भांगरभूंय | प्रतिनिधी
सैमा मुखार कोणाचें शाणपण चलना, हें सगल्यांकूच खबर आसा. शेनवारा आनी आयतारा सांजवेळ मेरेन पावसान धुमशेणां कांडलीं आनी सैम आमचे परस कितलो शक्तीमान, बळिश्ट ताचो पुरावो आमकां परतून एक फावट मेळ्ळो. शेनवारा फांतोडेर पावसान घालून घेवपाक सुरू केलें, तें आयतार सांजचो मेरेन तो पडटालो. ताका लागून सगले कडेन उदक भरलें. केन्ना भरूंकना ते जागेय उदका पोंदा गेले. हाचे फाटलें कारण म्हणल्यार चुकीचे पद्दतीन जाल्ली उदरगत. राजधानी पणजेचें आनी सरभोंवतणच्या उपनगरांचें एकूच उदाहरण पुरो. जंय पुर्तुगेज काळा सावन उदक जिरतालें, त्यो मेकळ्यो जमनी आयज उरूंक नात. थंय इमारती, घरां उबीं रावल्यांत, म्हणटकच उदक जिरपाक जागो ना. कांय कडेन सोबितीकरणाच्या नांवा खाला पेवर्स, शिमिट घालून मातयेचे जागे पुरयल्यात. उदक नीट व्हावन दर्याक वा न्हंय, खारीज, व्हाळांक मेळटलें म्हणल्यार गटारां प्लास्टीक कोयरान भरल्यांत. तातूंत वचपाचें उदक रस्त्याचेर तुंबता. कुशीक आशिल्ल्या घरांनी घुसता. खरो धोको, सकयल्या वाठारांत बांदिल्ल्या, दोंगराच्या मुळसांत वा धडेर आशिल्ल्या घरांक. चडशे उदक जिरपाक वाट ना म्हणटकच सखल भागांत घुसता. दोंगराच्यो धडो पावसाक लागून कोसळटात. थंयच्या घरांक वा भितर रावप्यांचे तकलेर पावसाच्या दिसांनी तरसाद हुमकळत आसता. तातूंत झाडांची भिरांत. मुळांत काँक्रिटाच्या रानांक जागो करून दिवपाक झाडां- पेडां हाणपाचें काम नेटान चालू आसा. वीज खातें पावसा पयलीं झाडांच्यो खांदयो बेणपाचेंय काम करता. तरीय नेटाच्या वाऱ्याक लागून झाडां पडटात. लायटीच्या सरयांचेर पडिल्ल्यान खांबे मोडटात. घरांचें लुकसाण आनी वराचीं वरां लायट गायब. काल साठा वयर खांबे कोसळ्ळ्यात. सोमारा सकाळ मेरेन वीज पुरवण आशिल्ली तशी करपाचें उतर वीज खात्यान दिलां. उजो पालोवपी दळ, वीज खातें, पुलिसांक कालचो दीस चड मेहनतीचो आशिल्लो, हातूंत दुबाव ना. तांणी बरें काम केलें.
आयतार म्हणटकच कांय जाणांचो मौज- मजा करपाचो दीस. खाओ, पिओ, मजा करो हो मंत्र जपत बरेच तरणाटे काल पावसांत फुटबाॅल खेळटाले, थोडे साग्रसंगीत पार्टी पिकनीक करपाक न्हंयो, घसघश्यांचेर गेल्ले. सरकारान बंदी घाल्ल्या घसघश्यांचेर ते वचूंक नाशिल्ले, अशी आस्त. सत्तरींतल्या पाली घसघश्याचेर न्हांवपाक देडशें तरणाटे गेल्ले. पावसाचो नेट वाडिल्ल्यान उदकाची पातळी वाडली आनी हे सगले आडकले. मागीर पुलीस, उजो पालोवपी दळ आनी थळाव्यांचे मजतीन दोरी सोडून एकेकल्याक सुरक्षीत भायर काडले. कितें नाका जाल्लें घडिल्लें जाल्यार आयज तांच्या कुटुंबाचेर कितें वेळ येवपाचो हाचो तांणी केन्ना विचार केला? दळाच्या जवानांचेर गरज नासतना कामाचें वजें. एकलो करता मस्ती आनीक भलत्यांकूच जाता कास्तीक. आपणाक लागून दुसऱ्यांक कश्ट, त्रास, मनस्ताप, काडाओड जाता हाचो विचार आमी केन्ना करतले? नानोड्यां हुंवार आयला हें खबर आसतना मोबायलाचेर व्हिडियो शूट करीत थार गाडी एकल्या देड शाण्यान उदकांत घाली. ती व्हांवन गेली. भितर बशिल्लो तरणाटो, तरणाटी मात वाटावली. समाजांत बेफिकीरपण वाडत चल्लां, ताची ही देख.
राखणे वण्टी, पालसणां कोसळपाचे प्रकारुय घडल्यात. मुळांत रस्तो करतना दोंगर विशिश्ट पद्दतीन कापपाचो आसता. मात गोंयांत कोंकण रेल्वेचो आडवाद सोडल्यार कोणेच दोंगर सारको कापिल्लो ना. पणजे हायकोर्ट आसा थंय तो योग्य पद्दतीन कातरिल्लो दिसता. रस्त्या पसून दोंगराची धड पयस आसल्यार पालसणां रस्त्याचेर येवची नात. पूण खर्च वांचोवपाक हें जायना आनी एक पसून फातर, थोडी माती पडल्यार अर्द रस्तो आडावता. कोन्सुआ- कुठ्ठाळे पांच मिनटांनी साठा वयर झाडां पडपाची घडणूक घडली. हाचें फाटलें कारण कळना. कारण कांय वेळा भितर असो प्रकार चक्रवादळ आयल्यारुच जाता. कुठ्ठाळे नेमकें कितें जाल्लें तें अजून स्पश्ट जावंक ना. मालमत्तेचें लुकसाण जालें, मात कोणाक कांय जावंक ना, ही तातूंतले तातूंत बरी गजाल. भुंयगत वीज केबल घालपाचें काम पयलींच जाल्लें जाल्यार लायटीचे पुरवणेचेर इल्लो उणो परिणाम जावपाचो.
सैम बळिश्ट आसलो तरी आपत्कालीन यंत्रणा आनीक सुसज्ज करपाचो वेळ आयला. संकश्ट काळांत सरकारी यंत्रणेक उलो मारपाक फोन नंबर दिल्यात. कारण फुडले कांय दीस पावसाचें संकश्ट कायम आसा, अशें हवामान खात्यान म्हणलां. सैमीक संकश्टां येतूच रावतलीं. तांकां लागून जें कितें समाजांत घडटा, ताचे फाटलीं कारणां सोदून ताचेर उपाय काडपाक मेळटले काय, हाचेर अभ्यास जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
