सैम सांबाळून करमल रस्तो बांदचो

भांगरभूंय | प्रतिनिधी

गोंयकार संघटणाः 27 हजार झाडां मारचे परस भुंयार वा उड्डाण पुलाचो पर्याय आपणावचो

भांगरभूंय । प्रतिनिधी

काणकोणः करमल घांटांत येरादारेची कोंयडी जाता, हाची कल्पना आसा. करमल घांट रस्तो आसूं वा हेर कामां, खंयच्याच उदरगतीच्या कामांक आमचो विरोध ना. मात करमल घांटांत भुंयार खणून वा उड्डाण पूल बांदून येरादारीचो प्रस्न सोडोवचो, अशी आमची मागणी आसा. रस्तो रुंदीकरणा खातीर सुमार 60 मिटर रुंदायेच्या वाठारांतली सुमार 14 हजार न्हय जाल्यार 27 हजार झाडां मारचीं पडटलीं. ताका लागून पर्यावरणाचें व्हड प्रमाणांत लुकसाण जातलें. पर्यावरणाचें लुकसाण करिनासतना रस्तो बांदचो, अशी आमची मागणी आसा, अशें गोंयकार हे बिगर सरकारी संघटणेचे अध्यक्ष जॅक फर्नांडीस हांणी सांगलें.

पाळोळ्यां घेतिल्ले पत्रकार परिशदेंत फर्नांडीस उलयताले. ह्या वेळार गोंयकार संघटणेचे पदाधिकारी विकास भगत, उमेश तुबकी हाजीर आशिल्ले.

हे आदींय रान खात्याचे वरिश्ठ अधिकारी प्रेमकुमार हांची भेट घेवन तांकां करमल घांटांतल्या झाडांचें सर्व्हेक्षण करपाची मागणी केल्या. आयज आझुनीक यंत्रणे वरवीं दर्यांतल्यान लेगीत रस्तो करतात. भुंयार मारून रस्तो करप कठीण न्हय. ही प्रक्रिया खर्चीक आसली तरी सैमाचें लुकसाण करून उदरगत केली जाल्यार ती फुडले पिळगे खातीर मारक थारतली. आयद ग्लोबल वॉर्मिंगाक लागून कितलेशेच प्रस्न उप्रासल्यात. फुडले पिळगेचें सोडाच, पर्यावरणाचें लुकसाण केल्ल्यान ताचे वायट परिणाम आयजूच आमकां भोगचे पडटात, अशें फर्नांडीस हांणी सांगलें.

राष्ट्रीय म्हामार्ग 66 व्हायडक्ट करचो अशी मागणी गोवा फॉरवर्ड पक्षाचे फुडारी तशेंच आमदार विजय सरदेसाय हांणी केंद्रीय रस्तो आनी येरादारी मंत्री नितीन गडकरी हांचे कडेन केल्ले खातीर विकास भगत हांणी तांचे उपकार मानले.

‘काणकोणकारांक विस्वासांत घेवनूच रस्तो करचो’

करमल घांटांतलीं वोल्तां उणीं करपा खातीर वाकडें मोण्ण वाठारांत अज्ञातांनी झाडां मारिल्लीं. थंयच्या घातक रस्त्या संबंदान आमदार तशेंच सभापती रमेश तवडकार हांणी पावसाळ्या आदीं उपाय येवजण करतले अशें सांगिल्लें. मात अजून थंय कांयच जावंक ना. आपल्याक जाय तें आपूण करतलों, अशी भावना कोणेच बाळगुची न्हय. काणकोणच्या लोकांक विस्वासांत घेवनूच करमल घांटांतलो रस्तो जावचो, अशी आमची मागणी आसा, अशें जॅक फर्नांडीस हांणी सांगलें.