भांगरभूंय | प्रतिनिधी
-ल्हान आनी मध्यम हॉटेल धनी संघटणेचो आरोपपणजीः गोंयांत सोंपेपणात मेळपी सोऱ्याक लागून गोंयची बदनामी जाल्या. दर्यादेगेर सोरो पियेवन किजीलां करपी पर्यटक आनी उपरांत दर्यादेगेर जावपी कोयराक लागून बरे पर्यटक गोंयात येनात. हे विशीं पर्यटन खात्यान पावलां उबारपाची मागणी अखील गोंय ल्हान- व्हड हॉटेलां आनी गेस्ट हावस धनी संघटणेन केल्या.
गोंयचे जावपी बदनामी विशीं अखील गोंय ल्हान आनी मध्यम गेस्ट हावस धनी संघटणेच्या वांगड्यांनी पर्यटक संचालक सुनिल अंचिपाका हांची भेट घेतली.
भेटी उपरांत उलयतना संघटणेचे उपाध्यक्ष डिक्सन वाझ हांणी सांगलें, पर्यटनाची केन्नाय उदरगत जावपाक शकता वा केन्नाय ते देंवपाक शकता. फाटल्या कांय म्हयन्यांत घडिल्ल्या वायट गजालींनी गोंयचें नांव आयलें. हे आमी मान्य करून संचालका कडेन खोलायेन चर्चा करून आमी कशे तरेन मजत करपाक शकतात, हे विशीं तांकां म्हायती दिली.
गेस्ट हावसाचे धनी पर्यटकांच्या थेट संपर्कांत आसतात. ते व्हडल्या हॉटेलांनी पर्यटक आपली प्रतिक्रीया बरयतात. हजारांनी पर्यटक आशिलल्यान तांचो धनयां कडेन संपर्क जायना. पूण गेस्ट हावस आनी होम स्टे धनयांक पर्यटक आपली प्रतिक्रिया सांगतात. तांणी आमचे कडे मांडिल्ल्यो प्रतिक्रियाची चर्चा आमी संचालकां कडेनर केली, अशे वाझ हांणी सांगलें.
गोंयांत चलपी स्कॅम आनी हेर गजालीं खातीर गोंयचें नांव बदनाम जाला. पूण जी बदनामी चल्ल्या तातूंतलें मुद्दे सगले फट आसतले, अशें न्हय. कांय मुद्दे खरें आसात. पूण कांय न्हयकारात्मक गजाली आसात त्यो बेगीन व्हायरल जातात, देखून आमी संचालका कडेन उलोवन गोंयच्या पर्यटनाची पुर्नबांदणी करपाक तयार आसात अशें तांचे म्हणणें आसा, अशें वाझ हांणी सांगलें.
सोंपेपणान मेळपी सोऱ्याक लागून गोंयचें नांव बदनाम जाला. कांय जाण दर्यादेगेर रातचे उसरां मेरेन सोरो पियेवन पार्ट्यो करतात आनी दर्यादेग घाण करून सोडटात. संवसारांत खंयसरूच कोणूच हिसपा भायर सोरो पियेवन पडना. सोरो पियेवन किजीलां करप, रातच्या उसरां मेरेन पार्ट्यो करप हाका लागून गोंयची बदनामी जाता, अशें मत वाझ हांणी उक्तायलें.
हॉटेलांचे मजतीन दर्यादेगेर पुलीस, सुरक्षा रक्षक दवरून जे पर्यटक सोऱ्याचो बाटल्यो हातांत घेवन दर्यादेगेर भोंवतात तांकां पयलीच आडायात. हातांत बाटल्यो आसपी पर्यटक हे दर्यादेगेर किजिलां करतात. पियेवन जातकच ते शॅकांनी वतात आनी थंय केस्तावां करतात. तांकां आडायल्ले जाल्यार नेम फाट्यार मारपी पर्यटक दर्यादेगेर वच्चे नात आनी पर्यटकय सुरक्षीत उरतले, अशें संघटणेचे अध्यक्ष संतोष हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
