सैम, गिरो वांचोवपाचो यत्न करुंया
भांगरभूंय | प्रतिनिधी
पृथ्वी दीस पर्यावरणीय प्रस्नां कडेन एक सूचक म्हूण काम करता. तशेंच दिसपट्ट्या जिणेंत सकारात्मक बदल आस्पावपाक एक वाहिनी म्हूण काम करता.
आयज २२ एप्रील. संवसारीक पृथ्वी दीस. धर्तरेची राखण करपाचो हो दीस. पर्यावरण संरक्षणाक तेंको दाखोवपाक
लोक आयच्या दिसा साबार उपक्रम घडोवन हाडटात. ह्या कार्यावळींचो हेतू म्हणल्यार उणी जावपी आमचे सैमीक संपत्ती विशीं (जमीन, हवा, उदक आनी रानां) संवसाराक जागृत करप. मनशाक लागून सैमाचो उणाव कसो जाला, प्रदुशीत वातावरणांत रावप कित्याक धोक्याचें आनी आनीक लुकसाण जावचें न्हय म्हूण लोकांनी खंयचीं कृती करची, हें तज्ञ सांगतात.
पृथ्वी दिसाचो इतिहास १९७० च्या दशका सावन सुरू जाता. त्या वर्सा लोकांक प्रत्यक्षांत आमच्या गिऱ्याची परिस्थिती कळ्ळी आनी तांणी ताची राखण करपाक सुरवात केली. त्या वर्सा पयलें खेपे पृथ्वी दीस मनयलो. लाखांनी लोकांनी वांटो घेतलो. सैमाची राखण करपाक सरकाराक पावलां उबारचीं हें सांगूक लोक रस्त्यार देंवले. तज्ञांनी सैमा विशीं आदर दाखोवन पर्यावरणाचे प्रस्न लोकांच्या लक्षांत हाडले.
अमेरिकेचो सिनेटर ‘गेलर्ड नेल्सन’ हो पृथ्वी दिसाच्या कार्यावळी फाटल्याची मुखेल प्रेरणा आशिल्लो. पर्यावरणवादी, कार्यकर्ते, विद्यार्थी आनी सामान्य भौसा वांगडा ताणें पर्यावरणाचे राखणे संबंदी योग्य उपाय घेवपाची मागणी केली. इतलेंच न्हय तर हो प्रस्न राजकी पांवड्यार व्हरपाक खूब कश्ट घेतले. सिनेटर नेल्सन आपल्या मिशनांत येसस्वी जालो. गिरेस्त, गरीब, खेळगडे, वेवसायीक, शेतकार आदी सगल्या लोकांनी पृथ्वीची राखण करपाचो सोपूत घेतलो. सुरवेच्या वर्सांनी पृथ्वी दीस अमेरिकेंतच लोकप्रिय आशिल्लो, पूण मागीर ही कार्यावळ संवसारीक जाली. आयज दरवर्सा २२ एप्रीलाक १९० परस चड देशांनी पृथ्वी दीस मनयतात.
पृथ्वी दिसाचें म्हत्व
जिणेक आदार दिवपी पृथ्वी हो एकूच ग्रह. ही आमकां मेळिल्ली एकूच सुवात. तिची राखण करपाक मेळना जाल्यार आमच्या अस्तित्वाक धोको निर्माण जातलो. पृथ्वीचेर जिवीत कितल्याशाच गजालींचेर आदारून आसा. जिवीत तिगून उरपाक जमीन, उदक, माती, रानां, हवेची गरज आसा. पूण उद्देगीकीकरण, सैमीक संपत्तीचो नियंत्रण नासतना वापर करप, रानां कापप, प्रदुशण, हवामानांतले बदल आदी गजालींक लागून पर्यावरण यंत्रणेचें व्हड लुकसाण जालां. सैम एकलोच आमकां सगळ्यांक पोटाक घालपाक शकता, पूण ताचे संपत्तीचो बेजबाबदार वापर केल्ल्यान ताच्या जैवविविधतायेचें व्हड लुकसाण जालां आनी ताची जमीन, उदका थर आनी वातावरण विखारी जालां. सैमाची भलायकी बरी नासतना आमी जियेवंक शकचे नात हें समजून घेवचें पडटलें.
पृथ्वी दिसाचें म्हत्व दाखोवपी कारणां
- पृथ्वी दीस आमकां एक याद करून दिता की आयज पयलीं परस चड, पर्यावरणीय समरसतायेची, टिकावू जिणेची गरज आसा. पर्यावरण यंत्रणेची जतनाय घेवप आनी सैम, सैमीक जिणेचें संवर्धन करप कितलें म्हत्व, हाचेर विचार करपाची संद मेळटा.
- पृथ्वी दीस जागतीक उश्णतायेची जाणविकाय करपाक गजर म्हूण काम करता. तापमान वाडिल्ल्यान हवामानांत खर बदल जावन संवसारीक संकश्टां घडल्यात. संवसारीक उश्णतायेचे हानिकारक परिणाम ना करपाक बेगोबेग पावलां उबारपाची याद पृथ्वी दीस आमकां करता.
- पृथ्वी दीस आमकां पाचवी अर्थवेवस्था साध्य करपाचे दिकेन व्हरता. पर्यावरणाचेर चड भार घालनासतना मनशाची भलायकी सुदारपाचो हेतू आसा. पृथ्वी दीस मनोवपाच्या मुळाक टिकावूपण आसा आनी ताका लागून आमी सुखी समाजाक कारणीभूत जावपी अर्थीक बदल हाडूंक शकतले.
- आमी कळनासतना जाय आशिल्ले बदल हाडूंक शकले नात. हे नदरेन पृथ्वी दिसाक अत्यंत म्हत्व आसा. कारण ताका लागून पर्यावरण, ताची स्थिती आनी हानिकारक परिणाम सोंपपाक जाय आशिल्ले. पृथ्वी दीस पर्यावरण शिक्षण दिता आनी नागरिकांक सैमाची राखण करपाक उर्बा दिता.
- पृथ्वी दीस पर्यावरणीय प्रस्नां कडेन एक सूचक म्हूण काम करता. तशेंच दिसपट्टे जिणेंत सकारात्मक बदल आस्पावपाक एक वाहिनी म्हूण काम करता. ताका लागून सैमा कडेन जुळपी नवी संवय मेळटा, जशीं प्लास्टीकचो वापर उणो करप, नवे उर्जेचे स्रोत वापरप. देखून पृथ्वीचेर येवपी धोक्यां कडेन लक्ष वळोवपाचो दीस आमकां जाय. पृथ्वी दीस लोकांक पर्यावरण संरक्षणाची वचनबद्धताय घेवपाची प्रेरणा दिता. आमी आमचें घर म्हणटात त्या गिऱ्याक वांचोवपाक समर्पीत आशिल्ल्या जागतीक चळवळीचो एक भाग जावपाक उर्बा दिता. पृथ्वी दीस मनयतना प्रदुशण, जागतीक उश्णताय, चड लोकसंख्या आदी संवसारीक प्रस्नांचेर लक्ष ओडटा. सैम आमकां आमचें अस्तित्व तिगोवन दवरपाक दिता त्या देणग्यांची राखण करपाक प्रोत्साहन दिता.
आमी कितें करूं शकतात?
पृथ्वी दीस दरेका व्यक्ती कडल्यान सुरू जाता. आमच्या ग्रहाची राखण करपाक आमी खंयची कृती करची. ताची जाप सरळ आसा. पर्यावरणाचो आदर वाडोवंक चालना दिवप. देखीक, गरज ना तेन्ना बल्ब बंद करप, उदकाचो उणाव जावचो न्हय म्हणून दांत घांसतना नळ बंद करप. फकत कश्टाच्या कामाची गरज ना. सैमाक मान दिवचो, प्लास्टिकाचो वापर उणो करचो आनी उर्जा वाटोवची. कोयर मर्यादीत करपाची आनी भोंवतणची जतनाय घेवपाची, मागीर ती तुमचें घर आसूं, शेजार आसूं, बाग आसूं, रान आसूं वा तुमी सुटयेंत वतात ती दर्यादेग आसूं.
ल्हान ल्हान पावलां उबारपाक जाय. एक अब्ज व्यक्तींचे, ल्हान व्यक्तींचे सामुहीक यत्न संवसारीक पांवड्यार प्रतिध्वनीत जातले आनी पृथ्वी दीस मनोवप फायद्याचें थारतलें. आनी एकदां बदल चालीक लायले उपरांत येवपी पिळग्यांक पर्यावरणाक जापसालदार आसपाची एक प्रेरणा मेळटली.
निश्कर्शा कडेन वतना
पर्यावरण संरक्षण हो एक गंभीर विशय. जाचो परिणाम आमकां सगळ्यांक भोगचो पडटा. सैमाक आदर दिवप आनी ताच्या संरक्षणाचे दिकेन योग्य पावलां उबारप गरजेचें. पृथ्वी दीस सैमा कडेन आनी आमच्या ग्रहा कडेन आशिल्ली आमची जापसालदारकी याद करून दिता. आमकां मेळपी गंभीर पर्यावरणीय आव्हानां आनी तीं कशीं सोडोवंक जाय हाचेर विचार करपाक प्रोत्साहन दिवपी हो दीस. स्वास घेवपाक निवळ हवेची, पिवपाक सुरक्षीत उदकाची आनी पिकां वाडोवपाक सक्षम जमीन जाय जाल्यार ह्यो साधनसुविधा वांचोवपा खातीर पावलां उबारपाची गरज आसा. पृथ्वी दीस मनयल्ल्यान आमचो ग्रह खऱ्या अर्थान धोक्यांत आसा हें लोकांक कळ्ळां आनी हे खातीर आमी जतनाय घेवपाक जाय, ना जाल्यार आमकां रावपाक आनी जगपाक सुवात मेळची ना.
विष्णू गांवठणकार
7769924816
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
