भांगरभूंय | प्रतिनिधी
डीपफेक हो मुद्दो बऱ्याच दिसां सावन चर्चेत आसा. आतां मेरेन बॉलिवूडांतल्या जायत्या सेलिब्रिटींचे डीपफेक व्हिडियो आयल्यात. सरकार डीपफेक आडावपाचो पुराय यत्न करता, हाका लागून डीपफेकाच्या प्रस्नाचेर सरकार आनी सोशल मिडिया प्लॅटफॉर्मां मदीं बसका जाल्या. डीपफेक संबंदीत सरकार शून्य सहनशीलताय धोरण आपणायतले हें पयलींच स्पश्ट जालां. गूगलाच्या मालकीच्या व्हिडियो स्ट्रीमिंग प्लॅटफॉर्म युट्युबान सेलिब्रिटींच्या डीपफेक घोटाळ्याचो जायराती आशिल्ल्या 1 हजारां परस चड व्हिडियो काडून उडयल्यात.
प्लॅटफॉर्माचेर एआय सेलिब्रिटी घोटाळ्यांच्यो जायराती थांबवपा खातीर कंपनी व्हड प्रमाणांत गुंतवणूक करता अशेंय युट्युबान स्पश्ट केलां. चवकशी उपरांत स्टीव हार्वे, टेलर स्विफ्ट आनी जो रोगन ह्या नामनेच्या सेलिब्रिटींचें एआय व्हिडियो आशिल्ले 1,000 परस चड व्हिडियो काडून उडोवपाचो व्हड निर्णय घेतला अशें युट्युबान सांगलें.
अजापाची गजाल म्हणल्यार अशा बनावट व्हिडियोंक युट्युबाचेर 20 कोटी परस चड व्यूज मेळ्ळ्यात. कितल्याशाच दिसां सावन वापरपी आनी सेलिब्रिटी अशे व्हिडियो विशीं युट्युबाचेर कागाळ करतात. टेलर स्विफ्ट हाचो गैर- सहमतीचो डीपफेक व्हिडियो मायक्रोब्लॉगिंग प्लॅटफॉर्म एक्साचेर व्हायरल जाले उपरांत युट्युबान ही कारवाय केली. हें पोस्ट काडून उडोवचे पयलीं ह्या पोस्टाक 4.5 कोटी व्यूज आनी 24 हजार रिपोस्ट जाल्ले. सुमार 17 वरां ही पोस्ट एक्साचेर लायव्ह उरली.
404 मिडियाच्या अहवालांत म्हणलां की वापरपी टेलिग्राम ग्रुपांनी बायलांचे एआयन तयार केल्ले अश्लील फोटो शेअर करतात. सायबर सुरक्षा कंपनी डीपट्रेसाच्या ताज्या संशोधनांतल्यान दिसून आयलां की सुमार 96 टक्के डीपफेक अश्लील आनी बायलां कडेन संबंदीत आसात. डीपफेक फोटो, ऑडियो आनी व्हिडियो एआयच्या आदारान तयार करतात. डीपफेक तंत्रगिन्यानाच्या आदारान तयार केल्ले फोटो आनी व्हिडियो मागीर व्हायरल जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
