भांगरभूंय | प्रतिनिधी
गोंयच्या ल्हानशा गांवांतली अस्सल समाजजीण देश, विदेशांत चित्रां, कार्टुनांतल्यान पावोवपी मारियो जाल्यात अजरंवर. तांचें गांवांतलें घर…
ओल्तेरार बसून चिंतप, ब्रशांनी पितारिल्ल्या चित्रांत समाजीक जीण दाखयत गोंयचे कार्टुनिस्ट मारियो मिरांडा भारतीय जाले. गोंयच्या ल्हानशा गांवांतली अस्सल समाजजीण देश, विदेशांत चित्रां, कार्टुनांतल्यान पावोवपी मारियो जाल्यात अजरंवर. तांचें गांवांतलें घर दायजांतल्यान आधुनिकतायेंत वतना ते पद्मश्री, पद्मविभुशण जाले. कला, कलावंतांची भूंय गोंय सेरेंडीपिटी उत्सवाक येवकार दितना ते दिसतले. पणजे मार्केटांत वण्टीवयल्या चित्रांनी, पर्सी, मग्सांचेर. तीच तर ज्येश्ठनीत, कलेची, कलाच्या आंगणांतली.
कोविडा वेळार विस्कटिल्लें पर्यटन जाग्यार घालतना संवसाराक क्लायमेट चेंज (उदका वाऱ्यांतले बदल) बादता. तेन्ना कलेच्या आंगणांत रात दीस बुडून कोविडाच्या तेंपावयल्या चित्रांचें प्रदर्शन माध्यमांक थाकाय दिवपी. वण्टीवयल्या चित्रांतल्यान 10 वर्सा पुराय करपी सेरेंडिपीटी उत्सव म्हणल्यार मांडवी न्हंयचे देगे वयल्या बार्जीर पावला. पर्यटनाक उर्बा दिवपी सेरेंडिपीटी म्हणल्यार कलेच्या कुशळतायेची विंगड विंगड आंगां. नाचप, वाजप, गावप, चित्रकला, फिल्मां, जेवण खाणांतली कुशळटाय, कागद आनी कोयरांतल्यान जावपी नवनिर्मणेक जोडून घेतिल्ले हजारांनी तरणाटे. ज्येश्ठांचोय तातूंत व्हड आसपाव आसा, तांणीच शिकयलां आनी आयजय ते शिकतात, वाचतात. तीच तर ज्येश्ठनीत.
सेरेंडिपीटींत वांटेकार जावपी इंजिनियर, कलाकार, आर्किटेक्ट, संगीतकार, गीतकार देश विदेशांतले, गोंय तांचो आलाशिरो. तातूंतल्यान गोंयच्या कलेच्या मळांची अधिक वजाबाकी जाल्या ती वर्सभर आयकूंक येतली. दिव्यांगां मेरेन ती जेन्ना पावता तेन्ना तांकांय सेरेंडिपीटी आसपावन घेता. तेच बनेरा करपी, गुठलावपी, सोडपी आनी परतून वर्साक धा बारा दीस पणजेतलीं कलेचीं आंगणां आडावपी. कलेचें मळ पर्यटन वाडोवपा पासत उपेगी थारता तेन्ना तें वेवसायिक जाता, आधुनिकतायेच्या रेवाड्यांत हुल्पता. सादूर रावल्यार हुल्पतना येवपी थंड वारो, शिंयाळ्यांतलीं वताचीं, दर्यांतली ल्हारां कुशळटायेचें नवें आंगण बांदतलीं. तांकांय वर्सभराचे कार्यावळीचें, नियोजनाचें (प्लॅनिंग) लागता, कायदोय आसता. कायदो हातांत घेवन कलेपासत गाडयो रंगयल्यार, तांचो उपेग वर्सभर केल्यार लाव, लुकसानय जाता हाची जाणवीकाय आयोजकांक, तेंको दिवप्यांक आसची. कलेच्या आंगणां पासत मेकळ्यो सुवाती सगल्योच आडावच्यो न्हय, समेस्तांक चलपा भोंवपाक मेळपाक जाय. कलेच्या आंगणाचो बाजार जाता तेन्ना थळावें संगीत, नाच, गीतां, खाण जेवण भारतीय जाता. केन्ना, कितें करप ताची दिसपटी आसली तरी भौशीक सुवातींचेर वतना थळाव्यांक कोण आडावचो ना हाची जतनाय घेवप गरजेचें.
व्हड कार्टुनिस्ट, कलाकारांक मेळपाची संद सेरेंडिपीटींत मेळटा खासा मान्यतायेन. पणजेंतल्यान सेरेंडिपीटींतली कला दोनापावला मेरेन पावता तेन्ना गोंय विद्यापीठ, कला म्हाविद्यालयाचे विद्यार्थी कलेंत घुस्पून घेतले. दोन चार उद्येजक, वेवसायांत जैतवंत जातले. तांकां कलेचीं, शिक्षणाचीं नवीं दारां उक्तीं जातलीं.
गोंयचें कला म्हाविद्यालय ल्हान सुवातींतल्यान म्हान जातना गोंयचो सैम संवसारांत पावोवपी म्हाविद्यालयाचे पयले प्राचार्य लक्ष्मण पै हांची याद जाता. सेरेंडिपीटी मारियो, लक्ष्मणबाबांच्यो यादी चित्रांत जागयत व्हय? कला अकादमीची चित्रां, फोटो, पेंटिगांची गॅलरी वेगळे कलेची देण जातना दिसतली. माकनिझ पॅलेसिंतली ल्हान कूड मूर्तीकलेन रंगतली.
सेरेंडिपिटींतली कला पणजे भायर हेर राज्यांनी गेली, राज्यांतल्या कितल्या शारांनी ती वण्टींचेर दिसता? पर्यटनाक उर्बा दिवपी सेरेंडिपिटीचें गिरगिरें अंदूं कागदांतल्या सुतांनी बांदलां? देंवलां? वाऱ्यार नेटान फिरतना सोबीत दिसपी तें गिरगिरें महोत्सवांतली, मळबांतली निळाय दाखोवपी. मांडवी न्हंयचे देगेवयल्यान दिसपी ते निळायेंत कालची गर्दी फाल्यां नासत, विखुरिल्ली आसत, बदलिल्लीं रुपां, रंग तेच.
सेरेंडिपीटी प्रायोजकांच्या तेंक्यान, सरकाराच्या बळग्याचेर मुखार वतना गोंय कला म्हाविद्यालयांत विद्यार्थ्यांची संख्या वाडोवपाक जाय. दूरस्थ शिक्षणान कलेचे नवे अभ्यासक्रम आयल्यार गोंयच्या कौशल्याक पोस्ट ग्रॅज्युएशनातल्यान स्वयंपूर्ण जावंक मेळटलें.
उत्सव येतले, देस विदेस लाव घेतलो तेन्ना गोंयकार तेच संख्येन तांचे वांगडा बसतलो हो रकाद सेरेंडिपीटीन अंदू दिवचो. कलेंतलें वेवस्थापन, वेवसाय, उद्येग गोंयचे मातयेक उंचायेर व्हरुन बसयतलें तेन्ना सेरेंडिपीटी नासल्यारय हेर उत्सवांतल्यान कला फुलतली, दिसतली.
सेरेंडिपीटींतल्या कला मळांची वळख धावी, बारावेच्या विद्यार्थ्यांक जावची. गुणेस्त गोंयकारांक संद मेळ्ळ्यार गोंयकार फाटीं पडचोना. मारियो मिरांडा, लक्ष्मण पै हांच्या तांकीचे आर्टिस्ट सेरेंडिपीटी घडोवंक शकता हो विश्वास गिरगीऱ्यांतल्यान मेळटा.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
