भांगरभूंय | प्रतिनिधी
संकश्टां येतात तीं सांगून येनात. वेळ तो. कांय सेकंदांत सगलें मातये भरवण जाता. मनशाची जीण ही खिणाची, अशें म्हणटात तें ओगीच न्हय. मोड, भुंयकांप, सुनामी हीं संकश्टां अशींच. पुराय संवसारान केन्ना ना केन्ना सैमाचें हें तांडव, धुमशेणां पळयल्यांत, भोगल्यांत. पूण तातूंतल्यान लोक उबेय रावल्यात. तांच्या मनांत ही वेदना मर मेरेन उरतली, पूण बागवनासतना प्रत्येकान मोडिल्लो संवसार धाडसान परतून उबो केला. तुर्कस्थान (तुर्किये) आनी सीरियांत सोमारा भुंयकांप जालो. सुस्त न्हिदेंत आसतना काळान तांचेर घुरी घाली. आशिल्लें तें कांय सेकंदां भितर नाशिल्लें जालें. ह्या दोनूय देसांनी मेळून मरप्यांचो आंकडो पांच हजारां वयर पावला. दर मिनटाक तो वाडत आसा. अजून हजारांनी लोक बेपत्ता आसात. इस्पिकाचें घर कोसळचें तश्यो इमारती
पडल्यात. चड मार तुर्कीक बसला. 10 राज्यांनी काल तीन म्हयन्यां खातीर आणीबाणी लागू केल्या. सध्या 70 देश तुर्की, सिरीयाचे मजतीक धांवल्यात. आमच्या देशानूय विमान, दोतोरांचो आनी मजत करप्यांचो पंगड थंय धाडला.
मनशान सगल्यांचेर जैत जोडलां, पूण न्हय सैमाचेर. सुनामी, भुंयकांप, मोड येतलें, उल्का कोसळटली…. सगलें सगलें ताका कळटा. पूण तें थांबोवप ताच्या हातांत नासता. ताचे पसून तो स्वताक सुरक्षीत मात दवरूं शकता. मात जावपी विनाश आडावप ताका अजून तरी शक्य जावंक ना. तातूंत भुंयकांप तर चडूच भिरांकूळ. घस्स करून 60- 70 माळयांची इमारत कोसळ्ळी जाल्यार सकयल पसून धांवप शक्य नासता. 1993 त अनंत चतुर्दशीचे रातीं लातूरांत भुंयकांप जावन 10 हजारां वयर लोक मेल्ले. गोंयांक पसून ताचे धक्के जाणवल्ले. मागीर 2001 त भूज गांवांत भुंयकांप जाल्लो. सध्या तुर्कस्तान खंयचे परिस्थितींतल्यान वता हें भूज, लातूरकारांक बेसबरें समजतलें. कारण तें तांणी भोगलां. मजत पंगडाचे खबरे प्रमाण, तुर्कींत साडेतीन हजार लोक मेल्यात, तर 15 हजारां वयर लोक जखमी जाल्यात. कुटुंबाचीं कुटुंबां सोंपल्यांत. सिरीयांत देड हजारां वयर लोक मेल्यात, तर दोन हजारां वयर जखमी जाल्यात. भुंयकांप जाला तीं शारां, महानगरां. म्हणटकच थंय कितल्योश्योच व्हडल्यो इमारती आसात. तातूंतल्यो 1710 कोसळ्ळ्यात. आतां राशी उस्पितले, तसो मरप्यांचो आंकडो वाडत वतलो. फक्त हे दोनूच देश न्हय, तर लेबनाॅन आनी इस्रायलांतूय भुंयकांपाचे धक्के जाणवल्यात.
तुर्की जांव भारत, अशा दुख्खाच्या वेळार सरकारी यंत्रणेचेर टिका करप योग्य न्हय. पूण आमी सुदरनात. सैमा कडेन आमी मस्ती करतात, मागीर तो आमचे कडेन कुस्ती करता. आमकां सगलें खबर आसा, पूण सुवार्थाक लागून आमी कुड्डे जातात आनी नाका तेंच करतात. हातूंत फक्त सामान्य भौसूच न्हय, तर सरकारांय चुकीचीं पावलां उबारतात आनी सैमिक संकश्ट कोसळ्ळें काय मागीर एकामेकांक बोट दाखयतात. उत्तराखंडांत कांय वर्सां पयलीं आयिल्लो हुंवार, फुटिल्लीं धरणां अजून याद आसतलीं. हालींची जोशीमठ शारांतल्या घरांक वेरो वचपाची घडणूक. उदरगतीच्या प्रकल्पांचो ताण हें दोंगरा वयलें शार घेवपाक शकलें ना. सोशल मिडियाचेर आख्खें घरूच न्हंयेंत कोसळटना सगल्यांनी पळयलां आसतलेंच. ताचे वयल्यान सैमाचो विनाश करून आमी कशे पद्दतीन उदरगत केल्या आसतली, हाचो अदमास येता. आमच्या गोंयांतूय दर्या देगांचेर, डोंगराचेर घरां किल्लुपाक लागल्यांत. हें अशेंच चालू उरलें जाल्यार एक दीस…..!!
अंकारा, नुरदगी, दियारबाकीर आनी हेर सात शारांनी 1710 वयर व्हडल्यो इमारती पडल्यात. अशे तरेचो भुंयकाप 1939 त आयिल्लो. तातूंत 30 हजार लोकांक मरण आयिल्लें. तर 1999 त 17 हजार लोकांक जीव वगडावचो पडिल्लो. तुर्कस्थानाची अर्थिक स्थिती बरी ना. सिरीया तर कडव्या लोकांक लागून बरबाद जालां. मनशांनी
संवसार सोंपयलो, फोंडांत घालो आनी आतां सैमान आपलें कर्म केलां. हे दोनूय देश तशे गिरेस्त. मात भुंयकांपाक लागून तांकां आतां वयर सरप बरेंच कठीण वतलें. देशाच्या कांय भागांतूच हें जालां खरें, पूण ताचो फटको पुराय देशाक बसतलो, हें वेगळें सांगपाक नाका. आतां सैमूच तांकां ह्या संकश्टांतल्यान परतून उबे रावपाक शक्त दिवं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
