सैमांतलें गोंय व्हिजन 2047 जाय

भांगरभूंय | प्रतिनिधी

भा रताक हरीत क्रांतीचो मंत्र दीत एम एस स्वामीनाथन संवसारीक फुडारी जाले. हालींच तांणी ह्या संवसाराचो निरोप घेतलो. तांची घरकान्न, तीन धुवो उच्च शिक्षण घेवन देशाक सेवा दितात. संवसारीक भलायकी संघटणेच्यो मुखेल वैज्ञानीक सौम्या स्वामीनाथन तांची धूव. स्वामीनाथन फावंडेशन सांबाळपाक त्यो भारतांत आयल्यात, बापायच्यो यादी जागयतात. उंचेल्या कुशळटायेच्या उच्च शिक्षणांतल्यान त्यो व्हड पदार पावल्यो. भारत मातेचे हे व्हड धुवेक राज्यसभेंत सुवात मेळपाक जाय.
फक्त हरीत क्रांतीच न्हय दर्यावेळो वेवस्थापनाची मांडावळ एम एस स्वामीनाथन हांणी केल्ली. स्वामीनाथन हांच्या मुखेलपणा खाला गोंय विद्यापिठांत जाल्ले परिशदेंत वांटो घेतिल्ल्यांक तांची याद आसतली. एका दसका आदीं जाल्ले परिशदेंत डाॅ. स्वामीनाथन हांणी दर्यादेग वेवस्थापन कित्याक जाय? दर्यादेगांचेर बांदकामां व्हड प्रमाणांत जातात तेन्ना दर्यादेगो शेण्टल्यो अशी शिटकावणी दिल्ली. दर्यादेगांची पळोवणी केले उपरांत ते परिशदेंत अभ्यासकांनी विचार मांडिल्ले, प्रेझेंटेशनां केल्लीं. तेन्नाच त्याअभ्यासा प्रमाण उपाय केल्ले जाल्यार गोंयच्यो दर्यावेळो आयज सोबीत उरतल्यो आसल्यो. मोपा विमानतळ जातकूच पेडणें म्हालांतल्यो कांय दर्यावेळो शॅकां पसून मेकळ्यो दवरपाचें चिंतात तें बेस बरें. गांवा वटेन उदरगत व्हरपाची येवजण येवपाची आसा, सैम सांबाळूनच गांवांच्या उदरगतीचीं पावलां सरकारान मारचीं. सैम संतुळां सांबाळपाचें सपन दोळ्यां मुखार दवरुनूच गोंय 2047 सपन आराखड्याची (गोंय व्हिजन 2047) बांदावाळ जावची. देशाच्या निती आयोगाचे उपाध्यक्ष सुमन बेरी हांच्या विचारांतल्यान देशाचो व्हिजन 2047 च्या मांडावळीचो वावर सुरू जाला. बेरी मूळ भारतीय, एक अर्थतज्ञ. एका वर्सा आदीं वर्ल्ड् बँकेक 28 वर्सांची सेवा दिवन ते निती आयोगाचे उपाध्यक्ष जाल्यात. संवसारभर भोंविल्ल्यान फुडले पिळगेक कितें जाय ताची जाणविकाय तांकां आसा. आपली मायभूंय, मायदेश संवसारांतली व्हड शक्त जावची हीच तांची मोख आसतली. गोंयां खातीर व्हिजन, सपन 2047 करतना फुडाराचेर नदर आसची.
गोंयचे कालचे गुणेस्त पिळगेक खासा उच्च शिक्षणा खातीर राज्या भायर वचचें पडलें, आयजय तेंच घडटा, फुडारांत तशें जावचें न्हय हे खातीर आराखडो आसचो. व्हिजन 2047 बांदतना गोंयचें निती शास्त्री, मंडळ आसतलें, वावुरतलें अशी आस्त बाळगुया. निती आयोगान थळावी समिती, मंडळ, वेगळें खातें राज्य पावंड्यार आसचें अशी सुचोवणी केल्या आसतलीच. व्हिजन 2047 बांदतल्यांक परशुराम भुंयेचो व्हिजन 2035 चो नियाळ घेवपाची विनवणी करची. गोंयचे स्वयंपूर्ण येवजणेची गोंयची तुस्त जाल्या, अन्नपूर्णा तोखणायेक पात्र थारतली अशी जावची. गोंयचें आहारशास्त्र, ऋतुमानाचो अभ्यास करून खाणा जेवणाची वेवस्था करपी अन्नपूर्णा थाळी घराघरांनी पावोवपाची यंत्रणाय जावची.
आमची शीत कडी, नुस्त्याचें हुमण संवसारांत, देशांत पावतना गोंयकार उपाशी पडचो ना हाची जतनाय घेवची. गोंयांत एकलोय भुकेल्लो उरचो न्हय हे खातीर जाल्ले येवजणेचो लाव कितले मूळ गोंयकार घेतात? देशांतरांतल्यान गोंयांत आयिल्ल्यांक, गोंय, गोंयकारांचो आदर करतल्यांक, आमीय गोंयकारच म्हणून सांगतल्यांक येवजणेचे फायदे मेळचे.
निती आयोगान साबार राज्यांचे नितींतल्यान देशाची फुडाराची व्हिजन 2047 ची निती घडटली हें सांगपाक आरंभ केला. मध्य प्रदेशाची लाडली गोंयची लाडली लक्ष्मी जाली, कर्नाटक, दिल्ली, राजस्थानांत, तामीळनाडूंत ती लक्ष्मी, गृहलक्ष्मी, महालक्ष्मी जावये. निमाणें म्हणसर तिचो भुलभुलैया, आसतलोच आनी व्हिजन 2047 त ती दिसची, नव्या रुपांत, भेसांत, रंगांत.
दयानंद समाजीक सुरक्षा, गृह आधार, लाडली लक्ष्मी गोंयच्यो तशोच देशाचोय. आदले मुख्यमंत्री प्रतापसिंह राणे, दिगंबर कामत, लक्ष्मीकांत पार्सेकार, मनोहर पर्रीकार, शशिकलाताई काकोडकार, दयानंद बांदोडकार, डाॅ. विल्फ्रेड डिसोझा आतांचे शेतकाम मंत्री रवी नायक गोंयच्या फुडाराचें चिंतपी. मजगतीं, देड, अडेज, स म्हयन्यांचे मुख्यमंत्री आयले आनी गेले, तांची याद खिणाचीं. सत सांगल्यार, सोद घेतल्यार पयलींच्या कांय मुख्यमंत्र्यांचे, विरोध करतल्यांचे विमानतळ, झरे, हाॅटेलां हे भुंयेंत दिसले. तांचो नियाळ व्हिजन 2047 आदीं घेवन गोंयांतल्यान देशाच्या हेर वाठारांनी वचपाक येवपाक येरादारीच्यो नव्यो साधन सुविधा जावच्यो.
गोंय व्हिजन 2047 गोंय, गोंयकारपण सांबाळपी आसचें अशी मागणी करपी आसतले. गोंयकारपण म्हळ्यार कितें तें मागणेंतल्यान कळीत करपाची गरज आसा. विज्ञान, म्हायती तंत्रज्ञान, ए आय चो उपेग मायभास कोंकणी संवसारांत पावोवपाक जाता. तेन्ना निमाणें मायभासच हें खरें गोंयकारपण, मायभास गोंयकारांक जोडटा, मायभाशेंतल्यान मुळावें शिक्षण घेतिल्ले म्हान देशांत, विदेशांत आसात. सर्तींच्या खेळांतल्यान जैतिवंत जावन महानांक मानाचें पानय मेळ्ळां ही म्हायती दर एका मळाच्या नियाळांत व्हिजन 2047 त मेळची.
गोंय राज्य जातकूच 35 वर्सांत कितें घडलें? खंयच्या मळांनी गोंयकार कशे व्हडले जाले? ही म्हायती दितना कालचे आनी आयचे उद्देगपतींचे, वेवसायिकांचे पिळगेंतले वेगळेंपण सोदून काडचें पडटलें. म्हायती तंत्रज्ञान, सोशल मिडियाच्या उकत्या दारांतल्यान गोंय, गोंयकारांची चुकीची म्हायती देशा मुखार घालपीय आसात. आप मजत गट, मुद्रा येवजणेचें रीण, अनुदान घेवन व्हड जाल्ले गोंयकारूय आसात. तांची नसाय तांचेच वांगडा, तांचेंच खावपी, जेवपी, भोंवपी स्थलांतरीत गोंयकारांक जाता, स्थलांतरितां मदीं दुस्मानपण वाडटा. झगडीं झुजांतल्यान ल्हानशी कीट उसळ्यार उजो पेट्टा तेन्ना पुराय गोंय जळत म्हणून गोंयकार सर्वधर्म समभावाचे, शांतिकायेचे दूत जाल्यात. शांतिकाय, सैम, दर्यावेळो, दोंगुल्ल्यो, रानां म्हळ्यार गोंयचो आत्मो, तेंच गोंयकारपण. फुडारांतय गोंयांत सवस्तकाय कशी राखची ती येवजणय गोंय व्हिजन 2047 तल्यान मेळची.
देशाच्या स्वातंत्र्य संग्रमाचो शेंकडो 2047 वर्सा मनयतना व्हिजन 2047 चालीक लावपी यंत्रणेची बुन्याद पांच वर्सां आदीं घालची पडटली हें आतां मेरेनच्या अणभवांतल्यान लक्षांत येतलें.
ते खातीर मनीसबळ निर्मणेचो वावर 2025 वर्सा सावन करपा पासत गोंयकार शंबर वर्सां आदीं कितें करताले ताचो अभ्यास करचो. निती आयोगाच्या मार्गदर्शना खाला व्हिजन 2047 आराखड्याचो मार्ग थारावचे पयलीं गोंयच्या बुद्धिमत्तांक एकठांय हाडून भासाभास करची, सुचोवण्यो मागोवच्यो. समेस्तांक, गांव ते शारांक विस्वासांत घेवन व्हिजन 2047 जालें आनी गोंयांतल्यान पयलींच अंमलबजावणे पासत पावलां घाल्यार उपरांत बोवाळ, घुस्पागोंदळ जायना.
गोंयची लोकसंख्या कशी वाडटा ताचो अदमास फाटल्या दोन दसकांतले जनगणेंतल्यान आयला. लोकसंख्या वाडपाचें प्रमाण विचारांत घेवन शिक्षण, आरोग्य, हेर साधन सुविधांचे सरळ चित्र व्हिजन 2047 दिसचें. गांवा कडेन समेस्तांक व्हरप, शार ते गांव लागीं हाडपा खातीर सेतू बांदप जातलेच.
व्हिजन 2047 नितळसाणीचें वेवस्थापन, उच्च शिक्षणाच्या नव्या कुशळटायेच्या शिक्षणा कडेन केंद्रिस्त आसचें. शेतकाम म्हाविद्यालय आयलां, गोंयचो मूळ वेवसाय शेतकाम तातूंतल्यान बळिश्ट जावंक ताचो आदार मेळटलो. ए आय शेतकामांत येत व्हय, युवा पिळगी थंयच शेतांत देंवतली. राष्ट्रीय खेळांच्या सर्तीं खातीर तयार जावपी साधन सुविधांचो उपेग फुडाराक जावचो, खेळां म्हाविद्यालयां व्हिजन 2047 त आसचीं.

सुहासिनी प्रभुगांवकार
9881099260