावंक ना. आतां मेरेन २० हजार लिटर उदक मारलां, तशेंच सोनसडो हांगचो उदकाचो सांठोय सोंपपाक पावला. कोयरा पोंदा मेरेन उदक मारले बगर उज्याचेर नियंत्रण हाडप शक्य ना आनी तातुंतल्यान धुंवर येत रावतलो, अशें तांणी म्हणलें.
नोव्हेंबरांतूय लागिल्लो उजो
ह्यान पयलीं नोव्हेंबर म्हयन्याच्या निमाण्या सप्तकांत सोनसडो कोयर यार्डांत सांठोवन दवरिल्ल्या कोयराक उजो लागपाची घडणूक घडिल्ली. तेन्ना उजो लायिल्ल्याची शक्यताय नगरसेवक कामिलो बार्रेटो हांणी उक्तायल्ली. त्या उज्यांत दोन बेलिंग मशिनां आनी लायटिच्यो सरयो आनी हेर सामान हुलपल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
