भांगरभूंय | प्रतिनिधी
आमचो गांव सैमान नटला, सजला. गांवांत अनेक सण, परबो व्हडा उमेदीन मनयतात. दिवाळी, शिगमो, नवरात्रां, पुनव, फेस्ता, जात्रा… चवथ तर गांवांतल्या घराघरांनी जाता. आमगेल्या जाणट्यांनी, सैमाच्या समाजशास्त्राचो खुबच अभ्यास केला. ते पासत तांणी सण, परबो, व्रतां बी थारावन दिल्ली आसात. जीं आयज मेरेन आसा. प्रत्येक सण सैमाचें म्हत्व पटोवन दिता. खास करून श्रावणांतले सण, परबो सैमा कडेन संबंदीत आसात. आमी ते खातीर सैमाची राखण करपाक जाय.
आमच्या गांवांत आंब्याचे व्हडले व्हडले रुख पळोवपाक मेळटात. गांवचें हवामान तशेंच जमीन आंब्यांच्या झाडांक खूब मानवता. गांवांतल्या दर एका घराच्या आंगणांत तुळस आसा. तातूंत भितर तुळशी रोंपो. घरची सवायशीण बायल दर सकाळीं तिका गंध फूल, कुकूम, उदक घालता. तिची सदांच पूजा करता. सकाळीं, सांजवेळा दिवो, पणटी पेटयता. आमच्या जाण्टेल्यांनी लोकांक सैमा कडेन, वखदी वनस्पती कडेन लोकांक लागीं व्हरपाक तुळशीक देवपण प्राप्त करून दिलें. गोंयांत घरोनघर तुळशीचें लग्न करतात. त्या दिसा तुळसी पेडा भोंवतणी बरें सारोवन बी निवळ करून रांगोळी घालतात. तुळशींत उशी -कांडो, जिन्याची बडी, चिंचेबोटा आशिल्ली ताळी लायतात.
आशाढ -श्रावण म्हयन्यांत आमच्या गांवांत पावस बरोच रकता. लोक शेतांनी, पोरसांनी तरातरांची शाकभाजी पिकयतात. श्रावणांतले भरपूर उत्सव सोंपतकच चवथ येता. हो गोंयकारांचे उमेदीचो सण. चवथी दिसा गणपतीची मूर्त हाडून आमी पुजेक लायतात. सगलींच एक जावन ती मनयतात. गांवचो सैम आमी सांबाळूंक जाय. शक्य आसा तांणी तो वाडोवपाक जाय. गांवाचो वाठार नितळ दवरलो, प्रत्येकान एक तरी झाड लायलें, ताची जतनाय घेतली जाल्यार सैम तिगतलो. सगले गांव सैममोगी जातले. सैम थंय फुलतलो…. आमच्या गांवां सारको.
श्रेया तळवडकार
86377 43847
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
