भांगरभूंय | प्रतिनिधी
जायत्याच जाणांची नदर त्या आंब्यार आशिल्ली. तो कसो मेळोवचो अशें प्रत्येक जाण येवजिताले.
एक दीस चुकून आमचे पोपायेक आंबो जालो आनी योगायोगान त्याच दिसांनी आब्याचो दर वाडलो! आंबो पिकलो, तांबड्या हळदुळ्या अमुरपिक्या टमाटा वरीं ताचो कोर पळयतल्यांचें मन भुलोवंक लागलो. घरच्यांचे जिबेर उदक आयलें. एक- एक फोड करून सगल्यांनी वांटून खावया अशें व्हडल्या भावान सुचयलें,
“फोडूच न्हय तर कोणाकूच ताचो वास पासून घेवक मेळचोना,” अशें म्हणून हांवें त्या पवित्र दिसा सकाळीं न्हांवून पुजे पयलीं पोरसांतलीं फुलां एकठांयतना भक्तीभावान पोपायेर जाल्लो आंबोय काडून फुलदालयेंत दवरलो. देवघरांत कुळदेवतेची पुजा करून फुलां घालीं, उरिल्ल्या फुलां सकट आंबोय फुलदालयेंत देवार्यांतूच दवरलो.
त्याच दिसा आमचे गांवदेवीची पालखी आशिल्ल्यान पोपायेर जाल्या आंब्याचेंय भाग्य उजवाडलें आनी म्हजेंय. शुक्रारा दिसा, अर्दे रातीक, सादारण दोन वरांचेर देवीची पालखी आमच्या दारांत पावली. पालखेंतले देवीक फुलां, उजवाती, आरत दाखोवन कांय फळां अर्पण केलीं. त्या फळांनी तो आंबोय आशिल्लो! जायत्याच जाणांची नदर त्या आंब्यार आशिल्ली. तो कसो मेळोवचो अशें प्रत्येक जाण येवजिताले. फेब्रुवारींत पयलो आंबो आनी पळोवपाकूय चमत्कारी दिसपी मोट्टो, तांबड्या, हळदुळ्या कोराचो रसाळ आंबो. प्रत्येकाक जाय जायसो दिसपी आंबो! आमच्या घरच्या खातीर तो पोपायेचो आंबो, पूण हेरांक कितें खबर? तांचें खातीर तर तो एक आंबो एके आंबो!
पालखेंत भक्तांनी देवीक अर्पण केल्ल्या फळांची पावणी जाताली, पावणी करप्यान तो आमचो आंबो पावणेर काडलो! एकाच आंब्याची पावणी हजार रुपया वयर पावली. अखेरेक एक हजार दोनशें चवतीस रुपयांक पावणी सा जाली! एका व्हडल्या ताटांत फुलां सयत एकुलतो एक तो आंबो पावणी हाडटल्या भाग्यवानाक पावतो…सा केलो! अशें तरेन आमचो आंबो देवी आईचो जावन त्या भाग्यवानाचो जालो. त्या आंब्याचें फुडें कितें जालें तें त्या भाग्यवानाक आनी देवी आईक खबर!
तो आंबो आंबोच काय पोपाय..? पळोवपाक तर तो आंबोच दिसतालो, वासूय आंब्याचोच! आसू!!
‘देवाची करणी आनी नारळांत पाणी’, अशें म्हणटात. तिवूय एक देवाची करणीच आशिल्ली जायत. हालीं तसल्यो करण्यो खूब जातात! एकाच झाडार दोन कोरांचीं फुलां फुलतात, झाडांत श्रीगणेश दर्शन दिता, बटाट, मुळो, गाजरातूय श्रीगणेश आपलें रूप दाकयता. सैमाचो चमत्कार हो सगलो. अशे चमत्कार आतां मनिसूय करूंक लागल्यात एआयच्या माध्यमांतल्यान! संवसार इतलो फुडें पावला की वाचार पासून करूक शक्य ना. कोणे केन्ना कितें करीत तो नेम ना. जित्या मनशाक मारून उडयता, कोणाचोय संबद कोणाय कडेन जुळयता, लायक आनी काॅमेन्टांच्या नादान कितल्याशाच जाणांचेर अन्याय करता. कोणाच्या बर्याचें वा फायद्याचें कोण करिना, सगलें फटींगपणाचें. अशान खरे कलाकार फाटीं आडकून उरल्या. ते खातीर कलाकार उणें जावक लागल्या. कलेक फावो तसो मान मेळनात, कलाकाराचे कलेचो सन्मान जायना, मनशाच्या आंगांत कला येवप हो रचणार देवाचो चमत्कार, हें मनीस साप्प विसरला.
अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
