भांगरभूंय | प्रतिनिधी
चड सेल्फी घेतल्यार बायलांचें सुख उणें जाता, उदासीनताय वाडटा, मानसीक भलायकेचेरूय गंभीर परिणाम जातात
. सोशल मिडियाचेर दिसपी फोटो पळोवन तुमी हेरां परस उणे सोबीत, हेरां इतले फिट न्हय अशें दिसूंक लागलां? तशें आसल्यार तुमी सेल्फी इफेक्टाचो बळी पडटात. ‘सायन्स डायरेक्टां’त उजवाडाक आयिल्ल्या संशोधनांत सोशल मिडियाचेर सतत अलंकृत प्रतिमा पळोवप आनी तुळा केल्यार मूड आनी मानसीक भलायकेचेर थेट परिणाम जाता, अशें दिसून आयलां. स्वताची फिल्टर केल्ली सेल्फी परत परत पळोवनय स्वताची जाणविकाय बदलूं येता. तुमी हिनतायेक बळी पडटात. ताका लागून वायट दिसपाक लागता. सोशल मिडियाचो आमचे मानसीक भलायकेचेर व्हड परिणाम जावपाक लागला. खास करून बायलांक ताचो परिणाम चड जाता.
हालींच ‘जामा इंटरनॅशनलां’त उजवाडाक आयिल्ल्या एका अभ्यासांत किशोरवयीन चलयांचेर चल्या परस सोशल मिडियाचो चड प्रभाव पडटा अशें म्हणलां. तांचेर नकारात्मक भावनांचो चड परिणाम जाता. 57% किशोरवयीन चलयांक उदासीनताय आनी निराशा दिसपाक लागता. अमेरिकेच्या रोग नियंत्रण आनी प्रतिबंध केंद्रान 2021 वर्सा युथ रिस्क बिहेवियर नांवाचें सर्वेक्षण केल्लें. ह्या सर्वेक्षणांत अमेरिकन किशोरवयीन चलयां मदल्या 57 टक्के चलयांक सोशल मिडियाक लागून नेमान उदासीनताय आनी निराशा भोगता, जाल्यार 29 टक्के चले म्हणटात की ताका लागून तांकां दुख्ख जाता.
सोशल मिडियाचेर आशिल्ल्या फोटों कडेन तुळा केल्यार ही समस्या आनीक वाडटा. सोशल मिडियाचेर जायते जाण ‘फेक’ आसतात. हार्वर्ड मेडिकल स्कूलांतली मानसशास्त्राची सहाय्यक प्राध्यापिका केनिशा सिनक्लेअर- मॅकब्राइड हिच्या मतान फोनाचेर उपलब्ध आशिल्ल्या वेगवेगळ्या फिल्टर आनी सोबीतकाय वाडोवपी अॅपां वरवीं तोंडाची
सोबीतकाय वाडूंक लागता. न्हिदेचेर परिणाम जाता, स्वताची नकारात्मक प्रतिमा सुरू जाता.
सोशल मिडियाचो चड वापर केल्यार न्हिदेचेर वायट परिणाम जाता. तशेंच बायलांक स्वताच्या कुडीचे प्रतिमे विशीं नकारात्मकताय दिसता, ताचो परिणाम तांच्या आत्मसम्मान आनी आत्मविस्वास ह्या दोनूय गजालींचेर जाता. हाका लागून तांचे मदीं उदासीनतायेची भावना वाडटा. तशेंच बायला ऑनलायन त्रासाक चड बळी पडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
