भांगरभूंय | प्रतिनिधी
मुंबय, खबरां संस्था: अभिनेतो सैफ अली खानाचेर १६ जानेवारीच्या मध्यान रातीं ताच्या बांद्रा घरांत सुरयेन हल्लो जाल्लो. दुबावितानरान अभिनेत्याक सुरयेन स खेपे वार केल्ले. हे घडणुके उपरांत सैफाक रोखडोच उपचारा खातीर लीलावती हॉस्पिटलांत दाखल केलो. दुसरे वटेन मुंबय पुलीस ह्या प्रकरणांतल्या आरोपींचो सोद घेताले.
शेनवारा मध्यान रातीं मुंबय पुलिसांनी सैफाच्या आरोपीक ठाणेच्यान अटक केली. हाचे उपरांत फुडले चवकशे खातीर ताका खार पुलीस स्टेशनांत व्हेलो. आरोपीक अटक केल्या उपरांत मुंबय पुलिसांनी पत्रकार परिशद घेतली आनी ताचें नांव आनी आरोपी बांगलादेशी घुसखोर आसूं येता असो दुबाव उक्तायलो.
आरोपीचें नांव कितें?
सैफ अली खानाचेर हल्लो आनी चोरयेच्या प्रकरणांत आरोपीक अटक केल्या. ह्या आरोपीचें नांव मोहोम्मद शरीफूल इस्लाम शहजाद. ताची पिराय ३० वर्सां. आरोपी चोरी करपाच्या हेतान सैफाच्या घरांत भितर सरिल्लो. मजगतीं ही घडणूक घडली. हाचे उपरांत ताका न्यायालयांत हाजीर करून पुलीसांचे सुवादीन घेवपाची मागणी जातली. मागीर फुडली चवकशी जातली, अशी म्हायती पुलिसांनी दिल्या.
नेमकें कितें जाल्लें?
बिरेस्तारा सकाळीं २ ते २:३० वरांचे सुमाराक सैफ अली खान हांच्या घराचे इकरावे माळयेर एक घडणूक घडली. ह्या वेळार सैफान आपल्या कुटुंबाची राखण करपा खातीर हल्लो करप्याक तोंड दिलें. दुबावितान सैफाचेर स खेपे वार केले. हातूंत तांगेर काम करपी वावराडीय जखमी जाली. उपरांत सैफाक हॉस्पिटलांत दाखल केलो. लिलावती हॉस्पिटलांत ताची शस्त्रक्रिया जाली. सध्या हॉस्पिटलांतल्या वरिश्ठ दोतोरांच्या म्हणण्या प्रमाण सैफाची स्थिती स्थीर आशिल्ल्यान ताच्या जिवाक कसलोच धोको ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
