भांगरभूंय | प्रतिनिधी
मनशा प्रमाण सैम लेगीत बदल्ला अशें वाक्य हालीं सगल्यांच्याच तोंडांतल्यान घोळत आसा आनी तें खरें लेगीत. कारण सद्या सैमाचें लहरीपण वाडत चल्लां. सैमाच्या लहरीपणाचो अभ्यास करपी हवामान खातेंय सैमा मुखार हतबल थारत आसा. कारण हवामाना संबंदीचो अदमास बांदप तांकां कठीण जायत आसा. पयलीं जे तरेन हवामान आशिल्लें तशें हवामान आतां उरिल्लें ना. सद्या सेगीत हवामान बदलत आसा. सैमाचें लहरीपण वाडलां. गीम, पावस आनी शीं ह्या तीन ऋतूंत जशें हवामान आसता तशें आतां उरिल्लें ना. जून ते सप्टेंबर हे चार म्हयने पावसाचे आसतात. पूण फाटल्या कांय वर्सांत आमच्या देशांत वर्सभर पावस पडत आसा म्हणल्यार तें चुकीचें थारचें ना. कारण वर्सभर खंय ना खंय आडवेळो पावस, गारो, तशेंच चक्रवादळ जायत आसता.
आतांय पळयात ऑक्टोबर सोंपलो नोव्हेंबर सुरू जालो तरी पावसान विसव घेतलो ना. ह्या म्हयन्यांतूय देशांतल्या खूबश्या वाठारांनी पावस पडत आसा. आंध्र प्रदेश आनी ओडिशाच्या दर्यादेगांचेर मोंथा नांवाचें चक्रवादळ धडकलां. ह्या चक्रवादळान ह्या दोनूय राज्यांतच न्हय तर देशांत उटंगाराच्या पावसाचो अदमास उक्तायला. स म्हयने जाले तरी पावस थांबपाचें नांव घेना. पावसूच न्हय गीम आनी शिंयाच्या दिसांनीय हीच गत आसा. गिमांत तापमान 40 अंशा वयर वता. पयलीं गिमांत सरासरी तापमान 35 ते 38 अंशा मजगतीं आसतालें. तें आतां 40 अंशा वयर गेलां. हालींच्या दिसांनी ऋतुमान बदलत आसात. खंयच्याच ऋतूची सुरवात वेळार जायना. गीम, पावस, शीं अशे तिनूय ऋतू उसरां सुरू जातात. आतां हेंच पळयात नोव्हेंबर म्हयन्यांत पयलीं कुलकुल्याची शीं पडटाली. आतां मात नोव्हेंबर म्हयनो येवन लेगीत शीं मात लेगीत ना. जूनांत येवपी पावस जुलय सोंपत आयलो तरी दडी मारता आनी आयलो जाल्यार असो येता की दोन दिसांत दोन दिसांची सरासरी भरून काडटा. पूण अशे तरेच्या पावसाची आमकां गरज नासता. कारण ह्या पावसान आमचेंच लुकसाण जाता.
सैमाच्या ह्या अवकृपेचें संकश्ट फक्त आमच्याच देशांत न्हय जाल्यार पुराय संवसाराचेर आयलां. अर्थांत ह्या बदलत्या हवामानाक आनी सैमाच्या लहरीपणाक ग्लोबल वॉर्मिंगाक जापसालदार धरतात. ग्लोबल वॉर्मिंगाक लागून धरतरीचें तापमान वाडत आसा. ग्लोबल वॉर्मींग म्हणल्यार धरतरी वेल्या तापमानांत जावपी वाड. जेन्ना धरतरी वयलें सरासरी तापमान वाडटा तेन्ना ग्लोबल वॉर्मिंगाची समस्या उप्रासता. ग्लोबल वॉर्मींगची समस्या दिसानदीस वाडत वतली अशी शिटकावणी संवसारीक हवामान खात्यान दिल्या. ताका लागून हाचे मुखार हवामानांत बदल हे जायत रावतले आनी ताका लागून सैमाचें लहरीपण लेगीत वाडटलें आनी तीच हुस्क्याची गजाल आसा. अर्थांत हवामानांतले बदल आनी ताका लागून जावपी सैमाची अवकृपा ही फक्त ग्लोबल वॉर्मिंगाक लागून जायत आसा अशें म्हणप म्हणल्यार स्वताच्या चुकींचेर चादर घालपा सारके आसा. सैमांतल्या बदलाक जितलें ग्लोबल वॉर्मींग जापसालदार आसा तितलेच आमी म्हणल्यार मनीस लेगीत जापसालदार आसा. मनशान सैमांत हस्तक्षेप केलो. रानां मारून काँक्रिटाचीं रानां उबीं केलीं. सुमारा भायर झाडां मारलीं. उद्देगीकरणाच्या नांवां खाला कार्बन उत्सर्जन केलें. येरादारीच्या नांवां खाला प्रदुशण वाडयलें. सैमाचेर अतिक्रमण करून सैमाचेर अन्याय केलो. न्हंयांचे, व्हाळांचे मार्ग बदल्ले. ह्या सगल्या कारणांक लागून धरतरे वेलें हवामान बदलत आसा.
सजिवांक चड करून मनशाक जगपा खातीर प्राणवायेची गरज आसता. पूण मनशाचे चुकीक लागून, सुवार्थाक लागून हवेंत घातक रसायनांचें आनी प्रदुशणाचें प्रमाण दिसानदीस वाडत आसा. सेगीत रानां मारिल्ल्यान रानां खालचें वट्ट क्षेत्र 20 टक्क्या परस सकयल आयलां आनी ताचो मोटो परिणाम हवामान बदलाचेर जाला. हवामान बदलाक लागून सैमाचें लहरीपण वाडलां आनी सैमान आमचेर अवकृपा करपाक सुरवात केल्या.
भारत हो शेतीप्रधान देश आसून भारतांतले 70 टक्के नागरीक शेतां आनी ताका पुरक आशिल्ले वेवसाय करतात. सैमाच्या लहरीपणाचो सगल्यांत चड फटको हो शेतकारांक बसत आसा. बदलत्या हवामानाक लागून सुको दुकळ, ओलो दुकळ, आडवेळो पावस, गारपीट, चक्रवादळां अश्या सैमीक आपत्तींक शेतकारांक तोंड दिवचें पडटा. ताका लागून शेतकार मेटाकुटेक आयला. हाका लागून खूबश्या जाणांनी शेतां रोंवपूच बंद केलां. तरणाटी पिळगी गांव सोडून शारांनी वचपाक लागल्यात. परिणाम गांवांनी कोणूच लोक उरले नात. हाचें उरफाटें शारांची लोकसंख्या वाडत आसा.
हवामान बदलाचो परिणाम मनशाच्या भलायकेचेर लेगीत जायत आसा. हवामान बदलाक लागून स्वासाचीं आनी हेरूय दुयेंसां वाडत आसात. सैमाच्या लहरीपणाचो परिणाम फक्त मनशाचेरूच न्हय जाल्यार पशू, पक्षी आनी सजिवांचेर लेगीत जायत आसा.
एकूणच सैमाच्या लहरीपणाचो परिणाम पुराय जीवसृश्टीचेर जायत आसा. सैमाची जर अशीच अवकृपा उरली जाल्यार ताचो परिणाम फक्त आमचेरूच न्हय जाल्यार फुडारांतले पिळगेक लेगीत भोगचो पडटलो. म्हणून ह्या बदलत्या हवामानाची आनी ताका लागून जावपी सैमाच्या अवकृपेची मनशान गंभीर दखल घेवंक जाय. हवामान बदलाक लागून जावपी गंभीर परिणाम लक्षांत घेवन मनशान आतां सावनूच सकारात्मक पावलां उबारूंक जाय. सैमाच्या ह्या अवकृपेच्या संकश्टा कडेन जर मनशान आडनदर केली जाल्यार फुडारांत ताचें व्हड मोल फक्त आमकांच न्हय जाल्यार पुराय जीवसृश्टीक फारीक करचें पडटलें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
