भांगरभूंय | प्रतिनिधी
सैमीक घटकांचो आस्पाव शेंकड्यांनी वर्सां सावन आसा, फुडें लेगीत हे घटक तशेच उरतले. धर्तरेवेले जीव आसूं वा नासूं हातूंत सैमांत कांयच बदल घडचे नात. मात सैमाच्या घटकां कडल्यान वायट परिणाम सुरु जाले जाल्यार
दरेक जीव हो सैमाच्या आंगार फकत कांय खिणाचो सोयरो. शेंकड्यांनी वर्सा हांगा कितलेशेच जीव जल्माक आयले आनी धर्तरेवेलो तांचो काळ सोंपल्या उपरांत परतून सैमा सुवादीन पावले. काळा वांगडा जिवांचे घडणेंत बदल जायत गेले, पूण सैमीक घटक मात तशेच उरले. इतल्या वर्साच्या कालखंडांत सैमीक घटकांनी केन्नाच जिवांचो दुस्वास केलो ना. कसल्याच तरेचो भेदभाव करिनासतना सैमान दर एका जिवाक भरभरून दिलां. जण एकल्यान सैमाच्या उपकारांत रावचे बदला ताका सगले वटेन त्रासूच दिल्यात. उपकाराचें माप रितें म्हणटात तशें जें सर्रास मेळ्ळां ताचो देख ना तो नाच वयल्यान आशिल्ल्या घटकाचो नाश करून ताका उदरगतीचें नांव दिलां.
कसलोच खर्च नासतना ल्हानां पासून व्हड जिवांचे पोट भरपाची येवजण सैमान करून दवरल्या. तरी आसतना हांतरूण पळोवन पांय सोडचे बदला, देण्याच्या सगल्याच वस्तुचेर ताव मारपाच्यो घडणुको चलत आसात. दर एका जिवाक समाधानाचें जिवीत जगपाक मेळचें आनी धर्तरेवेले ताचे जिणेचे खीण सुखी जावचे अश्या हावेसान सैमाची रचणूक जाल्या. बारीक विचार करात. समाधानी जीण जगपाक लागता तरी कितें? कुडींत जीव आस मेरेन लागता तो प्राणवाय, उदक, पोट भरपा खातीर जेवण आनी रावपाखातीर आसरो ह्यो जिवांच्यो मुळाव्यो गरजो, समान अधिकारान सैमान त्यो जण एकल्याच्या वाट्याक घालून दिल्यात . मुळाव्या गरजां भायर ज्या गजालींचो वापर जाता त्यो दुय्यम गजाली. मुळावी गरज आनी सहाय्यक गरज हांचे मदलो फरक खबर आसून लेगीत आयज सहाय्यक गरजेक चड म्हत्व जाला. फुकट मेळटा म्हूण धर्तरेवेलो जीव ह्या सैमीक घटकांचो गरजे परस चड वापर करपाक लागला. इतल्याचेरूच हें थांबूंक ना, मुखार वचून सुवार्थाच्या नाड्यार संवसार ताब्यांत घेवचे खातीर वावुरपाक लागला. सैमान दिल्ल्या फुकट वस्तुचें मोल लायलां. सैमान दिल्ल्या समान अधिकारांत आपले तरेन भेदभावाची भरसण घाल्या. बळग्याच्या नाड्यार उडपी जिवान दुर्बळ जिवांची मुळावी गरज काडून घेतल्या. ताका लागून आशिल्लो पोट भर खातात आनी नाशिल्लो मात अन्नाक वळवळे काडटा. दर एका जिवान सैमाची देख घेवची सैमांतल्या घटकांचो तांणीं तयार केल्ल्या वस्तुंचेर अधिकार आसून लेगीत तें खंयच्याच गजालीचेर आपणालो हक्क दाखयनात.
सैमीक घटकांचो आस्पाव शेंकड्यांनी वर्सां सावन आसा, फुडें लेगीत हे घटक तशेच उरतले. धर्तरेवेले जीव आसूं वा नासूं हातूंत सैमांत कांयच बदल घडचे नात. मात सैमाच्या घटकां कडल्यान वायट परिणाम सुरु जाले जाल्यार ताचो मार मात पुराय जिवांक भोगचो पडटलो. सद्द्याक धर्तरेवेलो जीव कितल्याश्याच सैमीक आपत्तीच्या बळी पडटा. हें कित्याक जावपाक पावलें? हाका जाप एकूच, देखी सयत सांगचें जाल्यार आमी जें हारश्यांत दाखयतात तेंच आमकां दिसता. तशेंच ज्यो कृती धररेवेले जीव सैमा बाबतीन करतात ताचेच पडबिंब सैम कृतींतल्यान परत त्या जिवां मेरेन पावता. ‘निकाल कृतीचें पडबिंब’ देखून स्वताक बरें मेळपाक जाय जाल्यार ज्या माध्यमांतल्यान तें फावो जाता त्या निसुवार्थी सैमाची जतनाय घेवची पडटली.
निकिता ना. मडगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
