भांगरभूंय | प्रतिनिधी
पणजी: सैमीक दायज यात्रा उपक्रमाचो एक भाग म्हूण राज्यपाल पी. एस. श्रीधरन पिल्लई हांणी आयज दक्षीण गोंयांतल्या साश्ट आनी केपें म्हालाक भेट दिली.
गोंयांक समृध्द परंपरा आनी सांस्कृतीक दायज लाभलां. सैमीक दायज यात्रे वरवीं आपल्याक गोंयचें दायज आनी संस्कृती जाणून घेवपा वांगडाच तें पुस्तक रूपांत उपलब्ध करपाक आपूण इत्सूक आशिल्ल्याचें राज्यपाल पी. एस. श्रीधरन पिल्लई हांणी सांगलें.
राज्यपालान पयलीं मडगांवच्या होली स्पिरीट चर्चीक भेट दिली. आमदार विजय सरदेसाय हांणी राज्यपालाक येवकार दिलो. होली स्पिरीट चर्चीचे फा. आमांदियो वालादारीस, होली स्पिरीट स्कुलाच्यो मुख्याद्यापिका एस्मेराल्डा फर्नांडीस आनी चर्च समितीचे वांगडी ह्या वेळार हाजीर आशिल्ले.
चर्चींत प्रार्थना केल्या उपरांत राज्यपालान चर्च वाठारांतल्या माड्डीच्या झाडाची म्हायती करून घेतली. ह्या झाडाक नागीण झाड म्हणून वळखतात. चर्चीचे फादर आमांदियो वालादारीस आनी नामनेचे इतिहासकार संजीव सरदेसाय हांणी राज्यपालाक झाडाचो इतिहास आनी हेर म्हायती दिली.
उपरांत राज्यपालान पोरण्या केपें पुलीस स्थानकाकडल्या वाठाराक भेट दिवन थंयच्या सगळ्यांत पोरण्या बाओबाब झाडाविशीं म्हायती करून घेतली. तशेंच श्रीलक्ष्मीच्या देवळांत प्रार्थना केली. थळावे आमदार आल्टन डिकॉस्ता आनी आदले उपमुख्यमंत्री चंद्रकांत कवळेंकार हांणी राज्यपालाक येवकार दिलो.
त्या उपरांत राज्यपालान कुस्मणें केपें हांगच्या मुड्डेश्वर सांतेरी देवस्थानाक भेट दिली आनी प्रार्थना केली. तशेंच तांणी थंयच्या पिंपळाच्या झाडाची पुजा करून झाडाविशीं म्हायती करून घेतली. देवस्थानाचे अध्यक्ष सी. के. देसाय हांणी राज्यपालाक येवकार दिलो.
आपल्या भेटी वेळार उलयतना राज्यपालान एक भूंय, एक कुटूंब आनी एक फुडार हे संकल्पनेंतल्यान संवसाराच्या कल्याणाचो मार्ग उक्तो जातलो अशें सांगून हे वसुदैव कुटुंबकम् ह्या भारतीय परंपरेंतल्यान शक्य आशिल्ल्यचें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
