सैन्यांत वांटो घेवया

भांगरभूंय | प्रतिनिधी

15 जानेवारी ही फक्त कॅलॅण्डरा वयली एक तारीख न्हय, तर हो भारत देशाच्या राखणदारांचो सुवाळो. ह्या दिसा 1949 वर्सा भोवमानेस्त मार्शल के. एम. करिअप्पा हांकां पयलो भारतीय कमांडर इन चीफ नेमिल्लो. तेन्ना सावन हो भारतीय सैन्य दीस म्हूण मनयतात. आमी जें स्वातंत्र्य सूख आमच्या घरांत, राज्यांत आनी देशांत अणभवतात ते कित्या खातीर… तें हो दीस आमकां याद करून दिता.
आमच्या देशांत सैनिका खातीर खूब मान आसा. एक ल्हान भुरगो ते जाण्टो मनीस, सैन्याच्या गणभेसांतल्या सैनिकाक आदरान पळयता. आमदार, मंत्री, सरपंच आनी हेर फुडाऱ्यांक लेगीत जाय ते जाण गाळी संवतात, पूण सैनिकाक पळयतकच एक आदराची भावना निर्माण जाता. हे आमचे संस्कार खूब उंचेले आनी तोखणायेचे आसात.
देशांतल्या साबार वाठारांनी तरणाटे सैन्य दळांत वांटो घेतात. ते मागीर पंजाब जावं, हरयाणा जावं, बिहार जावं वा आनी खयचेंय राज्य. पूण गोंयांतल्यान सैन्य दळांत वांटो घेवपी तरणाटो वर्ग खूब कमी आसा. गोंयचीय जनता सैनिकांक मान दितात, हेर राज्यां भशेनूच गोंयकार लेगीत सैनिकांक आदरान पळयतात. पूण… सैन्य दळांत वांटो घेवपाची आमची संख्या खूब कमी आसा.
गोंयचो तरणाटो लेगीत सैन्य दळांत वांटेकार जावपाचे ताकदीचो आसा. पूण ते नदरेन आमची मानसीकता निर्माण जावपा खातीर जें वातावरण आमकां घरांत, गांवांत आनी राज्यांत जाय तें मेळना. आमचें राज्य दुस्मान देशाचे शिमे लागसार ना. ताका लागून आमचेर आक्रमण जावपाची संभावना कमी आसता. आतंकवादी हल्ल्यांत घरांतल्या मनशाक मरण येवपाचें दुख्ख आमी केन्ना भोगलेंच ना. आमी फक्त हेर राज्यांतल्या मरणांच्यो काणयो आयकल्यात. पूण आमी स्वता तें केन्ना अणभवलें ना. ताका लागून आपूण सैन्य दळाचो भाग जावन दुस्मान देशाचो बदलो घतलों ही भावना आमच्या भुरग्यां मदीं वा तरणाट्यां मदीं तयार जायना.
आमकां आयज गरज आसा ती ते नदरेची मानसीकता निर्माण करपाची. आमी आयज गोंयांत पावला कणकणीं सोऱ्याचीं होलसेल दुकानां, बार्रां पळयतात. तशेंच पावला कणकणीं सैनिकाची शौर्य गाथा आयकूंक आनी पळोवंक मेळूंक जाय. जशीं हाॅटेलां आनी मसाज पार्लरां आसात तेच तरेन सैनीक साहित्याचीं वाचनालयां आसूंक जाय. भुरग्यां खातीर सामान्य सैन्य प्रशिक्षण केंद्र दर पंचायतींनी जावपाक जाय. अशें आसल्यार गोंयच्या तरणाट्यांची सैन्य दळांत वांटो घेवपाची संख्या वाडपाक शकता.

सर्वेश मळकर्णेंकार
9404350745