भांगरभूंय | प्रतिनिधी
सरकारान इंधन पुरवण सांखळी सुरळीत उरची म्हूण यत्न सुरू केल्यात. सिलिंडर पुरवणेचेरूय परिणाम जावंक जायना म्हूण यत्न चालू आसात.
इराणाचेर जावपी हल्ल्याक लागून उर्जा मळार आणिबाणी निर्माण जाल्या, अशें चित्र सध्या तरी दिश्टी पडटा. आर्विल्ल्या काळांत उर्जेच्या इतिहासांत संवसाराक अशी घडणूक केन्नाच भोगची पडिल्ली ना. इराण, इझ्रायल आनी अमेरिका हांचे मदीं जाल्ले लश्करी कारवाये उपरांत संवसारांतलें 20% कच्चें तेल, 20% सैमीक वायू आनी 20% एलपीजीची येरादारी करपी ‘होर्मुझ’ ही सामुद्रधुनी विस्कळीत जाल्या. इतिहासांत पयलेच खेपे होर्मुझची सामुद्रधुनी वेपारी जहाजां खातीर प्रभावीपणान बंद केल्या. ह्या संघर्शाचो परिणाम कांयच कारण नासतना भारताकूय भोगचो पडटा, अशें चित्र आसा.
एलपीजी सिलिंडर, वेवसायीक सिलिंडर मेळोवपा खातीर लोक आनी वेवसायीक धांवतात. जायतो लोक काचाबूल जावन सकाळ फुडेंच सिलिंडर घेवन सिलिंडर पुरवण जाता त्या गुदांवा कडेन लायनींत रावतात. सिलिंडर मेळोवपा खातीर दीस-रात एक करतात, अशें चित्र आसा. पुराय भारतांत, तशेंच गोंयांतूय अशेंच चित्र आसा. केंद्र सरकार परिस्थितीचेर नदर दवरून आसा, परिस्थिती वेवस्थीत हाताळप चालू आसा. गोंय सरकारानूय सिलिंडर स्टॉकाचो नियाळ घेतला. लोकांक पावतलो इतलो सिलिंडर स्टॉक सध्या तरी आसा. लोकांनी काचाबूल जावचें न्हय म्हूण सरकार आपले वटेच्यान यत्न करता.
हें संकश्ट अचकीत आयिल्लें संकश्ट न्हय. आखाती देशांतल्या इंधन कंपनींचेर हल्लो जाले उपरांत परिस्थिती हाताभायर वचपाक लागली. तातूंत होर्मुझांत हल्ले जावपाक लागिल्ल्यान इंधन, सैमीक वायू पुरवणेचेरूय परिणाम जावपाक लागल्यात. हे वटेन सिलिंडर पुरवणेचेर परिणाम जाता म्हूण कळ्ळे उपरांत सामान्य लोक भियेलो आनी सिलिंडर घेवन रस्त्यार देंवलो.
हॉटेल वेवसायिकांक सिलिंडर मेळप कुस्तार जाले उपरांत बोवाळ जालो. एक-एक हॉटेलां बंद जावपाक लागलीं. कांय हॉटेलांतल्यान ताजें करून दिवपाक लागता ते मेन्यू गायब जावपाक लागले. ताका लागून सिलिंडराच्या उणावाचो चड बोवाळ जालो. सरकारान परिस्थिती नियंत्रणांत हाडटना वेवसायीक सिलिंडराचे पुरवणेचेर नियंत्रण दवरलें. लोकांक सिलिंडर वेवस्थीत मेळटाले. मात, लोकांच्या भंयान आतां घरगुती सिलिंडरूय रोखडें मेळप कुस्तार जालें. घरांतलो रितो सिलिंडर घेवन जो – तो लायनींत आसा. कांय जाण तर सिलिंडर रितो जावंकूच ना. मात, फुडें मेळत ना मेळत ह्या भंयान कांय दीस वापरूंक मेळटा तो लेगीत सिलिंडर भरून घेवपा खातीर धांव मारपाक सुरवात केल्या. इराणांत सुरू आशिल्ल्या झुजाचे लोळ लोकांचे रांदचेंकुडींत पावले.
कोवीड काळांत अचकीत सगलें बंद जाल्ल्यान लोकांचें हाल जाल्ले. कांय तेंपान एक-एक गजाली उक्त्यो जावपाक लागिल्ल्यान थाकाय मेळिल्ली. त्या अणभवाक लागून पोटाक मार बसपाक जायना म्हूण सध्या आकांत सुरू आसा. एकदां सिलिंडर भरून घेतलो काय म्हयनो – दोन म्हयने भंय ना, फुडलें फुडें, असो विचार करून लोक लायनींत उबे रावतात.
शारीकरण वाडिल्ल्यान फ्लॅट संस्कृती आयल्या. ताका लागून सिलिंडर हो जिणेचो एक भाग जाला. पयलीं घरांनी चूल आसताली. चुलीचेर जायत्यो गजाली जाताल्यो. सिलिंडर म्हणल्यार ऐशोआरामाची गजाल आशिल्ली. मात, आधुनिकीकरणाच्या काळांत चूल फाटीं पडली आनी सिलिंडर जिणेचो एक भाग जालो. आतां सिलिंडरा बगर रावपाक जायना अशी परिस्थिती आसा.
भारत सरकारान परिस्थिती वेवस्थीत हाताळ्ळ्या अशें म्हणूं येता. सिलिंडर मेळना अशें ना. फक्त लोकांची गर्दी वाडिल्ल्यान रोखडो मेळप शक्य ना. तातूंत आतां सरकारान नवे निर्बंध लागू केल्यात. शारांतल्या लोकांक 25 दिसां भितर जाल्यार गांवांतल्या लोकांक 45 दिसां भितर सिलिंडर मेळटलो. मात, गोंयांत हो निर्बंध लागू करप म्हणल्यार एके तरेन अन्याय जावपाक शकता. शाराची व्याख्या कितें? हेंवूय स्पश्ट जावपाक जाय. पर्वरी सारकिल्लो सुसज्ज गांव पंचायतींत पडटा, पंचायत वाठारांतले गांव आयज फ्लॅट संस्कृतींत न्हातात. रानांनी आशिल्ल्या गांवांनी फ्लॅट संस्कृती ना. मात, हेर सगल्या गांवांनी फ्लॅट संस्कृती पावल्या. तेन्ना 45 दिसां खातीर सिलिंडर म्हणल्यार एके तरेन अन्याय जावपाक शकता.
मजगतीं, प्रधानमंत्री नरेंद्र मोदी हांणी सिलिंडराच्या नांवांन लोकां मदीं भंय पातळायतात म्हूण विरोधकांचेर बोट दवरलां. अशें करप्यांचेर खर कारवायेची शिटकावणीय दिल्या. सरकारान अशे तरेची कृती करप योग्यच आसा. कित्याक तर नाका थंय लोकां मदीं भंय पातळावन लाव कांय जावचोच ना. उरफाटें लोक अदीक काचाबूल जावन सगली अर्थवेवस्था हालोवन उडयतले.
हेर देश हें संकश्ट कशें हाताळटात आनी भारताची प्रतिक्रिया हातूंत फरक स्पश्टपणान दिसून येता. शेजारच्या एका देशान दोन सप्तकां खातीर सगल्यो शाळा बंद केल्यात, सरकारी कार्यालयां सप्तकाक चार दीस चालू दवरपाचो निर्णय घेतला. 50% सरकारी कर्मचाऱ्यांक घरांतल्यान काम करपाचो आदेश दिला, सरकारी वाहनांचो इंधन भत्तो अर्दो केला आनी 60% सरकारी वाहनां पार्किंग वाठारांत अमार्यादीत काळा खातीर दवरल्यात. ह्या देशान इतिहासांतली इंधनाच्या दरांत वाड केल्या, एका सप्तकांत पेत्राेलाची दर सुमार 20% वाडल्या. आनीक एका शेजारच्या देशान विद्यापिठां बंद केल्यांत आनी इंधन वाटावपा खातीर ईदाचे निमीत घेवन कांय दीस सुटी जाहीर केल्या. दक्षीण-पूर्व आशियांतल्या देशांनीय इंधनाचें रेशनींग आनी सांठवण उपाय चालीक लावपा खातीर खर पावलां उखल्ल्यांत.
भारतांत मात परिस्थिती हाताळटना सर्वसामान्यांचो विचार केला. पेत्रोल – डिझल पुरवण आसा तशीच आसा. दर वाडोवंक ना. इंधनाचो सांठो आसा म्हूण स्पश्ट केलां. तरीय कांय लोक रातयां बॅरल, कॅन भरून व्हरतात. गाडयांच्यो टांकयो फूल करतात. सरकारान इंधन पुरवण सांखळी सुरळीत उरची म्हूण यत्न सुरू केल्यात. सिलिंडर पुरवणेचेरूय परिणाम जावंक जायना म्हूण यत्न चालू आसात.
एक संघटीत देश, बळिश्ट देश, आत्मनिर्भर देश म्हूण भारत ह्या संकश्टाक तोंड दिवपाक सगल्या पांवड्यार यत्न करता. गोंयचे विधानसभेंत आमदारांनी सिलिंडराचो विशय काडलो. ताका, सरकार योग्य तरेन जाप दिता, अशें चित्र आसा. दुसरे वटेन दिसानदीस लोकांच्यो सिलिंडरा खातीर रांको वाडतूच आसात. सिलिंडराच्या उणावाक लागून कांय दीस हॉटेल वेवसायिकांक मार बसतलो. मात, लोकांचे रांदचेकुडीक मार बसपाक जायना, हे खातीर सरकारान लक्ष दिवपाची गरज आसा.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
